شیرین نینگ سیوگی- ساغینچگه بیله نگن مکتوبی
«فرهاد و شیرین» داستانیدن
اوچینچی قسم
بوندن آلدینگی مقاله میزده گؤزه ل یوزلی شیرین نینگ سیوگی - ساغینچگه بیلنگن مکتوبینی آچیب اؤقیشگه باشله گن ایدیک. ایندی اؤشه محبّت نامه نی اؤقیشگه دوام ایته میز. مذکور خطده نازلی شیرین عاشق فرهاد ایسیگه ائریم نرسه لرنی سالیب قؤئیدی. شیرین اؤز مکتوبیده: فرهادنی بند ائله گن ساچی، عاشق قدّینی بوکّن قاشی، مفتون ائله گن چراس کؤزلری، کؤکسینی تیلگن کیپریکلری، دین و ایمانّی تارتیب آلگن کؤز قاره چیغی، قویاشنی اویه لتیرگووچی یناقلری و فرهادنی بیر عمر اسیر ائله گن خالیدن سؤز آچیب، اولردن قنده ی دیر معنا إیزلشگه اونده دی. بونکته لرنی ایسلشدن شیرین نینگ مقصدی: « قنده ی آغیر چاغلرده بؤلمه سین، مینینگ خیالیم سینگه کوچ و قوّت بیره دی. سین آغیر دملرنی اینگیب، مینینگ وصالیمگه یته سن» دیماق ایدی. سیوگی مکتوبینی اؤقیشگه دوام ایته میز:
یوزوم هجریده تؤکسه کؤزلرینگ سوو،
قویاش رخساریغه باقّونگ کیلورمو؟
معناسی:
کؤزلرینگ یوزیم هجریده یاش تؤکیب تورگنده، قویاش یوزیگه قره گینگ کیله دیمی؟
کؤزونگ لعلیم غمیدین تؤکسه قان یاش،
بؤلورمو لعل اول قان بیرله هر تاش؟
معناسی:
کؤزلرینگ لعلگه اؤخشه گن دوداغلریم خیالیده قانلی یاشلر تؤکیب تورسه، شو قانلر بیلن هر بیر تاش لعلگه ائلنمه یدیمی؟
تیلینگ قیلسه حدیثیمدین روایت،
اؤزونگ بیرله قیلورسن مو حکایت؟
مینینگ وصفیمنی تیلگه آله یاتگه نینگده، بولرنی اؤزینگ اؤزینگّه حکایه قیلیب گپیرمه یسنمی؟
تیشیم یادیده کؤنگلونگ چیکسه ناله،
یاشینگنی ساووق آه ائلرمو ژاله؟
معناسی:
تیشلریمنی ایسلب، کؤنگلینگ ناله چیکسه، کؤز یاشلرینگ تامچیلرینی ساووق آهینگ دؤلگه/ ژاله گه ائلنتیرمه یدیمی؟
ضمیرینگ قیلسه آغزیمنی توهّم،
عدم یؤلیده ائلرمو اؤزین گم؟
معناسی:
کؤرینمس آغزیمنی خیالگه کیلتیرسنگ، اؤزینگنی یؤقلیک یؤلیده یوقاتیب قؤئیمه یسنمی؟
زنخـدانیم بیـله زلـف ِ گـره گـیر،
حزین کؤنگلونگه ایرکین چه و زنجیر؟
معناسی:
سقاغیم( زنخدان) بیلن جینگه لک ساچلریم، حزین کؤنگلینگّه قودوق و زنجیر بؤلیب کؤرینمه یدیمی؟
قولاغوم دُرّی اشکینگ قیلسه کوکب،
بؤلورمو کؤزلرینگ دُردین لبالب؟
معناسی:
قولاغیمده گی دُر کبی سیرغه لر کؤزلرینگنی یولدوزلرده ی پارله تسه، کؤزلرینگ إینجولرگه تؤلمه یدیمی؟
قدیم هجرانی بؤلسه کینه خواهینگ،
چیقارمو سرو ینگلیغ دود و آهینگ؟
معناسی:
قدّ و قامتیم هجرانی سینی دشمنلیک قیلیب قیئنه سه یعنی، سینی اؤزیگه یاویتمه سه( یقینلشتیرمه سه)، آغزینگدن چیقه یاتگن آهلرینگ خودّی سرو درختی کبی کؤکّه کؤتریلرمی؟
خیال ایتسنگ خرامیمدین شمایل،
روانینگ چیقّه لی بؤلورمو مایل؟
معناسی:
خرام ائلب یوریشلریمنی کؤز آلدینگّه کیلتره ر بؤلسنگ، إیچینگدن جان ینگ چیقیب کیتگوده ی بؤلمه یدیمی؟
بیلیمدین ضعف بؤلسه کؤنگولونگه حال،
بؤلورمو مویه دین مو، ناله دین نال؟
معناسی:
خیمچه بیلیمنی ایسلب هوشینگدن کیتیب قالگوده ی بؤلسنگ، أیغلب قیل ده ی إینگیچکه له نیب قالگن کؤنگلینگ تاباره قیئیلیب ادا بؤلمه یدیمی؟
تنیم سیمی إیچینگنی قیلسه محزون،
بؤلور ایکین یوزینگ اول غمدین آلتون؟
معناسی:
کوموشده ی بدنیم خیالیدن ایزیلیب، خفه بؤلیب قالگن چاغینگده، اونینگ قیغوسیدن یوزلرینگ آلتونگه اؤخشب قیزرمیدیمی؟
مقامینگ تاغ یا صحرامو ایرکین،
یانینگده بسترینگ خارامو ایرکین؟
معناسی:
توره ر جاینگ چؤلده می، تاغده می؟ کؤرپه - یاستیغینگ تاش و تینکلردنمی{ ائت جانیم!}؟
همای عشرتینگ معدوم ایکن مو،
باشینگغه سایه سالغان بوم ایکن مو؟
معناسی:
عشرتگه ایلتووچی بخت قوشینگ یؤقلیکّه یؤل آلیب، دولت قوشی اؤرنیده باشینگه بایقوشلر سایه ساله یاتگه نی یؤقمی؟
کیئیک ایرکین یوره رده رهنماینگ،
قولان ایرکین سمند ِ باد پاینگ؟
معناسی:
بیرار یاقّه یوریب چیقه ی دیسنگ یؤلباشچینگ کیئیکلر، قولان ایسه، سینگه ایل قور آتلرنینگ اؤرنینی باسرمیش.
شرفدین بؤلغان ایرمیش سین سلیمان،
مینینگ بیرله اونوتمه حد و پیمان.
معناسی:
شرف بیلن سلیمانیلیک مقامیگه یتیب سن. مین بیلن قیلیب قؤیگن عهد و پیمانلرینگنی اؤنوتمه، تغین.
حووش ایرمیش سینینگ آلینگده خادم،
سباع ایرمیش تبوغینگده ملازم.
معناسی:
وحشی حیوانلر سینینگ خذمتگارینگ، أیرتقیچلر بؤلسه، ایشیگینگ ته گیده ملازم.
بهایم تابع ِ فرمانینگ ایرمیش،
جناح ِ طیر شادُروانینگ ایرمیش.
معناسی:
تؤرت آیاقلی برچه حیوانلر سینینگ بویروغینگّه بؤئین ایگیب، قوشلرنینگ قناتی باشینگ اوزره چادر ایمیش.
چو سین تاپدینگ سلیمانلیق مقامین،
دیمان قیل منگه بلقیس احترامین.
معناسی:
ایندی سین سلیمانلیک مقامیگه ایریشدینگمی، مینگه بیلقیسگه بؤلگن احترامنی بجا کیلتیر.
اگربلقیس دیک یارو عزیزینگ،
بؤله آلمان، هم اؤلغای مین کنیزینگ.
معناسی:
اگر مین سینینگ بیلقیسدیک عزیز یارینگ بؤله آلمه سم، چؤرینگ کو، بؤله آله من.
مقاله نینگ دوامی بار>>>>>>
ارسال در تاريخ 2016/4/27 توسط ایشانج