آتی کیتگن اؤزبیک جنگچیسی، قهرمان عبدالرسول پهلوانگه بغیشلب یازیلگن مرثیه.
پهلوانیم کیتیدی دیب، دوستلر نوای غم توتینگ!
پهلوان نینگ یادینی ایسلب، دمی ماتم توتینگ!
پهلوان قانی حقی، سیز گریهء پیهم توتینگ!
پهلوانیم عظمت و قدرینی بیر عالم توتینگ!
بو شهید ارمانینی هر نرسه دن اعظم توتینگ!
دشمنینگیز هر زمان بیر فتنه نی بنیاد ایتر،
یورتینگیزده تاپسه امکان بار ینگیز بر باد ایتر،
جانینگیز گه قصد ایتیب اغوا قیلر، بیداد ایتر،
قان توکر، قان ییغله تر، جلادینگیز نا شاد ایتر،
بیر، بیرینگیزنی غنیمت انگلنگ و همدم توتینگ!
فاریابیم قلبی خنجر زخمیدن مینگ پاره دور،
حسرتا، داغ المدن یاره اوزره یاره دور،
آسمانی قیرق کیچه کوندوز اسرو قاره دور،
ییغله مه، شیرین تگاب آتینگ تیریک همواره دور،
آنه توپراقنی گوزل سقلب اونی کؤر کم توتینگ
گر چه دارا پهلوانلیک بابیده داستان ایدی،
یا سکندر ییتّی اقلیم اوستیگه سلطان ایدی،
تیمور وچنگیز و بابر فاتح میدان ایدی،
اول رسول پهلوان، لیک اوزگه بیر ارسلان ایدی،
هر بیرعسکر، هر قرا کوزنی بوگون رستم توتینگ!
یاغدو یولگه یولـله گن جنبش شکوه وشوکتیم،
کوهکن ینگلیغ جفا تاغینی ییققن دولتیم،
آنه تورکستان باشیگه تاج قویگن صولتیم،
قد وبستینگ سلطنتگه خوش یره شگن ملتیم،
بیرله شینگیز دوستلر، جنبشنی مستحکم توتینگ!
کونگلینگیز آسمانیگه یوز لنمه سین گرد ملال،
جهدینگیز کیتمس هدر، اقبالینگیز کورمس زوال،
بولمه سین حق و عدالت، آبرومیز پایمال،
سقله سین تینگری اوزی هیچ بولمه سین بیرکار حال،
تینگریدن انصاف تیلب دوستیم قولین محکم توتینگ!
پهلوان ارمانینی هر نر سه دن اعظم توتینگ!
آنه توپراقنی گوزه ل سقلب اونی کؤرکم توتینگ!
هر بیر عسکر، هر قرا کوزنی بوگون رستم توتینگ!
بیرله شینگیز دوستلر، جنبشنی مستحکم توتینگ!
تینگریدن ساغلیق تیلب، دوستیم قولین محکم توتینگ!
--------
1994. جوزا، شبرغان