نوایی نینگ شاه غزللریدن

                      یار

وای، یوزمینگ وای کیم، ترک ِمحبّت قیلدی یار،
بیلمه ئین قالدیم مین و قیلمـَی خبر ائریلدی یار.

باردی اؤقدیک تیز«یا»دیک قامتیم یاد ایتمه دی،
عشق ارا گویا مینینگ ایگری لیگیمنی بیلدی یار.

چون گدالر بیرله شه لر قیلمس ایرمیش یارلیغ،
مین گدانی کؤزگه بس نیوچون بوروندین إیلدی یار.

پند ایشیتیب، دوستلر، هیچ کیم بیله یار اؤلمنگیز،
کیم، مینینگ بغریمنی تیغ هجر بیرله تیلدی یار.

میندین ائریلغن بلا و درد اوچونمو أیغله ئین،
یا انگه کیم، باریبان اغیار إیله قاتیلدی یار.

أیغله شیب غم شامی ظاهر ائله سونلر درد اؤتین،
مینگه کیم بیت الاحزانده شمع دیک تاپیلدی یار.

ای نوایی، یار اوچون تارتر ایدینگ غربتده رنج،
یؤلغه توش، ایمدی روانراق بؤل، عزیمت قیلدی یار.