شیرین نینگ سیوگی- ساغینچگه بیلنگن مکتوبی
ایندی سیوگی مکتوبی نینگ سؤنگّی قسمی بیلن ته نیشسک. خط نینگ بو قسمیده تقدیردن نالیش و ازلده یازیلگن سیوگی عذابلریگه چیدش، داش بیریشدن بؤلک چاره یؤق، دیئیله دی. شیرین فرهادنی کؤنگلینی کؤتریشگه اورینه دی. فرهادگه:« ایر کیشی هر قنده ی آغیر یوکلر آستیدن توریب کیته دی، قیئین چیلیکنی اینگیب، مرادیگه یتده دی»- دیه دلده بیره دی.
مذکور سیوگی نامه ده شیرین اؤز دردیدن هم سؤز آچه دی. قیز کیشیگه عشق حقیده سؤز اظهار قیلیش آسان إیش ایمس. نیمه بؤلسه هم عیال محکوملیک تقدیرگه باغلب قؤئیلگن، دیدی. سینینگ دردینگ مینینگ دردیمدن آغیر دیماقچی من، دیدی شیرین. و ینه فرهادنی سیوگی بابیده گی جسارتی، اینگیلمس کوچی مقته شگه توشه دی.
مکتبو دوامیده شیرین یورتی تالان-تاراج بؤلگه نینی، قؤشونلری توتقون آلیبنیب، لشکردن قوتیلیب قالگنلری ایسه، بیرغارده بیقیب یایبتدی، دیب شکوه قیله دی. مینینگ عشقیم طفیلی خلق باشیگه آغیر کونلر توشدی، دیئدی شیرین. تیراق مکتبوبیمگه جواب یازگین، دیه فرهادن التماس قیلیب قاله دی. خطنی شیرویه فرهادگه آلیب باریب بیره دی.
چو ائلـه بتور سپهر ِتیز رفتار،
سینی بیریان مینی بریان گرفتار.
-
کشی گر کؤکسینی یوز پاره قیلسون،
فلک بیدادیغه نی چاره قیلسون؟
-
انینگ بیدادیدین کیم بؤلسه ناشاد،
قیلور جانیغه بیداد اوزره بیداد.
-
نیچه سین بستۀ بند و بلاسین،
بلالر بندی إیچره مبتلاسین.
-
غم و دردینگچه درد امکانی یؤقتور،
بلا و محنتینگ پایانی یؤقتور.
-
ولی بؤلمیش جهان اهلیغه معلوم،
که إیلگینگده قاتیق خارا ایرور موم.
-
چیکرگه درد و اندوه جرأتینگ بار،
بلا تارترغه صبر و طاقتینگ بار.
-
اگرچه فراقتیمدین ناتوان سین،
ولی هم ایرسین و هم پهلوان سین.
-
اگر طغیان قیلور هجران ملالی،
قیلورسین آه إیله کؤنگلونگنی خالی.
-
مشقّت اؤتی قیلسه جسمینگه کین،
بیرورسین اشک سیلی بیرله تسکین.
-
یتیشگچ درد اوچون هریان کیترسین،
فغان و پویه بیرله دفع ایترسین.
-
اگر کؤکسونگه اورسنگ غصّه تاشی،
وگر جانینگه محنـت دورباشی.
-
نی کیم قیلسنگ سؤزی سیغمس کیشی نینگ،
که بو طوری بؤلورعـاشق إیشی نینگ.
-
مین ِزار و ضعیف و پاشکسته،
باشیمدین تا ایاق اعضا شکسته.
-
فراقینگ تیغیدین یوز پاره جانیم،
نی جانیم بل که جسمیم ناتوانیم.
-
کویوب هجر اؤتیدین جان و کؤنگل هم،
نی کؤنگول کیم بؤلوب یوز قتله کول هم.
-
إیچیمگه شعلۀ عشقینگ توتاشیب،
توتاشیب دیمه کیم باشیمدین آشیب.
-
إیچیمده بؤلسه یوز آؤت آشکارا،
نفس دودین اوره رغه قــَیده یارا؟
-
گر اؤلسه لعل بیرله کؤزلریم کان،
آقیزماق قطره یی اندین نی امکان.
-
نیچه خاتون کیشی بار ایرسه توسن،
بؤلوب آزادهلیقده سرو سوسن.
-
جمال إیچره مۀ تاباندین افزون،
مه ِ تاباننی قؤی کیم اندین افزون.
-
انگه یخشی که ائلب دلربالیق،
وفا اهلیغه قیلغی بی وفالیق.
-
حق اندین اسره سون کیم اول زبون وش،
بیراونینگ عشقیدین بؤلغی مشوش.
-
گره لرهجریدین قاشیغه توشگی،
گره لیک عشق إیشی باشیغه توشگی.
-
نی عشق اؤتیغه قؤیمکلیکّه تابع،
نی اندین قوتولوب جان ِخرابی.
-
ایاغ آستیغه قالسه ناتوان مور،
کیتورسه قتلیغه یوز اژدها زور.
-
چو اول بؤلمیش خلایق پایمالی،
یوز اژدر چنگیده بؤلغی نی حالی.
-
چقیلسه برق عالم إیچره بی باک،
توره آلغیمو اؤتروسیده خاشاک.
-
بو مشکل راق که مونداق زار بیدل،
که بیدللیق ایرور جانیغه مشکل.
-
انگه بیریان ایرور یوز مونچه افسوس،
ینه بیریان حجاب ننگ ناموسّ.
-
نهانی اورسه تون- کون یوز تومن پیچ،
اگر ناموسی باردی بارچه سی هیچ.
-
بغایت مشکل إیش ایرمیش بغایت،
که عاشق ننگ و نام ایتگی روایت.
-
اوچورسه آهی یتّی کؤک نقابین،
یوزیدین آچمه غی بُرقع حجابین.
-
دیمان میندین سینینگ دردینگ ایرورکم،
سینینگ هم کؤپ دوروردردینگ، مینینگ هم.
-
ولی یوز مونچه درد تازه بیرله،
غم و انده بی اندازه بیرله.
-
چو درد و غربتینگنی یاد ایترمین،
حزین جانیمغه یوز بیداد ایترمین.
-
اگرچه بؤلغالی عشقینگ اسیری،
اؤترافلاکـدین آهیم نفیری.
-
دمی خوش اورمه دیم افغان إییچینده،
دمی خوش بؤلمه دیم هجران إیچینده.
-
آلیب دشمن سپاه و افسریمنی،
قیلیب تارج ملک و کشوریمنی.
-
مین و خیلیم نیچوک کیم بومِ منحوس،
بؤلوب بیر غار ارا تاغ إیچره محبوس.
-
مونونگدیک ملک نینگ شاه و فقیری،
بؤلوب باشدین ایاق دشمن اسیری.
-
توتلغانلر قیلیب جانیمی تسلیم،
قوتلغانلرنی هردم اؤلتوروب بیم.
-
بولر ایلگه مینینگ عشقیم إیشیدین،
قولاغیم یالقیبان ایل قرغیشیدین.
-
قیلیب جانیمغه قصد ایلدین اویاتیم،
اؤچوب بانو اویاتیدین حیاتیم.
-
ولی یوز مونچه محنت بؤلسه ایردی،
نی یوز، مینگ مونچه شدت بؤلسه ایردی.
-
سینی کؤرسم ایدی ناگاه- ناگاه،
غمیم یؤق ایردی بالله ثم بالله.
-
بودم هم کیم فراقینگدین اؤلوب مین،
یوز اؤلگندین هم آرتوقراق بؤلوب مین.
-
حیاتیم وصلینگه امید إیـلان دور،
امید اول رحمت جاوید إیلان دور.
-
اگرهجرینگده یوز أیل غصّه کش مین،
اگر و صلینگ امیدی بؤلسه خوش مین.
-
توقّع اول که آشفته بو نامه،
که بو آشفته قیلدی نقش خامه.
-
اؤقوب مضمونیدین آلسنگ حسابین،
کرم ائلب أیبارگی سین جوابین.
-
کیم اول هرغمده بؤلغی حرز جانیم،
بلا و غصّه دین خطّ امانیم.
-
چو بؤلسنگ حالیمه آگاه و اعلم،
جوابین هم أیبار والله و اعلم.
توگه دی.
ارسال در تاريخ 2016/5/8 توسط ایشانج