نوایی شغریتی

 ایگمه قاش                                                                                                                    -------------

کؤزوم یاشی که یوره ک قانیغه توتاش کؤرونور،
بیرور قانیمغه تانوغلوق، اگرچه یاش کؤرونور.

لبینی سؤرغه لی عقلیم جنونغه بؤلدی بدل،
می إیچسه تیز اؤلور ایل، ساغده گر یاواش کؤرونور.

شکسته کؤنگلومه آز غم بؤلوبتورور کُلّی،
کیسک قناتی سینوق قوش کؤزی گه تاش کؤرونور.

نی کون که یوزینی کؤرسم، توشومگه کیرسه نی تانگ،
قویاشقّه باقسه یو کؤز یومسه هم قویاش کؤرونور.

نی رود آقیزدینگ اولوس قانیدین، که تیگرنگده،
نظرده سای تاشیدیک نیچه باقسه، باش کؤرونور.

مغ ایشیکین طُره دیک یاپ یورینگغه کیم، گردون،
قویاش سنانی چیکیب طوریده سَواش کؤرونور.

نوایی نینگ بو نمازی نی نوع ایکین، یا رب،
که، سجده وقتی کؤزی گه اول ایگمه قاش کؤرونور.

بیچاره قیلدیلر

بغریمنی تیغ ِ هجر إیله یوز پاره قیلدیلر،
تا یار کوئیدین مینی آواره قیلدیلر.

بوتکودیک ایردی وصل إیله کؤنگلوم جراحتی،
هجران قیلیچی بیرله ینه یاره قیلدیلر.

مضمونی اؤلمک و آتی هجران غمی دیگن،
یوزمینگ جفانی جانیمه یکباره قیلدیلر.

تورغن یاشیم آقیزدیلر اول آی فراقیده،
ثابتلریمنی کوکب ِ سیّاره قیلدیلر.

واعظ اونی سرود ایرور اشغال ِعیشیغه،
قسمت کونیده آنی که میخواره قیلدیلر.

می توت که، جام دَوریده- اؤق تاپتیلر علاج،
جمعی که چرخ دَورینی نظّاره قیلدیلر.

یا رب، نی دی الرنی که، مسکین نوایینی،
بیهوش و عقل و بیدل و بیچاره قیلدیلر.