عمر
وه که عمروم برچه ضایع بؤلدی ایل کامی بیله،
بادۀ ناب اؤرنیده خوناب آشامیم بیله.
کیمسه یوز یل کامرانلیق قیلسه بیل کیم، ارزیمس،
دهر ارا بیر لحظه بؤلماقّه بیراو کامی بیله.
زهرنی اؤزکامی بیرله إیچسه آندین یخشی کیم،
إیچسه حیوان شربتین ناکاملیق جامی بیله.
یوز دلارام ائله گندین روضه حِبسی یخشیراق،
بؤلماق اؤز ویرانی إیچره کؤنگل آرامی بیله.
ای کؤنگول، ایل صبح عیشی ساری باقمه، خوی قیل،
فردلیغ ویرانیده محنت قرا شامی بیله.
قوشقه یونگ مسکن ارا خوشراق دورور آزادلیغ،
بؤلغانیدین بند ارا صیّاد ایپک دامی بیله.
بؤلماق إیتلر مُنعمی تن طعمه ائلب یخشیراق،
تنّی قیلغونچه سمین ناکسلر انعامی بیله.
جاه و مرکب بیرله، ای کیم، بارمه دینگ مقصد یؤلین،
قطع اؤلور بی توشه لیغ زادی فنا کامی بیله.
ای نوایی، حُزن إیله اؤتکر قاریلیق محنتین،
چون إیگیتلیک باردی عیش و عشرت ایّامی بیله.
ارسال در تاريخ 2018/5/13 توسط ایشانج