بالگینه اؤته آنگلی و عقللی- قیز. اسمی هم باشقه لرنیکیگه اؤخشه مس؛ یوریش- توروشی-ده، اؤزیگه خاص. ایرکنی، آزادلیکنی جانیدن هم یخشی سیوه دیگن- قیزلردن. آیدینلی بیر عایله ده توغیلگن. هر نرسه گه شبهه- گمان بیلن قره شنی یخشی کؤره دی. کؤپچیلیک نینگ فکریگه قؤشیلمسلیک، اؤزگه چه فکرلش، عنعنه وی تورموش طرزیگه اؤی سیتیب(تنقیدی) کؤز سالیش اونینگ جانی بیلن قاریلیب کیتگن ایزگو عادت دیسه بؤله دی.
بالگینه اؤن إیککینچی صنفنی بیتیریب آق، اؤزی یشب تورگن
شهرده اونویرسیتیگه اؤقیشگه کیرگندی. درسلرنی یخشی اؤزلشتیره دی، شخصی مطالعه سی
اونی جوده یم معنوی یوکسلتیرگن. درس چاغیده استاذلرنی سوالرگه کؤمیب تشه له یدی.
بعضن سؤراقلریگه جواب تاپه آلمی، إیچیدن بیزاوته لنه دی. خوددی، کؤنگلیده ایسکی بیر دردنی
توگیب قؤیگنده ی. برچه نینگ اعتبارینی قازانگن؛ صنفداش و اؤقیووچی لرنینگ ارداغیدن
جای آلگندی. اونویرستیت نینگ ایرکه سی هم سیرکه سی هم انه شو بالگینه بؤله دی دیئیلسه مبالغه بؤلمه یدی.
او بیرینچی کورسنی توگه تیب، إیکنچی کورسنی هم یریملب بارماقده ایدی.
سوو سیپیلگن دوکان رسته لری بؤیلب، ناجو درختلر کؤلنکه سی
آستیده هر کونی اؤقیشگه باریب کیله دی. ایسی-هوشیدن کؤره یم کؤرکی-او، جمالی
جانیگه بلا بیتگن. یؤلده کیته یاتیب إیلماقلی گپلر، باله لرنینگ تیگه چاغلیگی،
آرقه سیدن اوشتک چه لیشلر، ائریملرده اوستی-باشیگه سوو سیپیب قاچیشلر-کو بار نرسه.
بولر عادتی حالگه ائلنگن.
بالگینه تقدیرگه تن بیره یاتگنلردن ایمس. او چیندن هم بونده ی بیزاریلیک و تؤسیقلرنی اینگیب اؤتیشگه جزم قیلگن. بولر ایمس،بیراق بالگینه نی باشقه نرسه قئینه یدی. اونینگ تینچینی بوزگن بیردن بیر نرسه استاذی نینگ زوغومی. صنفده استاذی نینگ دغدغه سیدن جانی بؤغزیده تیقیلیب توریبتدی. کؤچه دَیدی باله لرنینگ شوملیکلریدن کؤره، استاذی نینگ گپلری آشیب توشگن. نیمه بؤلسه هم بالگینه تیشینی تیشیگه قیسیب، بو کونلرگه زورغه چیده ب یششدن اؤزگه اعلاجی یؤق. باشیده، بو احوال و کؤرگولیکلرگه بالگینه جوده کؤپ اچیندی، کویدی، یاندی. آخری إیچیده قه له شیب یاتگن أیغی-درد، کؤزیگه قلقیب چیقدی... بؤله یاتگن ماجرالرنی آته -آنه سیگه سیر بیرمی کیله دی. اؤز غمیگه یقینلرینی هم مبتلا قیلیشنی إیسته مه دی. اوزون قولاق گپ-سؤزلردن اونچه-مونچه سی آته-آنه سیگه الـله قچان یتیب بارگن. بالگینه اوچون قوانرلیسی شو ایدی که، اونی آته-آنه سی قیسووگه آلیشمه سدی؛ تیرگه شمه سدی. اؤ اؤجر قیز، بیراونینگ یتاوگه بؤئین بیرمه ی، حیاتده جدّی کوره شماق اونینگ- مقصدی. قیئینچیلیکلرگه بؤین ایگیب، بیراوگه قره م بؤلیب قالیشنی هیچ پئت خواخله مه یدی. شخصیتی سینب، پرچه له نیب کیتیشدن قؤرقه دی. او میلونلرچه قاره بخت اسیرلر صفیگه ینه بیر بختسیز عیال کیلیب قؤشلیشیدن هدیک سیره یدی. شورلیکلر گه تن بیریب، ایزیلیش، تاپته لیش و خؤرلیک حسابیگه جمعیت بیلن یؤل باریب، ماسله شیب یشش ممکن البتته. لیکین، بونی او إیسته مه یدی، خیالیگه هم کیلتیره آلمه یدی.
باردی تیوره-گ اطرافیده بؤله یاتگن دؤ-دؤگپلرنی اکه سی یؤلبرس بیلسه بارمی؟ برچه نینگ آغزیگه چیم قؤیه دی. هیچ نرسه بؤلمه گندیک همّه یاقنی تیکیسله یدی. درّاو سوو سیپگنده ی جیمیب قؤیه دی قاله دی. امّا، بالگینه یالغیز اؤزیگه إیشانه دی. اؤزینی کتته کوره شلرگه شـَـیله ماقده؛ إیچیدن شونگه یتیلیب توربتدی. کؤزیدن کوچ یاغیلگوده ی بؤلیب، ضمیریده گی هیجانلر اؤتکیر سؤزلرگه ائله نیب، تیلی نینگ اوچیده توریبتدی. خاتین-قیزلرنینگ باشیگه کیلگن، قاره کون و بخت سیزلیکلرگه قرشی کوره شماققه بیل باغله گن. بالگینه:« نیمه گه خاتینلر یریم آدم حسابله نیشه دی؟»؛ «میراثگه، گواهلیککه شونده ی»؛«خاتینلر نیمه گه ایرککلرنینگ ایکینزاری و...» شونگه اؤخشه گن سؤراقلرگه جواب تاپه آلمی ایزیله دی...
او بیر قـــَـری آققینه لچکچه سینی باشی نینگ یریمدن ایلکه سی تامان سالدی-ده، سینگیلچه لری نینگ اویلریگه کیریب، بیر-بیر یوزیلردن شیمیریب اؤپدی، خیرلشدی. سؤنگ آنه سینی نینگ بؤینیدن قوچاقله گنچه اؤپرکن، «خیر آنه جان، سیز هم یخشی قالینگ! آته جان سیز هم خوش قالینگ!»- دیه ، إینجه برماقلرینی هواده سیلکیتیب خیرله شدی و کؤچه ایشیگینی یاپیب، اؤقیشیگه جؤنب کیتدی. آنه سی هم «آی باریب، آمان کیل باله ام!»-دیه إیستکلندی.
آره ده إیککی چَقیریمچه لیک یؤل بار. اورتاقلری سیز باریب کیله دی یپتی اؤقیشگه... اونویرسیتیت نینگ صنفگه کیریش قؤنغیراغی چه لیندی. «ایبئی کیچیکدیم»-دیب شاشیلدی او. چقان-چقان یوریب باره یاتگن بالگینه بوساخه هتلب بیلیم یورتی نینگ إیچکریسیگه کیردی. سوو سیپیلیب، چنگلر یاتقزیلگندی. یکّه یریم قیزلر، باله لر کیچیکیب راق بؤلسه-ده، صنفلریگه کیرماقده ایدیلر. بالگینه احتمال صنفگه کیره یاتگن سؤنگگی اؤقیووچی ایدی. طلبه لر یؤقله مه قیلینماقده. صنف ایشیگیدن ایندی آدیم باسیب، "سلام" قیلیب کیره ی، دیب ایدی یم که، تخته ده بیر نرسه لرنی یازیب تورگن استاذ آرقه گه تیسه ریلیب غضب بیلن بیر بقره یدی. شو پئیت بیرگینه قیزغیش، مَلله، ماوی -یشیل کپه لک، لنگ آچیق دیره زه دن صنفگه اوچیب کیردی. باله لر قئی -چوو سالیشیب، قؤللریگه کتاب، دفتر کؤترگنچه، بوگینه شوخ کپلکنی اوشلب آلیشگه توتیندیلر. بیراق، کپه لک توتقیش بیرمی، صنف نینگ بیر بورچه گیده إیلینیب قالدی. اؤشه یردن درسنی کوزه ته یاتگنگه اؤخشب، تیپه دن قره ب توره بیردی. بالگینه شاشه -پیشه صنفگه قره ب یوزلندی:
- کیرسم میلمی استاد؟ - اجازت سؤه ردی بالگینه.
- تؤخته، جاینگده توره تور!- دیدی استاذ دؤق آهنگده، روپــَـکده ی ماش و گوروچ ساقالینی توتمله یاتیب.
- مین اؤقیشگه کیلدیم، درس اؤقیشیم کیره ک استاذ،- جواب قیلدی بالگینه.
- یؤق! کیرمی سن دیدیممی؟- آغزیدن توفیگی سچره ب،- گپ بیتته بؤله دی.
- نیگه کیرمسلیگیم کیره ک استاذ؟- دیدی-یو، بالگینه نینگ کؤنگلی چؤکیب، کملیگی کیلیب کؤزیگه یاش ائلندی. بیر پاس اؤیگه تالدی و اؤقیتووچی سیگه کیچیکتیرمی درّاو جواب قئیتردی:
- مینینگ قدریتلریم، انسانیلیگیمنی آیاق آستی قیلیشگه حقینگیز یؤق. بیار-بیر نرسه حقیده اؤیلش و قرار چیقریش بو مینینگ إیشیم... ایندی کتته لردن، آقساقاللردن، جیگریگه الف کیرمه گن سوادسیز ساقاللردن ؛ دنیانی تار اؤیله یاتگن انه ونده یلردن،ـ صنف دیواری بؤیلب یاپیشتیریلگن آق ساققاللر مجلسی تصویریگه اشاره قیلیب،- اندازه آلیب یشش نینگ دوری اؤتدی. ایندی ساقال، تسبیح، آفتابه نی دستکلب آدملرگه عقل اؤرگه تیش، تاپشیریق بیریش... اؤتمیشگه تعللقلی. بیلدیزمی استاذیم!
- به آوو ایی! إیچینگ گپدن تؤله یاکن سین ...ننی.
- نیمه گه بیر یریم أیلدن بویان جوره ته سیز مینی؟-سؤره دی بالگینه.
- چونکی، ساچینگ کؤرینیب یاتیبتدی، حجابینگ یؤق سین قیزنی،-دیدی استاذ جون باسگن بیتینی سیئریب توریب.
- بیر اؤیلب کؤرینگ استاد! مینینگ چادره گه اؤره نیب اؤقیشگه کیلیشیم نیمه نی حل قیله دی؟ هیچ بؤمسه، شو عادّیگینه سؤراغیمنی توشونتیریب بیره آله سیزمی؟
- توشونتیریب بیره آله من-او، لیکن بونگه اذن بیریلمه گن-ده بیزگه.
- اسلامده «نیمه گه؟»، دیب سؤره لمه یدی هیچ قچان، بل که بویروله دی. دینیمیزده دلیل اؤتمه یدی. همّه نرسه آلدیندن بیلگیلب قؤئیلگن. جوابی هم آلدیندن ائتیلگن. اؤیلشگه حاجت یؤق،- غضبب و اچچیق یوزیگه تاشیب چیقنده ی،- مونچه ولدیره ی بیرمه، حق- حقوقینی ته نیگن قیز بؤلیب!
- اونده بو خدا بیرگن خام کلله نی نیگه کؤتریب یوریب سیز؟
- بو کلله نینگ ایگه سی بار، ایگه سی؛ اؤؤؤؤؤ تیپپه ده توریبتدی،-آسمانگه بؤئین جؤزیب قره رکن،- اونینگ امری سیز درختده یپراق هم قیمیرله میدی.
- سیز عقلینگیز ایشیگیگه قولف اوریب قؤیگن؛ آدم باله سی سوره ب-سؤره ب حقیقتگه ایریشه دی ایمسمی استاذ؟
- یؤق! دینیمیزده یالغیزگینه اطاعت بار! قالگه نی الله نی کی...
- خوش، دینده نیمه گه عیال ساچیدن مونچه لیک قؤرقیش بار؟ بیرار -بیر بوزغونچی لیک، غـَه له میسلیک یاکه، یاووزلیککه ایلتیووچی قنده ی دیر کوچ و قدرتی بارمی بو خاتین-قیزلر ساچ نینگ؟
- الله خشنود بؤلمه یدی بو إیشینگدن،- دیدی استاذ «توبه، توبه» قیلیب یاقه لرینی اوشله رکن.
- کیریشیم کیره ک، کیچره سیز استاذ. مین درس اؤقیگنی کیلگنمن.
- بو احوالده مینینگ درسیمگه کیره المه یسن خوبمی؟- بؤرلنگن برماقلری بیلن اینچه دیک قاپ- قاره ساقالینی سیله ی توریب،- مین حجابسیز قیزلرنی درسیمگه عمومن کیریتمی من. بو مینینگ الله بیلن قیلگن عهد و پیمانیم. ینه نیمه نی بیلماقچی بؤله سن هه؟ ایندی توشوندینگمی آیئمچه؟!!
- إیچیم قیسیله دی، تیرلب کیته من؛ یازنینگ جزیره مه گونلری سه سیدی آدمزاد. بیتابله نه من. یاپینچیق إیچیده آیاغلریم سودره لیب أیقیلیشیم ممکن. بیرار جاییم سینیشی هیچ گپ ایمس. گپینگیزده سیره منطق یؤق. افگار بؤلیشیم ممکن استاذ.
- یورگن یؤلنگده "الله الله الله"، دیب مینگ مرته تکرارله سنگ، أیقیلمی سن، جین هم چلمه یدی. قؤرقمه هیچ بلاورمه یدی سینی.
بالگینه بیلن اؤقیتووچی اؤرته سیده گی ائتیشیو دهلیزده بؤله یپتی. استاذ صنف ایشیگی یانیده، بالینه ایسه دهلیزده توریبتدی. آلدینلری هم بیر نیچه بار گپله شیلگن شو طرزده. بالگینه قیسته لیب؛ سؤز قاتدی:
- سیز ائتگنلر بو بیر ابسورد استاذ. قره نگ اخر، مینینگ حجاب کیئمه گنیم هیچ کیمگه خلخت بیرمه یدی-کو. عکسینچه، یاپینگنیم اوّلا اؤزیمگه معمّا توغدیره دی. قاله بیرسه، باشقه لرنینگ حرص و هواسینی قؤزغه تیشی ممکن. آدملر آچیق نرسه نی ایمس کؤپراق یاپیق نرسه گه تلپینیشه دیلر...
استاذ بیلن شاگرد اؤرته سیده بحث و تارتیشیوو تاباره قیزیب کیترکن، بالگینه ا"مین اؤز حقیم اوچون رخصت سؤره می من،- دیه اجازه تسیز صنفگه باستیریب کیردی. بوندن درغضب بؤلگن استاذ:
-کؤپ بلا مهمه دانه لیک قیلمه سین قیز!چیق، دیئمن صنفدن،-دیدی.
- گپیمنی ایشیتینگ استاذ. هوا إیسیق، دیم. مین باشقه لرگه اؤخشب تؤربه کیئیب، چادرگه اؤره نیب کیله آلمیمن اؤقیشگه. توشونه سیزمی مینی استاذ!
-او سنینگ إیشینگ، سینینگ پرابلیمینگ؛ مینگ دخلی یؤق بو نرسه لرنی.
استاذ بیلن بالگینه اؤرته سیده، صنف إیچیده سؤنگ صنف ایشیگی آلدیده بؤلیب اؤتگن گپ-سؤزلرگه اؤن سککیز دقیقه چه وقت اؤتدی. شو پئیت اؤقیووچی باله لردن کیمدیر«کیریبتدی ایندی، نیمه قیپتدی؟ کیره بیرسین اوستاذ»-دیه دؤنغییله دی. اوستاد بؤلسه، نیمه لرنیدیر اؤیلب، ایشیتیلر-ایشیتیلمس زورغه :« اونده کیر بؤمه سه یم»- دیگن سؤزنی تیلگه آلدی. کؤزلری آتیلیب چیققوده ی ایدی، استاذ باشینی إیرغیتیب، صنفگه کیر دیگه نیدن پشیمان بؤلدی. اؤزی اؤرنتگن قاعده نی بوزیش حسابیگه ایمس، بل که، قیزچه نی «یخشیلب توزلش» و «ایزیش و إیززه قیلیش» نیتیده صنفگه کیریشگه رخصت بیرگن بؤلدی اؤقیتووچی.
بالگینه سیکین کیلیب اؤز اؤریندیغیگه اؤرنه شیب آلدی. شو زمان تورله نیب تورگن ،کپه لک تیپه ده قؤیئنلب یاتگن یریدن اوچیب، بالگینه نینگ راپّه –راسه باشیگه قؤندی. سؤنگ گیر-گیر ائله نیب اوچه یاتگن کپه لک بالگینه نینگ ایکه سیگه؛ سهل اؤتمی هلی یازیلمه گن، آق کتابچه سیگه کیلیب قؤندی. بالگینه إینده مسدن کپه لککه تیکیلیب توره ویردی. نظریده کپلک گل-چیچکلر هیدینی، آزادلیک هواسینی صنفگه آلیب کیرگنده ی بولدی گویا. بل که، استاذنی انصافگه، عقل و فراصتگه چه قیرماقچی بؤلیب کیرگندیر گپلک. قیسقه گینه وقت إیچیده عصرلرگه تاتیگولیک معلوماتنی المشگن بؤلیشدی بالگینه بیلن کپلک. بالگینه نینگ سؤزلری کو، معلوم ایدی. بیراق، کپلک نینگ هم نیمه لرنی دلیده توگیب کیلگنی یریم عیان، یریم قرانغوبؤلیب قالدی، یاکه همّه سینی بالگینه توشونیب یتگندیر، افتیدن بیلینم سدی.
تیریسی سویه گیگه قه پیشگن، اوزون بؤیلی، سهل بوکریراق، بؤین تامری بؤرتیب چیققن- تنه سی قورت یگن تیره ککه اؤخشه گن استاذ درسینی تؤخته تیب، آغزی کفله نگن بیر کؤرینیشده وَیسب کیتدی:
- مین سینگه بیر یریم أیلدن بویان صنفگه حجابسیز کیرمه، دیب ائتیب کیلماقده من.سین بؤلسه اؤز بیلگه نینگدن قالمی سن قیز.
- بو گپلریزنی صنفده ایمس، درسدن تشقری گپرسنگیز استاذ.
- الله نینگ بویروغینی، ائتگه ینی "گپ" دیدینگمی سین هلی!
- جانیمگه تیگدی بیر یریم أیلدن بیری جه غیز تینمی ائتگه نیز ائتگن. میندن باشقه نی تاپمه دینگیزمی اؤزی استاذ گپیریشگه؟ نیمه مین سیزنینگ ارپه ینگیزنی خام اؤردیمی؟
- مین ائته من بولرنی. قیامتگچه ائته بیره من تاکه یاپینیب کیل صنفگه. بونی ائتمه سم الله نینگ حضوریگه قیسی یوز بیلن باره من اوُل دنیاگه؟ ای تیلبه، نادان قیز؟!
- حقارت قیلمنگ استاذ مینی. شو پئتگه چه حرمتینگیزنی سقلب کیلدیم. ایندی شرط- شرط جوابینگنیزنی قؤلینگیزگه بیره من. میندن خفه بؤلیب اؤترتیرمنگ تغین.
- ای عقلی کلته بدبخت. پیغمبر دشمنی، مینی یخشی بیلیب آلگین. آته منی مولوی«الف»دیگیچ ایدی. مین اؤشنده ی بویوک آدمنینگ اولادیمن. مین سینگه اؤخشه گن کافرلرنی تؤغری یؤلگه دعوت قیله من،- دیدی استاذی.
صنفده جیملیک حکمران. استاد قؤتیر بؤلگن تکه دیک اویاق- بویاققه هلاسلب، یوتونه آلمیسدن سؤزینی تیلیدن چیقره آلمی سرگردان. شو آره ده تشقریگه چیقیب، بیر-إیککی قور سیگریتینی یاندیریب، إیچینی توتوندن تؤلدیریب هم کیلدی.
- خلص صنفدن چیقه سن!-دیب دؤق قیلدی بالگینه گه استاذی.
- بو سیزنینگ شخصی مهمانخانه نگیز ایمس، دولتنینگ إیشخانه سی،- آیاغیده توریب، تاباره شجاعت بیلن هیجانلی حالتده جواب قئته ریشگه شاشیله دی،- مینینگ حجابده بؤلیش- بؤلمسلیگیم سیزنینگ وظیفه نگیز گه کیرمیدی خوبمی استاذ. اگر مینینگ یاپینمس لیگیم دولت اوچون کتته پرابلیم توغدیره یاتگن بؤلسه، اونده بو إیش بیلن شغیلله نه یاتگن تشکیلاتلر بار. سیزگه علاقه سی یؤق استاذ بو نرسه لرنی. هر کیم اؤز إیشینی بیلسین...
- سین قیز شک کیلتیرمه، کافر بؤلدینگ. بو گونآق، اوئینگگه باریب خیرات، صدقه قیل. سخی جانگه بیر نذرنی بؤئنینگه آل ابله.
بالگینه سداغیدن آتیلیب چیققن اؤقده ی استاذیگه ینه یوزلندی:
- اؤرگیلیب کیته ی یره تگندن. اؤز بویروغینی، سیر و اصرارینی بیز اعیاللردن یشیریب نیمه قیله دی؟ پرده آرتیده گی سیرلی صندوقچه سینی سیزگه اؤخشگن الـله قیسی کیر ساقاللی ایرککلرگه ائتگن-او کیتگن. بو سفسته گه قیسی اخماق إیشانه دی؟ ایم هههه!!! اصلا یالغان إیشانمی من بونقه تیلبه -تیسکری گپلرگه استاذ.
- کفر کیتینگدینگ سین قیز! سینلر الله نینگ قـُربیگه یته آلمیسیزلر، ناپاک سیزلر.
- حقارت قیلمنگ استاذ،-دیب ایدی هم که کپلک کؤتریلیب، بالگینه نینگ سؤل کؤکره گی اوزره قؤندی. تیلسیزگینه کپلک خوددی، بالگینه نینگ قلبیگه قولاق توته یاتگنگه اؤخشب جیمیب توریبتدی.
- قان کؤرگن کونلریز سیزلر بیلن حتاکه،گپله شیش حرام بیلدینگمی؛ صنفگه هم کیریتمسلیک لازم سیز افلاسلرنی.
- هه استاذ! سیزنی هم بیزگه اؤخشه گن بیر آنه دنیاگه کیلتیرگن بؤلسه کیره ک؟ یاکه، کؤکدن آسیلیب توشدینگیزمی؟ مین حرمتلی آنه نگیزنی "ناپاک، حرام"، دیب ائته آلمیمن، تیلیم بارمیدی بو سؤزگه،- دیدی بالگینه.
- شوندن کیئین اخـــــ، افسوس!- دیه چقور اؤکسیندی استاذ.
- عقل و منطقدن إیش آلینگ استاذ. سیزنینگ حتاکه، درسنیگیزنی دینگه هیچ علاقه سی یؤق اؤزی. یرنینگ تارتیش کوچی؛ اتوم، مالیکوال، الکترون، پروتون، نیتورون، انرژی نینگ نیچه خیل کؤرینیشی و باشقه طبعی قانونلرنینگ دینگه نیمه علاقه سی بار؟
- دین همّه نرسه لردن اوستون توره دی.
- یؤق، اونده ی ایمس استاذ. حقیقتنی ائته من ایندی. دیننی سیزگه اؤخشه گن شهوت پرست ایرککلر اؤیلب تاپیشگن. اؤز منفعتینگیز یؤلیده فایده له نیش اوچون دین دوکانینی آچیب آلگن سیزلر. نیمه؟سیزنی کؤرگن خدا بیزنی کؤرمه یدیمی؟ اؤرته ده دلال نینگ نیمه گه کیره گی بار؟ مین شونی بیله منکه، پروردگار اؤزی یره تگن انسانلریگه، خاتیندیر، ایرککدیر نفرت کؤزی بیلن قره مه یدی. بل که سیوه دی. یؤق ایسه یره تمه گن بؤلر ایدی خدایم آدملرنی.
بالگینه نینگ یوره گی اوستیده توسله نه یاتگن آلیب تورگن کپه لک، تیک اوچرلرگه اؤخشب، تیپه گه کؤتریلدی. صنف باله لری«بو بخت کپله لگی»-دیئیشیب، توتماقچی بؤلدیلر. تابوتده ی بؤیچن، قؤللری اوزون اوستاذ کپلکنی هوادن یولقب آلیب کفتیگه قیسیب، مه جقلب تشله دی. سؤنگ کفتینی آچدی. اؤنگ قؤلی نینگ کفتیده کپلک نینگ ساووقینه جسدی یاتر، قناتلری نینگ تعریف سیز بؤیاغی استاذنینگ کفتیگه افسوسکه، مهرله نیب قالگن.
بیردنیگه صنفدن «بَی بَی»،«وَی وَی»،«چوق چوق»دیگن تاووشلر کؤتریلدی. استاذ قؤلیده گی بؤر و کتابنی تخته گه قره ته اولاقتیردی و جهل بیلن صنفدن تشقریگه چیقیب کیتدی. تنفس قؤنغیراغی هم چه لیندی.
***
تنفس پئیتی، اونویرستیت نینگ حولیسیده اؤقیووچیلر تؤپله نیشیب توریبتدی. تارتیشولر قیزغی همان بالگینه نینگ حجابی اوستیده بارماقده ایدی. ادبیّاتدن درس بیرووچی استاد ایسین استاذ«خ»نی ملامت قیلیب توریبتدی. استاذلرنینگ تاووشی بلندلب کیتدی. قیزه ریشدی، بؤزه ریشدی. آغزه کی جنگ کوچه یب کیتدی.
- استاد ایسین، سیزنینگ هم مییه نگیز ائنیگنگه اؤخشه یدی. مینینگ تامانیمنی آلمی حجابسیز بیر شلله قی قیز نی حمایه قیله یپسیز-ه؟ مه میزله یاتیب.
- آغیزینگیز قره ب گپیرینگ استاذ«خ»! انسان نینگ حرمتیگه تجاوز قیلمنگ خوبمی؟-دیدی استاذ ایسین باسیقلیک بیلن.
- مین بو بد جنسلرنی حقارت قیلگندورمن. باشقه لرنی ایمس،-دیدی استاذ «خ».
- نیمه، سیز عیب سیز پروردگارمی؟ اوّل اؤزینگه باق، کیئن ناغره قاق، دیئدی مقاللرده.
- سیزمی هلی اؤشه شخصیت شناس داملا!- قؤپال توس بیلن سؤز قاتدی استاذ«خ» کسبداشیگه قره ب.
- هه، مین بؤله من. تیلیمنی قیچیتدینگیز. ایندی همّه سینی شو جایده باله لرنینگ حضوریده ائتیب بیره من. باشقه چاره م قالمه دی، سیزنی هم باشقه لر بیر ته نیب قؤیسه یامان بؤلمه یدی. قنچه لیک رزیل و افلاس بؤلگن لیگینگیزنی اؤز کؤزیم بیلن کؤرگنمن.
- نیمه نی ائته سیز؟
- نیمه نی ائتردیم؟ هلی هیچ جایگه إیسیمدن چیقمه گن کؤرپه ته گی ماجرالرنی-ده.
- میلی ایندی! سیزنینگ هم کیم لیگینگیزنی اؤقیووچیلر گه بیر ته نیشتیریب بیره ی بؤلمسه یم اجازت بیرگی سیز.
استاذ«خ» سیکین اؤرته دن سوغریلیب چیقیب کیتماقچی بؤلیب ایدی هم که، استاذ ایسین آلدینی تؤسدی و سؤزگه کیردی:
اؤشه سیز ایسمی آلتی أیل شوری گه باریب اؤقیب کیلگن؟ هر کونی شراب إیچگن ینگیزنی، مست-الست بؤلیب، اریقلرگه دؤمه لب یاتگنگیز ایسینگیزدن چیقدیمی؟ اوندن کیئین هم اؤشه یرده اول آخری، أیگیرمه أیلدن کؤپراق یشب، إیشینگیز فقط إیچیش ایدی-کو! ینه إیشینگیز بوزوق خاتینلرنینگ آیاغینی یه لش ایمس می ایدی؟! بی ساقال بازلیک هم سیزدن قالمه دی. پؤلیسگه توشگن؛ کسلخانه لرده یاتیب چیقین اؤزلری ایمسمی؟ مین بو صحنه لرنینگ تیریک گواهی بؤلگنی من-کو! غر خاتینی کؤریب ایدیم، بیراق، سیزده ی توبن، غر ایرککنی کؤرمه گن من. أیگیرمه أیللیک بوزقلیک بیلگیلری هنوز تورخینگیزدن اوریب توریبتدی. اویه لینگ بونده ی دیندار و خدا جویلیکدن. کیر کیچمیش ینگیزنی قی یرده یشردینگیز. اولر بیر کونده ائتیب، توگه تیب بؤلمه یدی. باشقه هم شرمنده لیک جایلرینگیز نهایتده کؤپ بؤلگن. اولرنی کیزی کیلسه ائته من، خوبمی؟
- همه سینی تهمت قیله سیز استاذ ایسین. مین پاک آدم بؤلگنمن،- دیدی استاذ«خ».
- هلی شونده ی می؟- بکسینی آچیب آلبومنی چیقره سالیب،- منه بولر هم عکسلرینگیز. همّه یاق لاله زار -کو! بولرگه نیمه دیئسیز.
- بؤلدی مسخره بازلیک استاذ ایسین،- البومنی قؤلیدن اوزیب آلیب، یرگه آتدی،- مین پیشین نمازیگه باره من، کیتدیم،- دیدی استاذ«خ» و صحنه نی ترک قیلدی...
***
ایرته سی بالیگنه اؤقیشیگه کیلدی... استاذ اوستیدن، رئیسگه، وزیرگه و پریزدینتگه یومه لاق شکایت خطی یازیب عرض قیلدی. شوکونی استاذ«خ»عره ضلب، اونویرسیتیتگه کیلمه دی. اونویرسیتیت رهبریتی ایسه، بالگینه نی شکایتیگه جواب قیلیش اؤرنیده «استاذگه حرمت قیلمه گن»؛ «بیتگه چاپرلیک» و «...» عیبی بیلن اؤقیشدن هَیده لدی. سؤنگ رهبریت: «بالگینه حجابسیزلیک قیلگن؛ شکالیک قیلگنی اوچون» محکمه حضوریده جواب بیرسین، دیگن معناده دعوا عریضه سی هم حاضرله دی و تیگیشلی اداره لرگه جؤنته تیلدی. اونویرسیتیت بالگینه بیلن داولشه یاتگن بؤلدی.
***
شهرده همّه نینگ آغزیده شاو-شو گپلر یوریبتدی. بالگینه نینگ ماجراسی کتته داستانگه ائلنگن... کیسیکن وضعیتدن خواطرلنگن بالگینه جانینی قؤیرگه جای تاپمی، آنه سی بیلن بیرگه ایرته لب بر وقت شهرنی ترک ایتدی. تؤپاری سوادسیز قوراللی دیندارلر ایندی بالگینه گه آمان بیرمسلیگی معلوم بؤلدی. بالگینه قانونی یؤللر بیلن إیککی هفته إیچیده اؤزینی کون باتر دولتلریدن بیریگه یتکزدی...
ینگی حیات باشله دی. بو یرده بالگینه طبی کؤریکدن اؤتکزیلدی. روحیت شناسلر اونینگ کومگیگه آشیقیشدی. بالگینه آق کیئینب، آق تره نیب دنیاگه قئیته کیلگنگه اؤخشب، ایدیال شرایطده یشه ی باشله دی. شو دولتده اؤقیشگه کیریب «بشر حقوقلری»ساحه سینی تنله دی. بار کوچی، مهرینی شو ساحه گه بغیشله دی...
بالگینه إیزسیز، درک سیز ایمسلیگینی آشکار قیلیش اوچون ینه کوره ش باشله دی. انتیرنیت مجازی کلبه سیدن اؤزیگه جای اجره تدی. یاروغلیک تره تیش و یاغدوچیلیک قیلیش نیتیده ینگی بیر ویب صحیفه آچدی. یخشی یاریتووچی بؤلیب إیش باشله دی. سایتیگه «کپلک»-دیه نام بیردی. درس و تعلیم یانیده قیسقه-قیسقه تحلیلی مقاله لر یازه باشله دی. یازیشمه لریده دردلی اؤتمیشی باغلنگن ایدی. إیلک مقاله سیگه: «استاذ آتنگندن اولوغ ایمس!»-دیگن نامنی بیردی. إیککینچی انالیتیک مقاله:« هم استاذ هم قاضی»-دیگن تیمه گه بغیشلندی. اوچونچی مقاله :«بوزوقلر دیندن پناه إیزله شه دی»؛ کیئینگی مقاله سی ایسه«قار یاغدی -یو، إیز اؤچدی»-دیب ناملندی. اونینگ«فکریمیزده قصور بار»،" شرق ده حسیّات، غربده ایسه عقل و تجربه گه سیوه نیله دی"... سر لوحه لی مقاله لری اونی جوده مشهور قیلیب یوباردی. هر بیر مقاله شرق و غرب فرهنگلری اؤرته سیده گی تفاوتلر روحی بیلن سوغاریب یاریلیب یازیلدی. موهوملیک جاینی انیقلیق، ایرتک- افسانه لر جاینی قئناق حیات نفسی ایگلله دی. ایرکینلیک نیمه ایکنینی کؤزی بیلن کؤریب، مشاهده یوریته باشله دی. او عمرینی عیاللر آزادلیگی یؤلیده بغیشله یدیگان بؤلدی. بالگینه کون باتر دنیاسیده آتشین نطق و معنالی فکرلری اوچون حرمت قازاندی. هر قؤشه لاق هرخیل مکافاتلر آله باشله دی. استره تگیه سینی خاتین-قیزلرگه، هر خیل شخصلر، گروهلر، طایفه و دینلر تامانیدن بؤله یاتگن کم سیتیش؛ ناروا ظلملرنینگ آلدینی آلیش قیلیب بیلگیله دی. کیلگوسی مقصدی،عیاللرنینگ حرمتینی ایرککلر قؤلیدن قئته ریب آلیش، تینگلر ارا تینگلیک قانون-قاعده لریگه رعایه قیلیب یشش بؤلیب قالدی. ..
إیشانچ
2013- کانادا