سره حکایه لر تورکومیدن                                                                  

فرانتس کافکا

                                         أیازیف ک. توش کؤردی

عجایب کون ایدی، او کؤنگلینینگ چیگیلینی یازیش مقصدیده بیرآز سیر قیلماقچی بؤلدی. امّا إیککی قدم تشله شی بیلن آق، اؤزینی قبرستانده کؤردی. اطرافنی سرغئگن اؤت- اؤلنلر باسگن، ناطبعی سؤقماقلر. أیازیف اولردن بیریگه قدم قؤیدی و اؤزینی خوددی کوچلی آقیمگه تشله یاتگن حس قیلدی. بیراز اوزاقراقدن هلی توپراغی قوریب اولگورمه گن، ینگی، دؤپه یب تورگن قبر اونینگ اعتبارینی تارتدی. و أیازیف اؤشه طرفگه باریشگه قرار قیلدی. دوپه یگن توپراق اویومی اونی اؤزیگه آهن رباده ی تارته ردی. گاهیده قبر کؤزدن یؤقالر، شمالده قنده ی دیر هیلپیره یاتگن حریر متاع گاه سماگه کؤرتریلیب، ینه سوران سالیب زمینگه اوریلیب، اونی بیکیتردی. متاعنی توتیب تورگن کؤرینمس، بیراق اؤشه تاماندن قوناق تاووش برالـله ایشیتیلیب توریتدی. أیازیف آلیس- آلیسلرگه نظر سالدی. نی کؤز بیلن کؤرسینکی، آرتیده، یؤلی اوستیده، یانیده اؤره لر پیدا بؤلدی. او اؤزینی شاشیلیب چیتگه مئیسه لر اوستیگه آتماقچی بؤلدی، آیاقلری آستیده گی یر چَیقه لیب کیتدی و او دؤپه یگن قبرگه تیزه لیب أیقیلدی. قبر آرتیده إیککی کیشی کتته کان سیللیق تره شلنگن قبر تاشینی دست کؤتریب توریشردی. ک. نی کؤریشلری بیلن آق، اولر تاشنی یرگه سنچیشدی. أیازیف جاییده قاتدی. جیملیکنی بوزیب، کؤپ اؤتمی بوته لر آره سیدن اوچینچی کیشی هم چیقیب کیلدی. ک.  بو کیمسه نی مصوّر صفتیده یخشی ته نیردی. مصوّرنینگ ایگنیده اونیققن شیم(پطلون/إشتان)، آهاری تؤکیلگن، توکمه لری یخشی قده لمه گن کؤیلک، باشیده برقوت قلپاق، قؤلیده عادّی قلم اوشلب آلگن و یوریب کیله یاتگن هواده قنده ی دیر توشونرسیز شکللر چیزه ردی. مصوّر شو قلمی بیلن قبر تیپپه سیده گی تیکیس مرمرگه یازماقچی بؤلدی، لیکین بونینگ عهده سیدن چیقه آلمه دی. تاش جوده بلندده ایدی، اؤزیگه تارتیب، پستلتماقچی بؤلدی، امّا حرکتلری بی ثمر کیتدی. تاشنینگ اوستیگه چیقیشنی ایب کؤرمه دی شیکیللی، بیراق یؤقاریگه چؤزیلدی، آیاق اوچیده توریب، چپ قؤلی بیلن تاشگه سویندی. او شونده ی دیب یازدی: «بونده آرام آله یاتیر...» هر بیر حرف انیق-تینیق کؤرینیب توره ر، آلتینده ی تــَوله نر ایدی. دستلبکی اوچ سؤزنی یازیب، او ک. گه قره ب قؤیدی، بیراق، ک. یازه یاتگن سؤزلرگه یوتاقیب تیکیلیب توره ردی. او مصوّرنی بلکُل اونیتگن، کؤزنی یومردن اوزمسدی؛ کوتیلگنده ی مصوّر تغین یازیشگه کیریشدی، بیراق قنچه اورینمه سین یازه آلمس، اونگه نیمه دیر خلل بیره ردی؛ قنده ی دیر باش-اداغی یؤق سؤقماق پیدا بؤلدی. مصوّر قلمنی سیرمه دی و ینه قه ئریلیب أیازیفگه قره دی، اولر بیر- بیرلریگه تیکیلب قالیشدی، مصوّر الـله قنده ی سببی نا عیان  سراسیمه لیک بیلن جاودیره ب باقردی. ک.دن باشقه بونی پـَیقه شگـَنی یؤق، یالغیز اونگه بیزاوته لنه دی، اطرافگه نجاتسیز النگله یدی. قیسی دیر بختی قراگه قه زیلگن قبر باشیده مرحومنی یادگه آلیب، اوچ دقیقه لی سکوتگه اؤخشش جیملیک حکم سوردی. سکوتنی بوزیشگه بیرار -بیر جان زات جرأت قیله آلمسدی. شو پئیت قبرستان بتخانه سی نینگ موجز قؤنغیراغی بی مورد ناله قیله باشله یدی؛ مصوّر قؤلینی سلکیتدی و قؤنغیراق نینگ اونی اؤچدی. بیراق یبیرآز جیملیکدن سؤنگ ینه چله باشله دی، ایندی سیکین راق، گویا تاووشینی سازلب آلماقچی دیک تؤختب- تؤختب جرنگله یدی. مصوّرنینگ یوزی دهشتدن کؤکریب کیتدی. اونینگ توشونیکسیز حالتیدن ک.نینگ حسلری جنبشگه کیلیب، أیغلی باشله دی، قؤللری عصبی تیتره دی. مصوّر ک. نینگ کیلیشینی صبر بیلن کوتدی و باشقه امکان یؤقلیگی باعث ینه یازیشگه کیریشدی. مرمرگه چیزیق تارتدی، خونیک، بی اؤخشاو، حرف یازیلدی. تاشده بیتته«أ» حرفی توره ردی. مصوّر جــَزوه گه توشیب، آیاغی بیلن گورنینگ إچیگه کیریب کیتدی. اطرافگه توپراق تؤزغیدی. نهایت، ک. همّه سینی انگلب یتدی. اونی آرتیگه قئتریشگه، بو خام سوت یمگن بنده نی عفو ایتیشنی سؤره ب تــَولا قیلیشگه وقت یؤق! قبر ینه متاع بیلن قاپلندی. أیازیف برماقلری بیلن دؤمپه یگن قبرنی کاوله دی، امّا بو إیشدن بران نتیجه چیقمه دی. بیردن زمیندن حریر، بولوتده ی متاع کؤتریلدی. دیوار قولب، توینوک پیدا بؤلدی. او میین نور آقیمیگه چؤمدی. باشینی پستگه یگیب، یر قعریگه پرواز قیلدی. یوقاریده، قبر تاشده اونینگ زرحل حرفلر بیلن ماهرانه بیتیلگن اسمی توره ردی. بو منظره دن هیجانی آرتگن أیازیف ک. اویغانیب کیتدی.

آلمان تیلیدن وهاب جان کینجه یف ترجمه سی