کؤنگول

کؤنگول جان بیرله باردی همره ینگ، مین درد إیله توردوم،
سینگه جان بیرله کؤنگلومنی، سینی تینگریگه تاپشوردوم.
نشاندور تیره بؤلغان اختر بختیم سوادیدین،
توگنلرکیم، فراقینگ اؤتیدین غم شامی کویدوردوم.
أیغاچ بیرله باشاق کیم، تنده قالمیش اولدورور مرهم،
جنوندین کیم، فراقینگ اؤقلرین جسمیمده سیندوردوم.
توتشتی شمعدیک هر برماغیم هجران شراریدین،
إیلیک مرهم قؤیای دیب چون کؤنگول چاکیگه یتکوردوم.
چو اول کافر چیقر کؤز سالمغه یسیز، ای مسلمانلر،
که مین بیچاره کؤنگلومنی باقیب تورگونچه آلدوردوم.
قاتیبدور کؤزلریم که، نی یاپیلماق، نی تحرّک بار،
قیا باقّه یمو بیر دیب، عزم ایترده بسکه تیلموردوم.
یوزین کؤرگچ باشیمغه توشتی مُشکین زلف ِسوداسی،
فغان کیم، بیر باقیشده یوز بلا باشیمغه کیلتوردوم.
کؤنگول تینمسقه قالمیش ایردی هر نوع آرزو بیرله،
رضا کوئیده تا قؤیدوم قدم، کؤنگلومنی تیندوردوم.
مکان گلخن کولین قیلدیم، نوایی تیلبه دیک، یعنی،
جنون تاراجیدین آخرقرا توفراقّه اؤلتوروم.