کؤروب        

 سهودور طوبی دیمک، رعنا نهالینگنی کؤروب،
یاکه جنّت باغی گلزاری جمالینگنی کؤروب.

روضه ده کوثر قیراغینده خیال ایتّیم بلال،
یوز ارا لب، لب اوزه شبرنگ خالینگنی کؤروب.

ساغینور عاشق لیغینگغه روبرو کیلمیش قویاش،
کؤزگوده مشّاطه هر ساعت مثالینگنی کؤروب.

سرودین بلبل نیتانگ رم قیلسه طوبیدین ملک،                                                      جلوۀ قد حالتیده اعتدالینگنی کؤروب.

نرگسینگ افسون و گلبرگینگ تکلّم ائله دی،
عقل کُل تاپتی فریب، اول مکر و آلینگنی کؤروب.

ایلگه عشرتدور ینگی آی کؤرسه لر، لیکین منگه،
یوزله نور آشفته لیغ، مشکین هلالینگدین کؤروب.

اؤلتورور هجران تونی، اؤلسم هم ارمان قالمه غـَی،
توشته هم بؤلسه بیر ایّام وصالینگنی کؤروب.

نیتّینگ، ای ساقی که، اؤزدین باردیم انداقکیم، زلال،
آلیب إیچمستین بورون، جام زلالینگنی کؤروب.

سودره اول یان، ای نوایی، اؤزنی مُهلک ضعف إیله،
شاید ایتکـی رحم اول قاتل بو حالینگنی کؤروب.