نوایی گه « اؤخشه مس»غزلیگه ایرگشو
کؤنگلوم إیچره درد و غم اولگیلرگه اؤخشه مس، کیم، اول آی نینگ هجری هم اولگیلرگه اؤخشه مس.
ایندیگی سیوگی، صنم، اولگیلرگه اؤخشه مس، ناز و سؤز، قیئناغی هم اولگیلرگه اؤخشه مس.
هجریدین أیفلش بار ایردی شور قسمت لوحیده. کؤزده گی شورابه نم اولگیلرگه اؤخشه مس.
اؤرته نیب کؤنگلیم چیکر ناکاملیقلر آغریغین، باشگه توشگن بو الم اولگیلرگه اؤخشه مس.
کؤرکه بایلر نینگ خیالی اؤیغه تردی تانگ چاغی، کیم بو آغیر صبحدم اولگیلرگه اؤخشه مس.
عشق دوری بیتدی دیب تیلداغ ایتر کؤزی چراس، چؤغی پنهان کیم، بو دم اولگیلرگه اؤخشه مس.
ائریلیقدن سیندی صبریم نینگ قه یئندیک قامتی، مینده گی تؤزیم، چیده م اولگیلرگه اؤخشه مس.
یاردین تانماق، ملامت، اؤزگه لر طعنی بیر یان، باشیم اوزره مونچه غم اولگیلرگه اؤخشه مس.
جاننی شیپقب قاعذ اوزره سؤزنی دؤندیردینگ إیشانچ، برماغینگده قیل قلم اولگیلرگه اؤخشه مس.
_______________________________
کؤرکه بای- گؤزهل، سولو، چرایلی؛
تانماق- انکار؛ تؤزیم- صبر، استقامت؛