نوایی حکمتلری

(بیر مینگ اؤگیت)
قچان ساچسه توفراقّه بوغدای بیراو،
یؤق امکان که، اول ارپه قیلغی دراو.
801
قطره گه چون تربیت ایتّی صدف،
ایل باشیگه چیقّوچه تاپتی شرف.
802
قصد إیله یالغان دیمه دی راستگوی،
چون دیمه دی سعی إیله کذّاب خوی.
803
قیلدی بولوت اشکی بیله دُرنثار،
بؤلدی چاقین کولگوسیدین خاکسار.
804
قیلمه دی مینگ دشمن ِ کین خواه اؤقی،
اول یره کیم، ائله دی بیر آه اؤقی.
805
قؤیر اسّار( جواز حیوانی) اویی چون ایگری گامین،
یؤل ایتمس قطع توز ائلب خرامین.
806
قؤینی شبان اسره مسه آی و أیل،
آچ بؤریلر طعمه سیدور، باری بیل.
807
قؤزغَمه بلبلنی کؤپ، ای گل که، دوران باغیده،
قالمه میش قؤزغالمه ئین اول کیم، بیراونی قؤزغه میش.
808
قیلمه اول إیش کیم، ایتیب نقصان سنگه،
آخری بؤلغی وبالی جان سنگه.
809
قیسی إیشدین کیم، یتر نفسینگغه کام،
تاپر آندین کامینی شیطان مدام.
810
قیسی چیبین کسوتی زرکاردور،
یاریدورور قی ده کیم مرداردور.
811
قری چیلیک دوری بیدرماندور آخر.
812
قیلی ظلم، ایلگه قیلغونچه اؤزومگه.
813
قیو جسمی که، آنینگ صحّتی یؤق
قیلورغه تینگری امرین قوّتی یؤق.
814
قناعت چشمۀ دورکیم، سووی آلغان بیلن قورومَس و مخزنیدورکیم، نقدی سَنه ماق بیله اؤکسومس و مزرعۀ دور کیم تخمِ عزّت و شوکت بَر بیرور و شجریدور که، شاخی استغنا و حرمت ثمر کیلتورور.
815
قابلغه تربیت قیلمه ماق ظلمدور و ناقابلغه تربیت حیف.
816
قابلغه تربیت ایرور اول نوع کیم، گهر،
توشسه نجاست إیچره یوغی انی کیمسه پاک.
گر إیت اوزومیغه کیشی مَی بیرله بیرسه سو،
بو تربیت بیله قیلسه آلغه یمو انی تاک.
817
قوی دشمن زبون ینگ بؤلسه، مروّت قیل، کرم عفو کؤرگیزگیل.
818
قرداشینگ ایمس اول که، قؤیوب باش سنگه،
دولت چاغی قیلغی اؤزنی قؤلداش سنگه.
کیم قیلدی قـتیغلیغده وفا فاش سنگه،
اول بؤلدی حقیقت إیچره قرداش سنگه.
819
قیسقاردی حیاتی غم إیچین یارغان نینگ،
عمری اوزون اؤلدی رنجی قیسقارغان نینگ.
820
قری کیشیگه، بیل که، کم ایمسدور درد،
یوز صحّتی بؤلسه، قریلیق بسدور درد.
821
قیلیب صلاح عمل کسب شعارینگنی صلاح ایتگیل،
ولی فساد خیالینگ بیرله هر دم فساد ایتمه.
822
قسمدین آرتوغ تیلب، خوار ایتمه اؤزنی، ای عزیز،
کیم، قناعتدیندورور عزّت، طعمه دین برچه زول.
823
قضادیندور منگه عشق اؤئنه ماق، ای ناصح ِنادان،
کؤروبسین مو کیشی هرگزکه، تغییر قضا قیلمیش.
824
قیرغاول قارده یشینغان کیبیدور عیبلرینگ،
ایلگه بس ظاهر اگرچه، سین ایترسین اغماز.
825
قوانمه دولت حسنینغه، ای پریوش کیم،
زمانه دولتیدیک یؤقتور اعتباری انینگ.
826
قؤیمه کؤنگلونگی دهرنینگ ایسکی رباطیغه،
سایرگه چون محلل ِ اقامت ایمس رباط.
827
قؤی دور و فیروزه بحثین کیم، نجوم ِچرخنی،
نیلوفر برگی اوزه شبنمچه کؤرمس همّتیم.
828
قیلسه بیراو همنفس و یارلیق،
بؤلغوسی کؤپ غمغه سبک بارلیق.
809
قولاقده اسره گرامایه سؤزنی-یو، فکر ایت-
که، دُرسیز اؤلسه، نی بؤلغوسیدور صدف حالی.
سؤزونگنی داغی کؤنگول إیچره اسره غیل کیم، حیف،
کیم، اؤیله دُرجنی گهردین ایتکه سین خالی.
830
قیسی بیر کاتب که، اول سؤزگه قلم سورگی خلاف،
اول قرا یوزلوک باشی بؤلسون قلم ینگلیغ شکاف.
831
قریلر خاطری نازکدور، ای طفل،
شکستیددن قیلیب وهم، اؤلمه گستاخ.
اونوتّینگموکه، اطفال اؤینه غانده،
سینر آز مَیل کؤرگندین قوروق شاخ.
832
قلب امراضی نینگ مدّعاسی کؤپ دیمَکدور.
833
قناعت طریقغه کیر، ای کؤنگول-
که، خم اؤلغی آئین عزّت سنگه.
834
قیس نامراد إیلیگی صبر ایته گیگه اوردی کیم، مراد تاپمه دی قیسی گرفتار کؤنگیل صبر بدنیغه قؤیدی کیم، کشاد تاپمه دی.
835
قری کیم، قیلغی رعنالیق، طفلیدور نابالیغ.
836
قیلمه اولوس ارز و عِیالیغه قصد،
ائله مه ایل جانی-یو، جانیغه قصد.
837
قیسی عصا حیله اوییگه ستون،
کاش سینیب، اول اوی أیقیلغی نگون.
838
قارنینگ بیرله دوست بؤلمه سنگ احسندور،
نیوچون که، ایل اؤغلیغه قارین دشمندور.
839
قورور چون گلستاندین ائریلدی گل،
که بیر لقمه ایت( گوشت)دور، بدن سیز کؤنگول.
840
قویاشلیق إیسته سنگ، کسبِ کمال ایت،
کمال ار کسب ایترسین، بی ملال ایت.
841
غفلت ارا خوش کؤریبان خوش دیمه،
واقف اؤلوب، سؤنگره پشیمان یمه.
842
غافل اؤلمه نظردین إیتسه عدو،
شمع اؤچورگنده، ایل کؤرینورمو؟
843
غالب دشمندین هردم غافل قالمه،
اؤچیرآلمس عصیان اؤتین اؤز حرمینگّه سالمه.
844
غریب قصّه ایرور عشق کیم، توگنمه دی هیچ،
اگرچه بؤلغه لی عالم بناسی ائتیله دور.
845
غربتده غریب شادمان بؤلمس ایمیش،
ایل انگه شفیق و مهربان بؤلمس ایمیش.
آلتون قفس إیچره قیزیل گل بوتسه،
بلبلغه تیکندیک آشیان بؤلمس ایمیش.
846
غرور حسن إیله جاهینگغه قیلمه کیم، قالمس،
جمال عالمی یوعالم اهلی نینگ جاهی.
847
غیبت دیگوچی- نجاست یگوچی.
848
غالب دشمن زبون نینگ بؤلسه، شاد بؤلمه و إیشی اندیشه سیدین آزاد بؤلمه کیم، سیایتده تحمّل واجبدور و رعایتده تأمّل.
849
غنی غه چاپان کیئیمک انداقدورورکیم، مفلسقه اطلس و کتان کیئمَک.
850
هر امرکه بؤلسه، غایتی بار،
هر مهلیکه نینگ نهایتی بار.