اوخله مس شهرنینگ توشلری
----------------------------
تورانتودن نیویارکّچه
--------------------
(سفرنامه)
2

کانادا چیگره سیدن چیقه یاتگنده بیزنی هیچ کیم تیکشیرمه دی. مین کؤرگن مملکتلر چیگره سیده گی احوالدن فرقلی اؤله راق، معلوم بؤلیشیچه امریکه و کانادا قانونلریگه کؤره، إیکّی اؤلکه دن چیقه یاتگنده یؤلاووچیلر باجخانه و پولیس تیکشیرویدن اؤتیشمس ایکن. فقط گینه شو مملکتلرگه بیریدن -بیریگه کیره یاتگنده مسافرلر تیکشیرودن اؤتیشلری شرط.
امریکه چیگره سیدن اؤتیشگه چاغله نیب توریبمیز. بیر بخیه نریده اینگ قدرتلی دولتنینگ یولدوزلر توشیریلگن آق، قیزیل و ماوی توسده گی بیراغی هیلپیره ب توریبتدی. هَیداووچی میگابوسنی باجخانه یانیگه آلیب باریب، تقه تؤخته تدی. بس غیر-غیرلب توره بیردی شو جایده. طلبه لیک دوریمده آمو دریانینگ إیکّی قیرغاغیده گی باجخانه و چیگره چیلرنینگ آبدان تیکشیریشی ایسمگه توشیب، بو یرده هم مبادا شونده ی بؤلمه سه-یه! دیب، -نفسیم إیچیمگه بیقیب کیته دی. اؤشه زمانلر بیر-إیکّی چمدان یوکنی، گپ ایشیتیب، قاش و قباقلردن اؤتیب، إیت عذابی قیلیب، منزلگه ارنگ آلیب بارگنمن. بکس ته شیش عاقبتیده قؤللریم قبرگه نی، إیکّی ایلکمگه توشگن زلوارلر آغریغیدن هفته لب اؤزیمنی اؤنگلب آلی آلمه گنلریمنی ایسله سم یوره ک آرقه گه تارتیب کیته دی. راستینی ائتسم اؤشه کونلردن 30 أیل اؤتیبدیم که، قؤللریم کفیگه گزه کلی دردلر همان یورمه له یدی و زیر-زیرلب آغریدی قؤللریم.
بو سفریمیزده اگرچه اونچه لیک آغیر یوکلریمیز بؤلمه سه-ده، بارلرینی یم، آرت-توشر قیلیب یوریش، اوزاقّه باره دیگن یؤلاووچی اوچون هرنه ملال ایمسمی؟ یؤق اونده ی بؤلمه دی. عکسینچه بیز میگابسده اؤره توردیک. اؤشه آزغیندن کیلگن کیکسه هَیداوچی 50که یقین یؤلاوچی نینگ بکسلرینی بیر اؤزی بیر-بین-کیتین توشیریب، اؤزی یورار تسمه اوستیگه اوزه ته بیردی. بیز اؤن بیش دقیقه إیچیده میگابسدن توشیب، چمدانلریمیزنی سودره ب باجخانه ضابطلری تامان یؤنه لدیک و پولیس قاشیگه باریب توریب آلدیک. بیش کیشیلیک عایله بؤلیشیب، پاسپورتلریمیزنی چیگره چی پولیسگه توتقزدیک. بیز بیلن کیلیب چیقیش افریقالیک، روندا مملکتیدن کیلگن بیر قاره چه قیز هم همسفر ایدی.
- کانادالیک میسیزلر، دیب سؤره دی پولیس.
- هه،-دیب جواب قیلدیک.
- بیر عایله میسیزلر؟-دیه سؤره دی او انگلیسچه لب.
- هه! دیب جواب قیدلیک.
- قیزیق!! بیشته نگیز آق، بیتّه نگیز قاره-کو! شونقه سی یم بؤلرکن-هه! دیه شیرین جیلمه یدی پولیس، هزیلله شماقچی بؤلیب.
اؤن أیلدن بویان قدردان بؤلیب کیتگن ریئسه اسملی بو قیز اؤزبیک تیلیدن إیکّی سؤزنی بیلردی. مینی آته، باله لرنینگ آنه سینی ایسه، آنه، دیب چیقراردی.
- بیز هم کولیمسیب...شونقه جواب قیلیب -آق، سفرداشیمیزنی ته نیشتیردیک.
- قی یرگه باره سیزلر؟- سؤره دی پولیس.
- نیویارکّه باره میز، دیدیک.
- نیچه کون توره سیزلز؟ عادی قیافه ده سؤره دی او.
- بیر هفته،-دیدیک.
بار -یؤق 3 دقیقه إیچیده پاسپورتلریمیزنی قؤلیمیزگه قئته ریب ردی پولیس. سؤنگ بکسلریمیزنی تارتیب، سکن ماشینه گه قؤئیدیک. چمدانلریمیز لایزر تیکشیرویدن اؤتدی. بیر په سده برچه یؤلاووچیلر باریب- اؤز اؤرینلریگه جایلشدیلر. بَسیمیز یؤلگه توشدی. عذاب کؤرمه دیک، معامله یخشی بؤلدی. خوش-خورسند سفریمیزگه دوام بیردیک. امریکه چیگره سیده بیزنی چؤنتکلریمیز، إیچ کیئیملریمیز، بکسلریمزنی هیچ کیم، پی په سلب، تینتیب کؤرمه دی. ایزیلیب بکس ته شیب هم اؤتیرمه دیک. قیسقه وقت إیچیده امریکه توپراغیگه کیردیک. شونده ی بافولا دیگن شهرنی کیسیب، هوا قؤنه لغه سینی ائله نیب ،کتّه یؤلگه چیقیب آلدیک.
کانادا و امریکه مملکتلری کؤپ تامانلمه بیر-بیریگه اؤخشش دولتلر. هر إیکّله سی دموکراتیک دولت؛ صناعتی ترقی تاپیب راسه رواجلنگن؛ شمالی قطبنی حسابگه آلمه گنده جغرافی تاماندن هم اولر اؤرته سیده بیر خیل اقلیم حکم سوره دی. بافولا شهری کانادا چیگره سی بؤیلب جایلشگن. بو یرده بیش یوزمینگدن آشیق اهلی استقامت قیلیشه دی. شهر کؤرکم، انچه آبادانلشتیریلگن، آسمان اؤپر بنالر نیویارک همده تورانتوشهرلرینی ایسله ته دی. نیویارکّه قره شلی کیچیک بیر شهر شوقدر رواجلنگنی آدم تصوّردن تشقری حالت. قویاش کون باترگه آغیب باره یاتیر. تیکیسلیکده جایلشگن بو شهر یم-یشیل ارمانلر و ایکینزارلرگه بورکه نگن. شهرده قئناق حیات نفسی حکمران. هر کیم اؤز تیریکچیلیگی بیلن بند. کوچه لر تازه، روان یؤللر بؤیلب آغیر-اینگیل ماشینه لر آقیب بارماقده. یؤل یاقه سیده فارملر جایلشگن... هوا 25درجه نی کؤرسه تیب توریبتدی. کؤک بغریدن ماموقده ی- ماموقده ی بولوتلر چـَیقه لیب- چــَیقه لیب سوزماقده ایدی. دوامی بار...
قیزیقدن-قیزیقدن واقعه هلی آلدینده...