« علیشیر نوایی: قاموسی لغت»اثری حقیده
کیئینگی اؤن أیللیکده هم اؤزبیکستان همده چیت ایللرده نوایی شناسلیک گورکیره ب رواجله نه باشه دی، دیسک مبالغه قیلمه گن بؤله میز. بو وقت إیچیده قیلینگن علمی- عملی إیشلر سانی- سلماغی انچه بلند. ائنیقسه اؤزبیکستانده قیلینگن إیشلر کؤزنی قمَشتیره دی. بیر آغیز ائتگنده، گؤزه ل اؤزبیکستانده نوایی شناسلیک علمی ینگی رواجله نیش باسیقیچیگه کؤرتیلدی. در حقیقت نوایی اؤزبیک خلقی نینگ مللی رمزیگه ائلندی.
ایسلش جایزکه، اؤزبیکستانده نوایی حیاتی- ایجادی بوئیچه باسیلگن مقاله، رساله، کتاب؛ قیلینگن علمی - تدقیقی إیزله نیشلرنینگ کیتی کؤرینمی دی. تیلداشلریمیزگه کؤمکله شیش معناسیده نوایی بؤئیچه چاپ بؤلگن مهم بیر اثر حقیده معلومات بیرماقچیمن.
اؤزبیکستانده( 2015) بیر گروه نوایی شناس عالم و تدقیقاتچیلر تامانیدن إیکّی جلدلیک«علیشیر نوایی: قاموسی لغت»یره تیلدی. حجمی کتته إیکّی تومده توزیلگن بو معتبر اثر چیرایلی بیچیم، نقش و بیزه کلرده، اعلی قاعازده باسمه دن چیقریلگن. بیر نیچه یوز مقاله نی اؤز إیچیگه آلووچی 2 جلددن عبارت بو اینسیکلاپیدیه نینگ : 1- إینچی جلدی( الف - س)؛ 2-إینچی جلدی( ت- ه) بولیب، دنیا قاموسچیلیگی معیاری اساسیده ترتیب بیریلگندیر. مقاله لر إیخچم، انیق منبعلر گه ته یه نیلیب یازیلگن. بیرینچی جلدی 535 بیت؛ إیکّینچی جلدی ایسه، 479 بیتدن عبارتدیر.
بو اولکن اثر فیلالوگیه فنلری دوکتوری سراج الدّین سیداف( کمینه نینگ علمی رهبری)همده مینینگ یقین دوستیم فیلالوگیه فنلری دوکتوری افطاندل ایرکین افلرنینگ 22 بیتلیک کیریش سؤزی بیلن باشله نه یدی.
اوشبو کتته قاموس نینگ عمومی قسمی: اساسن نوایی حیاتی و ایجادینی اؤز إیچیگه آله دی. موضوع بؤئیچه اثر إیچیده گیلر:
- نوایی نینگ حیات یؤلی؛
- نوایی اثرلری؛
- نوایی نینگ پویتیکه( شعریتی) سی؛
- نوایی یره تگن اوبرز( بدیعی تصویر)؛
- نوایی استاذلری؛
- نوایی زمانداشلری؛
- نوایی اثرلری قؤلیازمه لری؛
- نوایی اثرلری منبعلری؛
- نوایی بؤئیچه چاپ ایتیلگن اثرلر؛
- نوایی شناس عالملر فعالیتیگه عاید معلوماتلر؛
- نوایی اثرلریده گی قهرمانلر؛
شونینگدیک:
- ادبی، تاریخی، افسانوی شخصلر؛
- ادبی اصطلاحلر؛
- ادبی ژانرلر؛
- ادبی صنعتلر؛
- نوایی کتابلریده تیلگه آلینگن اثرلر و...
إیکّی جلدلیک اوشبو قاموسی لغت کمینه نینگ کتابخانه سینی هم بیزه ب توریبتدی. « علیشیر نوایی: قاموسی لغت» نشرینی برچه نوایی مخلصلری ائنیقسه، عزیزیاشلرگه ساتیب آلیشلرینی توصیه قیله من. کتابخانه سیده بو دایرة المعارف موجود بؤلگن اؤزبیک نینگ اوییدن برکه اریمه یدی. اؤزبیک اوینی نوایی بابامیزنینگ تیرن تفکّری نور افشان قیلیب توریشیگه إیشانچیم کامل.
