نوایی حکمتلری
*************
(بیر مینگ اؤگیت)
701
چون عمر اؤتر، بوکون اؤزنی نشاط إیله خوش توت،
که، تانگله نفع یتورمس، دریغ إیله افسوس.
702
چرخدین هر نرسه کیلسه، خوش بؤل کیم، سینینگ کؤنگلونگ اوچون،
ائلـــــــه مــس دورینـــــــــی هــــرگــــز گنبــــــــــدِ دوّار بـــــــــــــس.
703
چو تاپماغونگ بو چمن غنچّۀ گلیدین وفا،
تؤکولمه غنچه کیبی، لیک گل مثللیک آچیل.
704
شاه انی بیل کیم، باشی قلپاقده،
بذل ایتر آفاق بیرور چاقده.
705
شاه بیر شعلۀ فروزنده دیر،
هر کیشیگه یتیشسه سؤزانده دور.
506
شاِم اجل اوییده یاتمس کیشی،
عمر کونی گورگه باتمس کیشی.
507
شاه یانین فرزین کبی کجلر مقام یتمیش نی تانگ،
راست رولر آره سینده گر توتسه لر روحدیک قیراق.
708
شمع یاریتور اوی إیچ و تاشینی،
اوی ایگه سی کؤپراق اوزور باشینی.
709
شاد انی بیل دهرده کیم، غم یمس،
دهر إیشی چون غم یگه لی ارزیمس.
چون که، جهان باغی وفاسیز ایرور،
عمر گلی انده بقاسیز ایرور.
710
شجر کیم، جز لطافت شیوه سی یؤق،
اؤتون اؤرنیده دور گر میوه سی یؤق.
711
... شه لیق اؤزگه دور، عاشیقلیک اؤزگه.
712
شهغه همّت پست اگر بیردی خدا،
خوشراق آندین همّتی عالی گدا.
713
شهوت پرست- نفسغه زیردست.
714
شاهدین هم لطف مرغوبدور، هم سیاست مطلوبدور، اما هر بیری اؤز محللیده خوبدور. بس، انگه دوستدین دشمنّی فرق ایترگه کؤپ ملاحضه کیره ک و فراصت و یارنی اغیاردین آئیرورغه کؤپ تجربه کیره ک و سیاست.
715
...شرر بیرله بؤلور سوخته نینگ نسبتی کؤپ.
716
شمع اگر پروانه نی اؤرت، اؤزی هم اؤرته نور.
717
... شررلر شعله نینگ فرزندیدور.
718
شاد انگله مس اولوسنی بیراو بؤلسه قیغولوق.
719
شباب نینگ هوسیدین ساقالنی رنگ ایتمه،
آقرسه سبزه، ینه کؤکرمس نی امکاندور.
720
ای که، کؤنگونگ سرّینی إیسترسین که، پنهان إیسته سنگ،
دهر باغی إیچره آچمه غنچه دیک زنهار آغیز.
721
ایرمس اول فرزانه کیم، ترک ایتّی دنیا حاصلین،
بل که حاصل قیلغی میل ایتمه گن فرزانه دور.
722
ایل پایه سین انگلی دیسنگ ایسنگ، اسرارینی بیل،
کؤنگولده گی مدّعاسین اظهارینی بیل.
قلبیغه کؤره تشی نموارینی بیل،
مطلوبیغه باق و کیمسه مقدارینی بیل.
723
احسان که ایرور اندین که، کم بیداد،
اؤز یریده قیلمه غیدورو هم بیداد.
724
ای نوایی، سیندیک ایتگن ضایع ایامّ ِشباب،
سودی یؤق انم کیبی اشک و ندامت شامِ شیب.
725
ایشک آللیده زعفران خوب ایمس،
که نادانگه زربفت مرغوب ایمس.
726
ایکسه غنی تخم، قیلیب ایلگه زور،
تخمینی تاراج قیلور خیل مور.
727
ایل إیچره، ای حسود، قیلدی حق ذلیل،
کیم نا حق ایلگه ضدسن-او، حق مالیگه بخیل.
728
ایل قاچسه بیراودین ایل یامانی بیل آنی،
احوالیده ادبار نشانی بیل آنی.
729
ایلگه شرف بؤلمه دی جاه و نسب،
لیک شرف کیلدی حیا و ادب.
730
ایرور سین شاه- اگر آگاهسین سین،
اگر آگاهسین- شاه سین سین.
731
ایل مالین اؤزونگّه مال بیلگیل،
خیلین اؤزونگه عِــیال بیلگیل.
یعنی نیچوک اسره لور عـِیالینگ،
محفوظ نیچوک که تورسه مالینگ
انداق باری ایل عــِیالین اسره،
اؤغرودین امانده مالین اسره.
732
ایر کیره ر ایر سانیغه همّت بیله،
ایر ایمس فخر ائله غان زینت بیله.
734
ایرگه خُلق و فعل ایرور زیب و کمال.
735
ایلگه نی کیلسه، ائه مس پند،
اول که، کؤنگلونی قیلدی غفلت بند.
کیم که پند آلدی ایلگه توشگندین،
آنی بیل کیم، ایرور سعادت مند.
736
ای که، بیر إیشده حاجتینگ بؤلسه،
یخشی یوزلوقدین إیسته بخشایش.
تاکه بخشایشدین اول راق،
کؤرمه گیدین یتوشگی آسایش.
737
ای خوشا اول که، عیب کؤرمه مَک بیله،
باش اوزه ایلتیبان نگون قیلغی.
پهلوان آنی بیل که، یتسه غضب،
نفس امّاره نی زبون قیلغی.
738
ای خردمند عالمی که، سنگه،
علمدین روزی ائله دی صانع.
کیشی اؤرگنسه، قیلمه غیل محروم،
یاکه نفع، بؤلمه غیل مانع.
739
ایشک اونیدین قولاقّه آزاردور، اندین اؤزگه نی عیب باردور؟
740
ایر کیشی کؤپ یسنسه، بیوه بؤلغی، بو صفت ضعفالرگه شیوه بؤلغی.
741
ایر کیشی کیم، کؤپ یسنغی، خرد اهلی انینگ عقلیدین اؤسَـنغی.
742
ایر کیشیگه زیب و زینت حکمت و دانشدورور،
اؤز عیبینی فاش ائله گه لی تیل اوزاتور، بیل.
743
احسان تیریکلیکده یخشی آتدور، اؤلگندین سؤنگ دوزخ عذابیدن نجات.
744
ایسکی چاپان بیله فارغ توفراغده اؤلتورماق یخشی راق کیم، زربفت خفتان( ساوت، زره) کیئیب، بیراو آلیده تورماق.
745
ایلگه قؤشیلغان آرایش تاپتی، ایلدین اوزولغان آسایش تاپتی.
746
ایمس افلا ک و انجم حالی بی نفع و ضرر، لیکن،
انی تینگری بیلور، ایرمس منجّم بیلماغی ممکن.
747
ایمگک تارتیب علم اؤرگنگن خردمند.
748
احسان هر نیچه زیب ِانسان کیلدی،
احسانده طرب إیکِنچی احسان کیلدی.
749
احسان که قیلور سین افتخار ائلب آنی،
عالمده اولوق إیش اعتبار ائلب آنی.
هیچ ائله مه ایلگه گیرودار ائلب آنی،
قیلغیل إیکی آنچه اعتذار ائلب آنی.
750
ای کیم، قیله سین جلوه یو عشرت چاغی زیب،
مستحسن ایمس ایل کیشی نینگ قیلماغی زیب.
گر بؤلسه إیشینگ کؤپراگی یا آزراغی زیب،
ظاهردین ایرور ستوده باطن داغی زیب.