« بابر اینسیکلاپیدیه سی» حقیده

اؤزبیکستان ریپوبلیکه سیده اؤزبیک خلقی نینگ داوروغینی دنیاگه یائگن اولوغ اجدالریمیزگه اعتبار جوده کتته. باغ- راغلر برپا ایتیش، کتابلر باسیش، موزیملر تشکیل قیلیش، رمزی مقبره لرینی تیکلش، خلق ارا علمی- عملی سیپوزیملر اویشتیریش آرقه لی اؤلکن ذاتلرنینگ معنوی خقی ادا قیلینماقده. انه شونده ی ارداقلی سیمالردن بیری بویوک ظهرالدّین محمّد بابر بؤله دی. یوقاریده ائتیلگنلر قطاری جانه - جان اؤزبیکستانده سیوملی ادیب، شاعر، عالم، تاریخیچی همده چؤنگ ایمپراتور بابرشاهگه عزّت- حرمت اؤزگچه. بونی بخت، اؤزبیکستانده بابرشناسلیک دیگن فن ساحه سی پیدا بؤلدی. بابر سیماسی سینما-تیاترلرده قئیته جانلنتیریلدی. اونینگ نامی ابدیلشتیریلدی، اثرلری بیلیم یورتلریده اؤقیتیلماقده. بابر بوگون بوتون اؤزبیکستان خلقی اویده؛ ارداغیده. 
بوندن تؤرت أیل بورون(2014) چاپ ایتیلگن ایسه - ده، بیر معظم کتاب حقیده سیز حرمتلی تیلداشلریمیزگه معلومات بیرماقچیمن.
بیز ته نیشتیرماقچی بؤلگن اثر « بابر اینسیکلاپیدیه سی»دیر. جوده گؤزه ل مقوا، عالی دیزاین، اؤته صفتلی قاغازده نشر ایتیلگن بو دایرة المعارف هم شکل و هم مضمون تامانلمه ارزیگولی بیر کتاب سنه له دی. اوشبو انسکیلاپیدیه 747 بیتدن عبارت بؤلیب، اؤزیگه خاص نقشلر بیلن بیجب بیزه تیلگندیر.
« بابر اینسیکلاپیدیه سی»الفبا ترتیبیده توزیلگن بؤلیب، هر بیر حرف شاعرنینگ گؤزه ل بیر رباعیسی بیلن باشله نه دی. دایرة المعارف نینگ طلبیدن کیلیب چیقّن حالده کتابدن بیر نیچه یوز مقاله اؤرین آلگن. مضمونیگه کؤره، اوشبو مقاله لر بابر حیاتی و ایجادی، اثرلری، تاریخی شخصلر، تاریخی اثرلر، ادبیات علمی و ادبی توشنچه لر، بابر قؤلـله گن ائریم نا ته نیش سؤزلر، عروض مساله لری، تاریخی جای اتمه لری؛ واقعه - حادثه لرنینگ تدریجی رواجله نیشیگه عاید قیدلر کبی اؤنلب مهم موضوع و مساله لرنی اؤز إیچیگه قمره ب آله دی. شونینگدیک، اینسیکلاپیدیه سی ده« بابرنامه» بؤئیچه جوده کینگ مقیاسده معلوماتلر کیلتیریله دی.
کتاب آخریده مقاله لر سؤزلیگی و اولرنینگ عربچه یازیلیشی هم کؤرستگیچ اؤله راق اؤز افاده سینی تاپگن.« بابر انکسلاپیدیه سی»، اؤزبیکستان و چیت ایل بابرشناسلری نینگ علمی فعالیتلری؛ دنیا بابر شناسلرینینگ فکرلریدن نمونه لر هم بیریلگن. بابرشناسلیک بؤئیچه چیت یورتلرده آلیب باریلگن علمی- عملی فعالیتلرگه هم قیسقچه تؤختب اؤتیلگن.
« بابر اینسیکلاپیدیه سی»بابرشناسلر گروهی تامانیدن عملگه آشیریلگن. هر بیر مقاله إیخچم و ساده تیلده بیان ایتیلگن بؤلیب، قیزیقرلی معلوماتلری بیلن کیشینی اؤزیگه جلب ایتمه ی قؤیمه یدی. شونده ی عجایب کتاب نینگ نرخی بار یؤغی اتیگی 8$ اطرفیده. چؤنتک باب بو کتابنی وطنداشلریمیز ساتیب آلیب اؤقیشلرینی التماس قیله من. انسکیلاپیدیه شو قدر مکمّل که، بابر بیلن باغلیق اونده ی نرسه یؤق که، تشقریده قالیب کیتگن بؤلسین. بو زور کتابنی اؤقیب چیقّن هر بیر اؤزبیک اؤزی بیر بابرشناسگه ائله نه دی، دیب إیشانه من. حاضرگچه بابر حقیده نیمه اؤقیگن بؤلسنگیز، نیمه که ایشتگن بؤلسنگیز بو اثرده موجود؛ ینگی معلوماتلری سیزنینگ بابر حقیده گی تصوّرینگیزنی بایته دی. باشقه تاماندن بو معتبر کتاب آرقه لی سیز عزیز مللتداشلر اؤزبیکستاندیک عزیز بیر مملکت نینگ علمی صلاحیتی بیلن آشنا بؤله سیز. ممنونیت بیلن ائته ی که، اولوغ « بابر اینسیکلاپیدیه سی»اوقیانوس آشیب، کمینه نینگ کتابخانه سینی هم بیزه ب توریبتدی.