JJJJJJJJJJJJJJ
خرد باغبانی بؤلماق إیسته دیم امّا، باغیم یؤقدیر،
اونی قورماق تیله یدیرمین قنی ایندی چاغیم یؤقدیر،
آغو توتمیش یر و کؤکنی، اونرگه توپراغیم یوقدیر.
اوزیلگن تامیری، سولغین آغاچمن یپراغیم یوقدیر.
إیچیمده درد آغیر، قت-قت، اوزوندیر ائتماغیم یؤقتدیر.
روانیم باغیده سَیر ایله نگگیز سیز کیسکه-اوشاقلر،
جانیم جانیده ارداغ تاپدینگیز ای قرا یو آقلر،
کؤکسیمدن دهری انگلب، سورمنگیز آشنایو اؤرتاقلر،
سؤزیم نینگ معناسیدین سیپقرینگ ای بغری چنقاقلر،
إیچیمده تؤلغنور اؤزلیک، دینگیزمن قیرغاغیم یوقدیر.
خرافی ملتیم دردیدن اؤلدیم آه نجات ایندی،
بو تار دنیا یوزیده سیغمه دیم إیزلی ثبات ایندی،
یوزیمگه آچ یاروغ بغرینگنی هردم کائینات ایندی،
قؤلیمدن توت حیات باشله، مینگه إیلگینگ اوزات ایندی،
بو ترقاق، اؤز باشیمچه ایل ارا اسقاتماغیم یؤقدیر.
عقل اؤرنیده اسلام اهلیده سه سیق ساقال کؤردیم،
قیزیل کوز یاشگه کومیلگن نیچه قیز و عیال کؤردیم،
أیلانر بغریده سیوگیسی تاپته لگن وصال کؤردیم،
مَچیتده سکس، بچّه اوستیده کوپ قیل و قتل کؤردیم،
حقیقتنی آچیق یازماق إیشیدن قیتماغیم یؤقدیر.
عمر بؤیی بوزوقلیک تاردینگ آباد بؤل کؤنگلیم،
توهم باتقاغیدن باش چیقردینگ شاد بؤل کؤنگلیم،
ساکن آباد و جیملیک قعریده فریاد بؤل کؤنگلیم،
حور و غلمان و جنت، دینیدن آزاد بؤل کؤنگلیم،
چو یر بؤلدی مینگه جنّت و ائری اوچماغیم* یؤقدیر.
یشش اچّیق-چوچیگین تارتدینگ عمرینگده کوپ و کم،
حیاتده یؤق عدالت انگله دیم اخلاق و منطق هم،
گؤزه ل فرهنگ لطفیدن یاوزلیکلر تاپر برهم،
قلمنی تیلگه سال یازگیل إیشانچ بؤلسین سؤزینگ اؤکتم،
حیات بیرله تفکّردن بؤلک زور قئناغیم* یؤقدیر.
إیشانچ تؤره
ـــــــــــــــــــــــــــــــــــــــــــــــــــــــــــ *