نوایی حکمتلری

(بیر مینگ اؤگیت)
651
فرد کیشی دورده تاپمس نوا،
یالغوز آووچدین کیم ایشیتمیش صدا.
652
فسق باری طریقده یاماندور و پارسالیق لباسده یامانراق.
653
فلک عروسیده یؤق مهر و دلربالیق کؤپ،
نیچوک که، حسن و جمال اهلیغه وفا بیله ناز.
654
فاسقدین حیا تیله مه، ظالمدین وفا تیله مه.
655
فکر ایتیب بیلمان نی نوع ایرکین کؤنگول خرّملیغی،
کؤرمه دیم هرگز سینی بیردم چو خرّم، ای کؤنگول.
656
فلکدین یخشیلغ یتگی دیبان کؤنگولگنی شاد ایتمه،
یامانلیغ کیم یتر، حالا اونوت، اؤتگنّی یاد ایتمه.
657
فرزنده اتا قوللوغین چو آدم قیلغی،
اول آدم إیله کسب سعادت قیلغی.
هر کیم که، اتاغه کؤپ رعایت قیلغی،
اؤغولدین انگه بو إیش سرایت قیلغی.
658
خام طمعه دهرده رنجوردور.
659
خیر میسّر گر ایمس ایل(قؤل) بیله،
نفع یتورماق هم ایرور تیل بیله.
660
خلایقّه کؤرمه قیلیب بینوا،
اؤزونگه روا کؤرمه گنّی روا.
661
خلیق اؤلغان سخیدین ایلگه یتگی إیکّی بخشایش،
هم احسانیدین آرایش، هم اخلاقیدین آسایش.
662
خردمند چین سؤزدین اؤزگه دیمس،
ولی، بارچه چین هم دیگولیک ایمس.
663
خوب کیم، یؤقتور شمایل بیرله شیرین سؤز انگه،
صیدی بؤلمس ایل، نیچه کیم، بؤلسه زیبا صورتی.
664
خودپسند - نا خردمند.
665
خوشا اول که، عالمده گر چیکتی رنج،
ینه عالم اسبابیغه تاپتی گنج.
666
خوش اول کیم، کؤنگلوگه کشاد إیسته بان،
قؤپوب عزم قیلغی مراد إیسته بان.
667
خرد دهقانی مونداق نکتۀ دیر-
که: « دانه ساچقالی یخشی کیره ک یر».
668
خطادین خالی ایرمس آدمیزاد،
ایرور حق إیشده سهو ایتماقدین آزاد.
669
خزان سپاهیغه، ای باغبان، ایمس مانع،
بو باغ تامیده گر إیگنه دین تیکن قیلغیل.
670
خارسیز گل دهر باغی إیچره نی امکان ایرور،
671
خرده دان بؤلمس کیشی نازک تخیّل قیلمه ئین.
672
خلاص ایرمس کیشی هر حال بیله تینگری قضاسیدین.
673
خلق ارا یخشیراق، دیدینگ، کیمدور،
ایشیتیب ائله شبهه رفع اندین.
یخشیراق بیل انی اولوس ارا کیم،
یتسه کؤپراق، اولوسقه نفع اندین.
674
خوب ایل بیله صحبت توتیبان خوب اؤلغیل،
یخشینی طلب قیلغیل و مطلوب اؤلغیل.
شیرین سؤز إیله خلقّه مرغوب اؤلغیل،
یوشاق دِی حدیثینگنی یو، محبوب اؤل.
675
خودپرست- بُت پرست.
676
خودپسند- إیشی ایلگه باری ناپسند.
677
خردمند مخالفتدین قاچر موافقتغه ملایمت ایشیگین آچر.
678
خیر سیز غنی- یاغینسیز سهاب و عملسیز عالم- دابّه یی که انگه یوکله گیلر کتاب.
679
خوش گوی کیم، سؤزنی رفق و مساوا بیله ائتغی، کؤنگولگه یوز غم کیلتورغان بؤلسه، انینگ سؤزیدین قئتغی.
680
خوش سؤزگه کیم اؤلسه مست و بیهوش،
شربت ارا زهرنی قیلور نوش.
681
خوشا اول که، عمرین تباه ایتمه دی،
قیلور إیشلرین قیلمه ئین کیتمه دی.
682
خاره غه هر کیشی کیم، دُرّ ثمینّی اورغی،
خرد انگلرکه، قیو بیری بیرینی سیندورغی.
683
خردمند پندینی کؤرگن اچیغ،
سؤنگیده پشیمانلیغی نی سود؟
684
خرد اگر بؤلدی ایرسه چاره پیوند،
نتیجه چاره دین تاپقی خردمند.
685
خوارلیغلر باشی طمع بیلگیل،
دایما عزّه من قنع بیلگیل.
686
خوب أیرتوق تؤن بیله هم خوب.
687
چو دشمن اؤلدی قدیمی، زیاندین حذر ایت،
اگرچه نطقی روانبخشی جانگه راحت ایرور.
688
چونکه سوپورگی أیغر، اینک دلیل،
یاتماق ایشیک کینیده خوار و ذلیل.
689
چون سینسه کؤنگول زخم زبان آغریغیدین،
کم ایرمس انینگ آغریغی جان آغریغیدین.
690
چو ایلگه بیرور پرورش روزگار،
کیره ک انداق-اؤق بؤلسه آموزگار.
691
چون نوایی کؤنگلی سیندی، ایندی لطفونگ نی آسیغ،
کیم اوشتسه شیشه نی، بوتمس ینه پیوند إیله .
692
چون طبعی ملایم بؤلور اؤرگنگه لی مایل،
آز وقتده کؤپ نوع قیلور کسب فضایل.
693
چیکسه دشمن سینینگ صلاحینگه تیل،
محض افساد بؤلغوسیدور بیل.
694
چونکه طمع بؤلدی گدالر إیشی،
بیل که، گدادور طمع ایتگن کیشی.
695
چمنده سرو، بس، رعنا شجردور،
یؤق اندین نفع، چون کیم بی ثمردور.
696
چین سؤز- معتبر، یخشی سؤز- مختصر.
697
چیکمه کؤپ رنج، نوایی که، کیشی تاپمه یدور،
اؤزیدین خلقنی مرعات ائلب.
698
چون ازلده هر نی قسمت بؤلدی- کؤرمی چاره یؤق،
خلق اؤز کامین اؤزیدیکدین تولاسی نیدور؟
699
چرخ مکرو فتنه سیدین غافل اؤلمه نگ زنهار،
چونکه، بو شاهد بسی فتّان ایرور، مکاره هم.
700
چون غرض سؤزدین ایرور معنی انگه،
ناقل اؤلسه، خواه خاتون، خواه ایر.