بو فاجعه اتیگی، بیر إیککی- اوچ آی آلدین باشکینت کابلده اطرافیده یوز بیره دی. گلچهره نینگ قاره قسمتی حقیده، اونینگ عمّه سی نینگ قیزی، بیرگینه هما قؤرقو، سیقولرگه قره می، خبر ترقه تیشگه اولگوره دی. بو حکایه نی اؤقیب، سیز عزیزلرده :« خوب، نیمه قیپتیدی؟ بو بیز اوچون عادتی بیر حال؛ بونده ی لرگه کؤنیکیب هم قالدیک؛ تیوره گیمیزده هر کونی بوندن یامانراغلری هم بولیب توریبتدی- کو!»- دیگن اؤی توغیلیشی ممکن. چیندن هم، مین سیزنینگ بو اؤینگیزگه قؤشیله من. تؤغری- ده، سیز و بیز ایاوسیز ظلم، ستم و ینه هر قنده ی کؤرگولیکلرنینگ اچّیق المینی چیکیشگه اؤرگه نیب قالگنمیز. شو باعث، تنه میزده گی آغریقنی سیزه یاتگن حسّیمیزنی یوقاتیب قؤیگنیمی میز. انصاف بیلن ائتگنده ایسکیلیک سرقیتلری، اؤته ناباب رسم- اودملر بیزنی منه شونقه منقورتلشتیریب قؤیگن. حتّا، گپ شودرجه گه یتیب بارگن کی، اینگ آغیر و اینگ دهشتلی قاره کونلرنی هم« تیپه دن توشیریلگن، بلنددن بویریلگن»- دیه یاووزلیکلرگه الهی توس بیره میز ،اولرنی مقدس اتب، تبرّک سنه یمیز. روح و تنیمیزنی اؤره ب تورگن سیم تیکنلرنی اوزیب، یاروغ عالمگه چیقیشگه قونت قیلمه یمیز. نیمه ایمش؟ آخرتیمیز بوزیلیشیدن قؤرقیب شونده ی قیلر ایمشمیز؟ آخر، قنی بیر بره که تاپگور تاپیلیب، کیلیب:« ای انسان! جزا و فلاکت نینگ قوتلوغی، مقدّسی بؤله دیمی؛ ایسینگنی أیغیب آل» دیمه یدیمی بیزگه؟  

    بیزنینگچه، مساله گه باشقه چه راق هم یاتده شیش ممکن. مین شو و بونگه اؤخشش فاجعه لر کؤلمیگه تخمینن منه بونده ی چیزگی بیرماقچیمن: آنه زمینده جان ذاتلردن فقطگینه اوچ طایفه زوره وانلیکلر قربانیگه ائله نیشه دی: بیرینچیسی حیوانلر- آنگسیزلیگیدن، انسان ظلمیگه قرشی آنلگی روشده عصیان قیله آلمه گنیدن آدملرگه ایم بؤلیش و اؤلیشگه محکومدریر. إیککینچیسی گودکلر و بلاغت یاشیگه یتمه گن اؤسمیرلر. بولر هلی یتیلیب، مدافعه قورالیگه ایگه بؤلمه گنیدن، جنسی زوره وانلیک، ناقانونی محنتگه تارتیلیش، حقارت، قئیناق و اوروشلر قربانیگه ائله نه دیلر. اوچینیچیسی بو خاتین- قیزلر. بولر تورلی فرهنگ و اعتقادلرده «توبن»، «عقلی ناقص»، «ایرککدن پست توروچی جنس...» عیبی بیلن هر تور زوغوم آستیگه آلینیب، آزدادلیکدن محروم قیلینه دی. ائریم جمعیتلرده خاتین- قیزلرگه شهوت اسبابی صفتیده قره له دی؛ قول قیلیب ساتیله دی. دانالر ائتگندیک:«عیال ذاتی آق چادر بیلن ایری نینگ اوییگه کیریتیله دی و آق کفن کئیدیریلیب، بارسه- قیتمس(قبر) کتته یؤلگه جؤنه تیله دی». عیال ذاتی بو یاروغ عالمده خورله نه دی، زورله نه دی، کم سیتیله دی، قاره یرگه تینگ قیلینه دی. بو بیر حقیقت، اودن تانیش(انکار) ممکن ایمس. کؤزلری سؤقیر آدملرگینه کوندیک آیدین بار نرسه نی انکار قیلیسه قیلر.

حکایه میز قهرمانی گلچهره نینگ مئشوم تقدیری بولردن هم اؤتیب توشگن؛ فاجعه لی و اؤته اینچلی بیر قسمت! گپ انه شو حقده باره دی.

 

حکایه حقیده بیر شینگیل سؤز بابا میر گل نینگ قیزی بؤلمیش تؤققیز یاشیلی گلچهره آته سی نینگ بیر مینگ افغانی قرضی عوضیگه، 52یاشلی عبدرحمان آتلی بیر کیمسه گه خاتینلیکـّه بیریله دی. عبدرحمان نینگ نارین و لطیفه اسملی إیککی خاتینی بؤلگن. نارین اسملی خاتینی توغمس، لطیفه دن ایسه سککیز قیزی بار. کؤپدن بیری قؤشّه- قؤشّه اؤغیل کؤریش دغدغه سی عبدرحمان نینگ إیچ-إیچینی کیمیریب کیله دی. قرض قیستاولری آرته بیرگچ، بابا میرگل باشقه چاره تاپه آلمه گنیدن هلی یتی قاتمه گن قیزه لاغینی اونینگ قؤلیگه شونداققینه توتقزیب بیره دی و قرضدن قوتیله قاله دی. باشیده عبدرحمان نینگ بیتته- إیککیته دوستلریدن« شو إیشنی قیلمه نگ اکه! قیز یاشلیک قیله دی...»- دیگنده ی قیلیشه دی. شونده آغزی کؤپوگن عبدرحمان اویلمسدن منه بونده ی دلیل کیلتیره دی: « قیزنی یورگیزیب کله پوش بیلن آیاغیگه بیر اورینگ؛ اگر أیقیلمه سه گپ یؤق؛ بی ملال خاتین قیلیب آله بیرینگ»- دیگن. اوشبو قیسقه چه کیریش و حکایه ده، معناسی اؤته خونیک و حقارتلی بؤلگنی اوچون «نکاح» سؤزینی إیشله دن تیئیندیک.

 

حکایه

                                             بختی قرا گلچهره                                      

             کیلگنلرگه آش تارتیلیب، قیسقه گینه تؤی ترقه دی. قؤناقلر(مهمانلر) اؤز اؤی- اؤئیگه قره ب کیتیشدی. عبدرحمان نینگ بعضی یقینلریدن باشقه هیچ کیم حاولیده قالمه دی. جرار کونداشلر قؤلی قؤلگه تیگمی، شقر- شوقیر، جرنگ جورینگ قیلیشب، قازان- تاباقلرنی یویشه یاتگندی. ینگی آی تؤلگن کیچه، اوزاقده گی غوجغان یولدوزلر یرگه جیلمه یب، شوخ- شوخ کوله یاتگنده ی گویا. آسمان سیپینی یائیب تشله گن؛ سان- سناقسیز یولدوزلر سامان یؤلی نینگ اؤره مه تؤلقینلری بؤیلب، زرحل مینچاقلرگه اؤخشب ساچیب، سیپیب تشله نگنده ی. تون نینگ قاره ساچلری اوزره آی مامه اؤزی نینگ ی منت بزرین نولرینی ساچه یپتدی. تیپه ده چرخ- فلک ائله نه دی؛ آنه یرده ایسه اؤزگچه حیات حکمران...

         یان اویده اجابت قبول مراسیمی اؤتکه زیلیشی کیره ک. لطیفه قازان قه سماقلرینی کفگیر اوچیگه توتیب تورگن جاییدن آرتگه تیسه ریلیب، إیچی توته ققه نیدن ایشیک تیرقیشیگه باریب قولاق توتدی. ملانظر، قیزنینگ عمّه سی و ینه إیککی شاهد تؤپله نیشیب، اؤز ارا کینگه شه یاتگندی. بیردن ملانظر سؤپیسی چؤزینچاق تسبیحنی آغدرگنچه، إیچیده شیپ- شیپلب قیلیب، دعا اؤقیدی. سؤنگ، «بؤلدی، بؤلدی!» قیلیب اجابت قبول تصدیغینی آلیش اوچون سؤز قاتدی او: « سین ضعیفه گلچهره بنت بابامیرگل! عبدرحمان نینگ تن محرمی، خاتینی بؤلیشگه راضی می سن؟!!»- دیگن سؤراغنی اوچ مرته تکرارلب تیلگه آلدی. گلچهره قؤلیده گی قؤغیرچاغینی قوچاغیگه باسگنچه؛ هیچ نیمه نی انگله مه گنیدن« قیقیر- قیقیر» کولیب یوباردی. قیزگینه نینگ عمّه سی:« هیی! بوگون قؤغیرچاق تؤیی مس، سینینگ تؤینگ بؤله یتتی گلچهره!»- دیه شنغیللب، قیزنینگ ایلکه سیگه بیگیزدیک برماقلری بیلن نوقیدی. موسیچه دیکـّینه گلچهره باله لرچه جواب قیلگن بؤلیب: «یؤق، یؤق! قاره کؤزنینگ تؤیی بؤله دی بوکیچه»- دیدی، تخلب آلگن بؤغچه سینی قوچاغله ی توریب. شو تابتده، گلچهره نی باله لیک دنیاسیدن اجره تیب آلیب، اونینگ دقتینی بوگونگی تؤی هنگامه لریگه بوریش انچه قیئین کیچدی. اوندن سؤز چیقه بیرمس، عمّه سی پری گل شرطه گینه«هه، راضیمیز، راضیمیز، قبول قیلدیک!»- دیه غه ی غیلب جواب بیریب قؤیه قالدی. سیره ک، ماش- گوروچ ساقاللی ملانظر گوگورت چؤپی بیلن تیشینی کاوله یاتیب، تصدیقنی«بیتدی» اعلان قیلیش اوچون عربچه توشونرسیز اوزون دعالرنی اؤقی کیتدی. وکیل و شاهدلر ملا نظرنی خورسند قیلیشدی، سیئلـه شدی، قؤلینی اوشلب قؤیدی یعنی ملله نینگ قؤلیگه اقچه (پول) قیستیریشدی. ملله اکه قوخ-قوخ یؤته لیب، چؤنته گیدت رومالچه سینی چیقریب، اول پلاو یگن قؤلینی سؤنگ آغزینی اریتدی. چؤزینچاق ساقالینی قؤللری نینگ آلیب، إیشقب-إیشقب قؤیدی. اوزون کیکیریب، اتب قؤئیلگن شرینلیکنی قؤلتیققه اوریب تؤی خانه نی ترک ایتدی.

             کیسیمی کیچکینه دن کیلگن گلچهره نی قؤلتیقله شیب، چیککه ده گی خانه ده تیکیلگن چیمیلدیققه آلیب کیردیلر. سیرّه یمه، یؤغاندن کیلگن یاوایی بوقه دیک کویاو نینگ یانیدن کیچیککینه بؤیی بیلن گلچهره نی سوزیلتیریب قؤیدیلر. گلچهره قؤللریگه خنه قؤئیلگنی، قویوق قیلیب یسنتیریلگنی سببینی سیرتدن یخشی توشونمه گن کؤرینه دی. النگ- جه لنگ وضعیتگه حیرت إیله قره دی. اونینگ هوش- خیالی قؤغیرچا غیده. تورگن یریدن:« تغین، قؤغیرچاغیمنی بیراو اؤغیرله مه گن بؤلسین»- دیدی، کیپریکلری اوچیگه اوچ- تؤرت تامچی یاش قلقیب چیقدی. کیلین- کویاو همان سوزیلیشیب توریپتدی. بو منظره گویا نق، إیچی کاوه ک بیر قری تال درختی یانیده کؤکریب تورگن سنبلنی ایسله تردی. شونده ی قیلیب، ایر- خاتینلیک «إیپلری» محکم باغلنه ندی. قیسقه چه تؤی مراسم بؤلیب اؤتدی.

2

    تؤیچیلر: « ایندی تؤی توگه دی، چیقینگ- چیقینگ، یورینگ- یورینگ» قیلیشیب، کیلین- کویاونی یالغیز قالدیریشدی. کیچه پیشدی؛ همّه غرق اویقوده؛ عبدرحمان نینگ خلوتله شیش چاغی راسه قیسته گن. إیچکریدن ایشیک تورمکلندی، إیلگیچ چیق ایتب توشیریلدی. بیراز اؤتیب، تیرقیشدن عبدرحمان نینگ غیدی- بیتدی گپلری زؤرغه قولاققه چه لیندی. کیتیدن پیش- پیشلب، هنسیره گن تاووش خانه ده گی یریم ساکنلیکنی بوزدی. ایشیک تیرقیشدن تشقریگه سیزیب چیقه یاتگن چیراق نورلری خیره تاردی. کؤپ اؤتمی گلچهره نینگ کوچلی- کوچلی خؤرسینیب، پینغیللب، یومشاققینه أیغله شی ایشیتیلدی. إیککی پلله لیک ایشیک آرقه سیده گلچهره نینگ عمّه سی خوددی، کپه له گی اوچگنده ی ناتینچلندی. آله زره ک لیگیدن إیچکریگه یاپیریلیب کیره ی دیسه، ایشیک تمّه لب قؤئیلگن. عمّه سی بیر- إیککی قور(گـَل، نوبت)«گلچهره! گلچهره»- دیب قیچقیردی. سهل اؤتمی إیچکریدن گلچهره نینگ تیتراق باسگن تاووشی تاباره بلندلشه بیردی، اونینگ قتتیق قیچقیریب «وای آنه جان!!»- دیب یوباریشی واهیمه لی ایشیتیلدی. بیردن چیمیلدیق آرتی ساووق سوو سیپگنده ی جیمیب کیتدی. تغین معلوم بؤلیشیچه، گلچره جنسی قاووشیش پئتیده کوچی باریچه، آغریق زورلیگیدن چیره نیب بقیرگن. عبدرحمان نینگ بؤری ده ی تشله نیشیگه قرشیلیک قیلگن. إیشینی بیتیریشگه شاشیله تورگن عبدرحمان، کوره کده ی قؤلی بیلن قیزه لاقینگ آغزینی یاپیب توره بیرگن...

   اؤن دقیقه اؤتر-اؤتمس، خانه ده گی آغیر ساکنلیکنی عبدالرحمن نینگ یؤته لیب دؤرّیلله گن توشونرسیز آوازی بوزدی. بیرآز اؤتیب، به هیبت کویا کاوشینی آیاغیگه إیلیب، هیجان اره لش بیر احوالده، شاشیلیب چیمیلدیقنی ترک قیله کیتدی ؛ هوا آلگنی تشقریگه چیقدی. او نیمه دن دیر قانمه گنده ی تیز- تیز نفس آله یاتگندی. بیر اؤتیره دی، بیر توره دی، بیر یرده قراری یؤق.

3

            تون قیامیگه یتگن ایدی، آدملر طرفه توشلر قوچاغیده تین آله یپتدی یاکی، الجیره یلب، الخسیره یاتگن بؤلیشی ممکن. عبدرحمان نینگ توغمس خاتینی و گلچهره نینگ عمّه سی پری گل بیر بورچکده خواطرله نیب، غید-غید قیلیشیب اوخله مسدن، نیمه قیلرینی بیلمی تانگ(حیرت) قاتگن. لطیفه و پری گل إیکاولان گلچهره دن خبر آلگنی خانه گه یوگوره سالیب کیردیلر. نی کؤز بیلن کؤریشینکی، چیراقنینگ سؤلغین نورلری آستیده، چوه لگن چیمیلدیق تؤشه گی آره سیدن، هوشسیز گلچهره نینگ یریم آچیق، قانلی و افگار تنه سی کؤزگه تشلندی. عمّه سی نینگ: «یاپیر ای! نیمه بؤلدی سینگه گلچهره؟!»- دیگن تاووشیگه جواب بؤلمه دی. پری گل اؤنگ قؤلینی گلچهره نینگ کؤکسیگه آلیب باریب قؤیدی. یوره گی قؤرقو شکنجه سیده تیز- تیز تیپه یاتگنی سیزیلدی. قره سه لرکی، إیش- إیشدن اؤتگن، میلتیق کؤچیب اؤسل إیش بؤلگن. خاتین- خلچ شاشیلگه نیدن نیمه قیلرینی بیلمی، درّاو بیر هوپلم نبات شربتینی بیر یاغاچ قاشیققه آلیب، زورغه قیزچه نینگ بؤغیزگه قؤیدیلر.باشیدن کؤتریشیب، یوزیگه ساووق اوردی. او اؤزیده ایمس، گلچهره نی آیاق اوستیگه تورغیزه آلمه دیلر. نرراقده، شهوتی تورقیگه اوریب چیققن؛ کؤزلری  بقره یگن عبدرحمان حویلی نینگ بیر چیتیده ایوان اوستونیگه ته ینگن حالده، حلقومی تؤله قویوق توتوننی کیتمه - کیت کؤککه پورکه یاتگندی. یوگور- یوگورلر إیش بیریب، اوُلاوُ تاپیلدی شیکیلی؛ کیچمه- کیچه، اؤو نرراقده گی قؤشینیسی نینگ موترینی چقیرتیریب، هوشیدن آزگن گلچهره نی اؤره ب- چورکب ماشینگه سالیب، کسللخانه گه آلیب کیتیشدی.

4

              داکترلر بیمارنی تیزلیکده شفاخانه ده یاتقزدیلر. گلچهره نی ایمله ی- ایمله ی إیککی- اوچ ساعت دیگن ده هوشیگه کیلتیریشدی. قیزلاقده گی جراحت هلی بیری بیته یاتگن ایمس. جنسی اعضاسی تیکیلن، انچه گینه کؤک یگن. قیزچه  تیز آره ده اؤز آیاغیده یوریب کیته دی، دیب بؤلمه یدی. او بی وقت جنسی علاقه دن قتتیق روحی همده جسمن ضربه کؤرگن. إیچیده گی سینیش و افگارلیک علامتلری قلقیب یوزیگه چیققن. اونینیگ باله لیک دنیاسی سینیق کؤزگوده ی پرچه له نیب کیتگن. او هر گپیده«قؤغیر چاغیم! قؤغیرچاغیمنی بیرینگلر»- دیب أیغله یدی، اؤکسینه دی. کؤزی اویقوگه کیتر کیتمس،«مینی اورمنگ!»- دیگن قیقیریق، بؤغزیگه تیقیلیب کیله دی؛ نیمه قیله رینی بیلمی کؤزی لیققه یاشگه تؤله دی.ینه بیر پاس کؤزی اویقوگه إیلینه دی. قؤرقینچلی توش کؤریب،کیچه لری قیچقیریب اویغانیب  کیته دی. قراقچیلر قؤلیگه توشگنده ی واهیمه ده.

             بیر هفته دیگنده آلیس قیشلاقدن گلچهره نینگ آنه سی قیزیدن خبر آلگنی کسلخانه گه کیلدی. آق کؤیلک لیکلر گلچهره نی ایرکه لب، لبلریگه کولگو قؤندیریشگه اورینه یاتگندی. کولیش نیمه لیگینی ایسیدن چیقره یازگن قیزه لاق قؤغیرچاغینی تیز- تیز ساغینه دی. کسلخانه ده روحینی کؤتریش اوچون اونگه ینگی قؤغیرچاق هم آلیب بیریشدی. گلچهره نیگه دیر باشقه قؤغیرچاقنی یاتسیره یدی، کؤنگیل بیرگیسی یؤق. اونگه باتینیب، رازلشگیسی کیلمه یپتی. یؤقسه، قؤغیرچاق نینگ میلدیره ب تورگن کؤزلریدن شیرینگینه قره شلر تره لیب توریبتدی. چیندن هم، ینگیسی دردلشسه دردلشگو دیک؛ سویونیب بغریگه آلسه آلگودیک قؤغیرچاق.

 گلچهره خوددی، اوستیگه تاغ اغه نب، آغیر یوک آستیدن چیقه آلمه یاتگندیک، تلپینه دی، حالسیزله نیب، تیز- تیز اوچیب توشه دی. بیمار کسلخانه ده اوزاق قاله دیگن بؤلدی. قیریق کون دیگنده تنه سیده گی آغیر و جراحت زؤرغه بیتدی. شونده هم قؤلتیق تیاق بیلن یورگیزیشه یلر اونی.

5

                یاز کونی. قویاش افققه باش قؤیه ی، دیب تورگن بیر چاقده، کسلخانه دهلیزیدن قنده یدیر ته نیش آواز ایشیتیلدی. قابله لردن بیری کیکسه عیالنینگ قؤلتیغیدن سویب: « منه شو اؤنگ تامانده گی ایشیکـّه قه ئیرلینگ خاله جان»- دیدی. قابله ایسه، کؤزی چله کؤره یاتگن بیر کیکسه خاتیننی یتکلب، بیمار یاتگن خانه گه آلیب کیردی. گلچهره نینگ آنه سی کیمیا خاله :« یؤلینگده ادا بؤلدیم! سینی کؤره ر کونیم بارمیکن بالم گلچهره!!»- دیه زار- زار أیغلب قیزینی بغریگه باسدی، یوزی و کؤزیدن تؤیب- تؤیب اؤپتدی. گلچهر هم آنه سی نینگ بؤینیدن قوچگنچه، ایسکب - ایسکب اؤپه باشله دی. دیدارله شیب تورگن آنه- باله خانه نی سیوگی- ساغینچگه تؤلدیردیلر. شو پئیت گلچهرنینگ کؤزلری آنه سی نینگ قؤلتیغیده گی قؤغیرچاققه إیلیندی. شونده گلچهره نینگ خورسندلیگیدن کؤزلری چقنب:«انه یالغیز آی»- دیه بقیریب یوباردی. ایرکه لب کؤپ سویگه نیدن گلچهره قؤغیرچاغیگه «قاره کؤز»،«قوره لی»، « یالغیز آی» دیب آت قؤیگن. گلچهر یالغیز آینی، آنه ی زار هر ایسه، إیکله سینی کؤکسیگه باسدی، آنه-باله یاپیشیب آلگن. بیر- بیرینی قؤئیب یوبارگیسی یؤق. کیمیا خاله اؤنگ قؤلی بیلن گلچهره نینگ یوزینی سیلب، ساچلرینی هیدلب، یوزیدن چیمیریب- چیمیریب اؤپماقده ایدی.

- نیمه بؤلدی سینگه باله ام،- سؤره دی آنه.

- بیلمه سم آنه جان!

- قیزنینگ قسمتی قورسین ایکن باله ام.

- مینی قؤغیرچاغیمدن ائیریب، نیگه بیر کتته آدمنینگ آلدیگه قمب تشله دینگلر؟ میندن شونچه لر تؤیب ایدینگلرمی آنه جان! نیگه مینی غوره اوزومده ی تاکیمدن اوزیب، باغیمدن بدرغه قیلدیزلر؛ دیوده ی آدمگه ایمش قلدینگرهه؟؟.

- جگربندیم. سویکلی باله ام! سینی ساغ کؤرگنیم چین بؤلسین! آته نگ، اکه نگ، اوکه لرینگ سینی سؤره ب قالیشدی. سلام ائتیشدی. اؤکینمه قیزیم، همّه سی یخشی بؤله دی. کمبغل نینگ قیزی هیچ قچان یاریب یالچی مه یدی. یا قرضگه حسابلب بیریله دی یاکی،"یامان کونگه یره سین" ساتیب یوباریله دی. هر قنده ی یامان کون بیرینچی بؤلیب،کمبغل نینگ باشیگه کیله دی ایکن. 

- آنه ! مین آته امدن خفه من،- دیدی گلچهره آنه سی نینگ گپینی بؤلیب.

          قیزچه باشیدن کیچیرگنلرنی تیلگه آلیشدن چؤچیدی. داستاننی یازغیریشگه تیلی بارمه یدی. اؤشه لرنی ایسله سه، تنه سیگه آغریق یوگورگنده ی بیزاوته له نه دی. او قؤرغیرچاغی یالغیزآینی قوچاغلب توریب، اونی گپگه سالماقپی بؤلدی. کیئین، گلچهره جه جّیگینه باله کی لر تیلیده قؤغیرچاغینی سؤزگه توتدی.

- مینی ساغینمه دینگمی عسلیم؟ سین و مین قنده ی قاه قاه آتیب، کولیشیب، اؤینه شیب یوراردیک. سینی أیقیتگنلریم ایسینگده می؟ میلی مینی کیچیره قال خفه قیلگن بؤلسم! قاره کؤز سینی قئته تاپگه نیمدن خورسندمن. ایندی سین مین بیلن بؤله سن. سین سیزهیچ یاق کیتمی من،- دیدی گلهره قؤغیرچاغیگه.

بیمار اوزون داولش و روحی پرورش بیلن اؤزیگه کیلدی. ایرته سی گلچهره قؤغیر چاغی بیلن کسلخانه نی ترک قیلشی کیره ک.   

6

      خوددی هیچ نرسه بؤلمه گنده ی، قیزه لاقنینیگ جانیگه جبر قیلگن کیمسه نی هیچ کیم سؤراق قیلمه دی. قیزگینه نینگ کیلگوسی حیاتی نیمه بؤلیشی هیچ کیمنی قیزیقتیرمه یپتی. بیر نرسه عیان بؤلیب توریبتدی کی، گلچهره عبدرحمان نینگ رسمی خاتینی. بَری بیر تقدیری اؤشه ایسکی قازیققه آلیب باریب باغله نه دی. قاره بخت گلچهره ینه اؤشه شوم عبدرحمان نینگ قؤلیگه توتقه زیله یاتگن بؤلدی. آخری، آنه سی، کونداشلری بیرگه له شیب گلپهره نی کسلخانه دن آته- آنه سینیکیگه ایمس، ینه قئته ریب ایرینیکیگه آلیب کیتدیلر. هه، گلچهره عبدرحمان نینگ ناموسی، یاستیق داشی- ده. او اؤشه جبرلنگن اوییده ینه بیر عمر یششگه محکوم. اونی ایندی نا معلوم تقدیر کوتماقده. اونینگ بو یرده، یالغیزآی دن اؤزگه یقین هیچ کیمی یؤق. قرضگه حسابلب بیریلگن قیزه لاقنینگ بیردن- بیر جانکویری اگر، قؤلیدن یولیب آلمه سه لر شو گینه قؤغیرچاق خلاص.

     قی یاققه آلیب کیتیشلریدن خبرسیز. گلچهره اؤزینی اونیب - اؤسگن اویی، آته- آنه سینیکیگه آلیب باریشه دی، دیب امید قیلگن ایدی. یؤق، اونده ی بؤلمه دی. شونچه ناخوشلیکلردن کیئین هم نیمه قیلسین، گلچهره بی غبار باله لیک آرزو- امیدلری چیل- پرچین بؤلگن حاولیدن اؤزینی تاپتدی. بو حاولی إیلان- چیان بؤلیب چقه بیردی اونی. ناموس شیشه سی سینگن بو اوی کؤز اؤنگیده بیر تابوتنی ایسله ته دی. چیمیلدیق آرتیده همان، إیککی باشلی اژدرها یاتگنده ی نظریده. «یور، اویینگه بار گلچهره»- دیب قؤلتیغیدن اوشلب اؤشه چیمیلدیق سالینگن خانه آلیب کیرماقچی بؤلدیلر. گلچهره بؤلسه: « مین بو خانه گه کیرمی من، یؤق قؤرقه من او یرگه باریشدن»- دیب یر تیپیب توره ر بیردی. أیغی- سیغی سیگه قره می، کؤزلری یاشگه تؤله قیزچه نی سودره ب، اؤشه یرگه آلیب باریب قؤیدیلر. قنچه أیغله مه سین- سیقته مه سین شوم قسمتگه بؤئین ایگیشدن اؤزگه چاره قالمه دی گلچهره گه. باشقه لر کؤزی بیلن قره گنده، بو خانه دانده او ایندی «آتیلگن اؤق؛ ساتیلگن متاع، إیت یله گن یلاغ و یاریلگن پؤچاق؛ خدا قرغه گن جنس؛ ایرککنینگ چؤریسی تمام». حاولیده گلچهره عبدرحمانگه خاتین بؤلیشدن تشقری، ایرته دن- کیچگه چه خذمتگارلیک قیلشی کیره ک؛ بو یاغی ایندی، ساچی سوپورگی، قؤل کوساو بؤلیشی ضرور. باشقه ناز- نخره لر اؤتمه یدی. باردی او بو کونلرگه کؤنمی، بؤین تاوله سه، باشیگه قانلی قمچی یاغمیرده ی یاغیشی مقرر. اونی ایشیته یاتگن هیچ کیم یؤق بو اوییده. کؤچه گه چیقیشگه اذن بیریلمه گن.

7

   گلچهره نینگ کملیگی کیلدی؛ سیم- سیم أیغلب اچّیق کؤز یاشی قیلدی. حاولیده تومنات إیش اونی کوتیب توریتدی. بو إیشلرنی بیر چیککه دن قیلیشگه مجبور. هیچ قنده ی بهانه اؤتمه یدی. آخری، گلچهره شو کونگه کؤنگن بؤلدی. آنه سی کمیاخاله :«خی باله ام چیده گین. کؤپنینگ باشیگه کیلگن سودا ایکن. قیز دیگننی یر آلمی گور آله دیمی. قسمتینگ قؤشیلگن ایکن، هلی باله کؤره سن، بو کونلرینگ اونوت بؤله دی»- قبیلیده نصحت قیلدی. اوچ کون اؤتیب خاله هم اؤز کولچه سیگه آلاو تارتگنی اوییگه قه ئتدی. کتته حاویلیده شونچه جملغه إیچیده گلچهره بوغدای گه توشگن ارپه ده ی اجره لیب توریبتدی. حیات نینگ شفقتسیز کونلری هه دیمی ایشیک قاقدی. بیر اوییده نیمه إیش قیلینیشی کیره ک بؤلسه، بَری گلچهره نینگ بؤینیگه یوکله تیلدی. ایندی گلچهرده بیتته گینه آرزو قالدی. او هم بؤلسه، اچّیق کونلرده شوگینه قؤغیرچاغی یالغیزآینی بیر قؤنیگه آلسه- یو، إیچیده گی بار درد و المینی تؤکیب سالسه. «هر قه لی باشقه سیگه چیده سم کیره ک»- دیگن شور حیات  خیالی، بیلن قاریشیب کیتدی. کون- گونگه، هفته- هفته گه، آی- آیگه، أیل-أیلگه اوله شیب، ایوریل دنیا ائله نه بیردی. هه دیمی گلچهره سویه گی قاتیب اؤن سککیزنی هم تؤلدیردی. او ایندی عبدرحمان کوتگن إیستک- آرزولرنی یوزه گه چیقه ریشی شرط. عبدرحمان نینگ کؤز اؤنگیده، قؤچقارده - قؤچقارده ی اؤغیللر تیز چؤکیب، شی تورشی نهایتده مهم...

8

      حاولیده بیر توپ عیال جنسی. گلچهره نی یم قؤشیب سنه سه همّه سی اؤن بیرته خاتین- قیز بؤله دی. بَرچه- بَرچه سی عبدرحمان نینگ حکمیگه قوللوق قیلیب، باش ایگیشگه مجبور. شونیسی قیزیقکی، بیر عمر بویروق بیریب اؤز سؤزینی اؤتقزیب کیلگن آدم، هر دایم تیوره ککه تیپه دن قره یدیگن بؤلیب قالرکن. بیله غانلیک کسلیگه مبتلا بؤلیب، اؤزینی باشقه لردن عقللی راق توته دی. بیراولر ایگیلیب، بوکیلیب حرمت قیلیشینی إیسته یدی. سؤزینی تینگلشگه تیّار توریشینی خواهخله یدی. آدملرگه عیب تقیب چقیریشنی خوش کؤره دی. حکمرانلیک نینگ شراب سینگری کیف و خماری هم بار. قؤل آستیده گیلرنی سؤکیب، یوگورتیریب إیشله تیشنی یاقتیره دی بونده ی آدملر. دؤق-پؤپیسه لری هاوورینی باسمه سه، تیپکی، شپلاقدن إیشدن آله دی ایکن حکمران کیشی. باردی شو إیشلرنی قیلمسه، خماری توتیب، بیران نرسه سینی یؤقاتگنده ی گندیره کلب قالیشی انیق؛ تینتیره کلب اؤزینی اؤققه-چؤققه اوره ی بیره دی. عبدرحمان شونقه سؤرت آدملر سیره سیگه کیره دی. او اؤزی بیلن گپله شیب، چوقور اؤیگه تالدی.

     "...شونچه أیل بو ماچه بیلن یشب کیله من، بیر اؤغیلنینگ آته سی بؤله آلمه دیم-هه،- قاره کؤل کلاه سینی تیزه سیگه قؤندیرگنچه اؤزینی بو دنیاده یالغیز سیزگنده ی توتدی،- بو نی کؤرگولیک؟ بیر اؤغیلنینگ تیرناغیگه زار بؤلیب اؤتیشدن کؤره یامانراغی بؤلمه سه کیره ک- او! پالچیگه، قاقیمچیگه آلیب باریب، یوره گیمده کیچگن برچه إیریم- سیریملرنی قیلدیم، بؤلمه دی. منه آخری داکترگه هم آلیب باردیم بو میکه جیننی. اؤزی بد اصل اوروغدن ایکن؛ عایله مگه شونینگ پای- قدمی تیککندن بیری إیشیلرم آرقه کیتگنی کیتگن. بو شوم شو قدمنی توبه سیگه بیر ته ینتیرمه سم بؤلمس؛ بو قنجیق نینگ جایی آغیلخانه. بونی آت، ایشکلر آلدیده محکم باغلب قؤیه من. تا کیم، آدملیکد چیقیب حیوانگه ائلنسین. عهد و پیمان شو. کیم بیلیب اؤتیریبتدی، شو یرده چیریتیب، آخری بو یردن گورگه جؤنته من مین بوکنچه لینی. بونینگ اوچون اویده گیلریمگه قهریمنی تؤکیب، زهریمنی ساچیب توشونتیرشیم کیره ک. مبادا بونی شو کویگه سالگوده ی بؤلسم، إیسی تشقریگه چیقمسمی ایکن؟ گپ سؤز بؤلیب قالسه نیمه قیله من؟ یؤق، مین بونی قانینی چیقرمی، جانینی آلیشیم کیره ک. اوّلا، إیچینگده گیلرنی ادبینی بیریشینگ، کؤز اؤتینی آلشینگ کیره ک عبدرحمان. لطیفه بیلن ناریندن تشقریگه سؤز چیقمسه بؤلدی. قالگنی اؤیله مسه هم بؤله بیره دی. قیزلریمنینگ هم طنابینی تارتیشیم لازم...».

9

     عبدرحمان إیچیده اؤیلب تاپگن جزانی عملگه آشیریش پی گه توشدی. بیرینچیدن آغیلخانه نی کؤزدن کیچیردی. ریجه سینی خوب توسماللب تیکشیریب کؤردی. گلچهره نی آغیلنینگ قی نقطه سیده بایلب قؤیشنی خیالیدن اؤتکزدی. عبدرحمان قیلماقچی بؤلگن إیشینی خاتینلری نینگ قولاغیدن اؤتکزدی. "ینه گپ تشقریگه چیقمه سین"- تاکیدلب قؤیدی.      

      گلچهره قاره سحردن توریب، تیمیرسکیله نیب تیریکچیلیک یوموشلری بیلن بند. اویده گیلرنی توشگی آوقاتدن تؤیغیزدی. کتته عایله نینگ کیچیک بیر خذمتگاری صفتیده، صفه نینگ بیر چیتیده اؤتیریب، حضور- خلاوتسیز آوقاتلنگن بؤلیب، تمشه ندی. او دایم حرکتده بؤلگن بیرعیال، او بیر یرده اؤتیریب دم آلیش و آوقاتله نیشنی اونوتیب یوبارگن. عبد رحمان قاغرنینی تؤیغز یب بؤلگچ، توره سالیب، گلچهره نینگ بیله گیدن محکم اوشلب، "یور سین جلب بو یاققه"-دیب اونی آغیلخانه تامان سوده ی باشله دی. «مین نیمه عیب قیلدیم، مینی قی یلته سیز؟! وای داد خداییم!»- دیدی. گلچهره نینگ بو داد، واینی اؤزیدن باشقه هیچ کیم ایشیتمه دی. شونده عبدرحمان بو « شوم آیاق»، سیومس خاتینیگه یوز بوریب: «آوازینگنی اؤچیر ماچه خر!!»- دیب جهل اره لش بیر وضعیتده، قؤلیده گی چیلبیر بیلن اونینگ قویروغیگه کیتمه - کیت بیر نیچه ته توشیردی. باشی بیلن ایلکه سی بؤیلب ینه بیر-إیککی ترسه کی توشدی. کلتکلشلردن زده بؤلیب کیتگن گلچهره نینگ نفسی إیچیگه اؤره لدی. بیلگینی قؤیب، ساچیدن توتملب اؤشله گن عبدرحمان خاتینینی آلیب باریب، تارتیب باغلب قؤیدی.هنگی ایشک نینگ یانیدن اول قؤللریگه سیرتماق سالدی، سؤنگ چیلبیرنی ایچیب، إیککی آیاغیدن تیمیر قازققه باغله دی. یوره گی یاریله ی، دیب تورگن گلچهره جاییده بوکچه یب اؤتیریب قالدی.  

       گلچهره بو آغیلخانه ده قاله بیردی. کیره ک بؤلگن پلله ده، اونگه تیکه تیشله م نان بیریب کیتیله دیگان بؤلدی. باشقه ضرورت لر وقتیده هم اونی کونیده بیش-اؤن دقیقه قازیقدن بؤشه تیب، إیشی بیتگندن سؤنگ ینه شو جایده باغلب قؤئیشه بیردی. بیر نیچه آی اؤتدی. گلچهره هیچ کیم بیلن ملاقاتده بؤلمه دی. سؤزلش نیمه لیگینی هم اونوته یازدی. اوزاق جسمانی قیناق، حقارت و ایزیلیشلر آرقه سیدن اسکلیتگه اؤخشب قالدی. بدنیدن سویی قوریب، تیریسی سویه گیگه یاپیشدی. کؤکرگن تاملری یوزه گه بؤرتیب چیقدی. په خالگه باتیب، کیر باسگن ساچلری تؤزغیب کیتگن. آلتی آیدن بیری یوزلری یوویقسیز گلچهره، نق اوراحگه اؤخشردی. ینه بیر نیچه آی و أیل اؤته بیردی. قاره یب کیتگن برماقلری اوچیدن، قانه ب، اؤسیب سینگن تیرناقلری کؤزگه تشله نیب توره ردی. تیرسکلری، إیککی تیزه سینینگ سویکلری ایسکیرگن، اؤبه دی کیئیمنینی تیشیب تشقریگه چیققن. کؤزلری چؤکیب کیتگنی دراو کؤزگه توشه دی. باش چناغی قوریب، بؤشب قالگن آش قاواقنی ایسله تردی. گلچهره توتقون آلینگن قولگه اؤخشب آغیر شرایطده، همان یشب کیلماقده. او آغیلخانه "بیر آزاد بؤله من، حیات آغوشیگه قئته من"-دیب اؤیلب هم کؤرمه گن. حیاتدن امینی اوزگن. اؤیلش و خیال سوریشدن هم محروم بؤلگن. تشقریده هم جؤشقین حیات بار، شادلیک، کولگو- اؤئین بار، سیویش- ساغینیش، یم-یشل طبعیت کؤکینی سالیب توریبتدی.قولاقلرگه  قوشلرنینگ چولدیره ب سه ئره شلری یاقیملی جرنگله یدی. آی و قویاش، کؤک و بولوت، باغ-راغ،تون و کون بارلیگینی ایسکه کیلتیره آلمه یدی. احتمال باشیده: «آته ام- آنه ام مینینگ بو کونیمدن خبر بؤلرمیکن؟ » ،« اولر مینی بو دوزخدن قوتقزرمیکن؟»- دیب اؤیله گندیر گلچهره. شو نچه مدت اؤتیب آغیلخانه ده گی دهشتلی حیات خبی هلی تشقریگه چیققه نیچه یؤق. چیققن تقدیرده هم عبدرحمان نینگ کاووشینی تؤغریلب قؤیه دیگن آدم یؤق.

       شو کونی گلچهره نینگ آته- آنه سی قیزینی یؤقلب، کیلیشدی. آلدین هم بیر- إیککی مرته کیلیشگن ایکن. عبدرحمان هر گل تورلی بهانه بیلن حویلیگه کیریتمی اولرنی، تشقریدن رخصت قیلیب یوباره بیرگن. کؤپ وقتگچه آته- آنه :«ایری بطّال-ده، قیزیمیزنی، آته -آنه گه کؤرسه تیشنی خواخله مه یدی»- دیب یورگن. کؤپ باره کیلیب نتیجه سیز قئتگنلریدن سؤنگ بابامیرگل و کیما خاله نینگ یوره گیده قنده ی دیر شبهه لر اؤیغانگن. تینچی یؤقالیب قیزینی تاپیشگه عزم قیله دی. عبدرحمان نیکیگه باریشدن تایمه یدی.  

10

    عبدرحمان نینگ مال- حالیگه قره گنی اونینگ زمان دیگن جییه نی خبر آلیب توره دی. شونچه وقت اؤتیب، بو باله هم آغیلخانه ده گی وحشیلیکلردن خبری یؤق. بویریلگن إیشنی بجره دی- یو، اوئیگه کیته دی قه یتیب. قیسی دیر کونی زمان، آغیلخانه یانیدن اؤتگنده اونینگ قولاغیگه غلطی بیر آواز ایشیتیله دی. بیلگیسی کیلیب قره سه، نیمجان إیغره نیش تاووشی، قیزباله نیکی. قیز باله حیوانلر آره سیده نیمه قیلیب یوریبتدی، دیب حیرتله نه دی. یوره گیده بیر نرسه لر کیچدی باله نینگ. توشونماقچی بؤلیب، بیلیشگه حرکت قیله دی. بیراق، جرأت قیلیب، تاغه سی نینگ قؤرقیشیدن آغیلخانه گه کیره آلمه دی. باشقه گل کیلگنیده هم شونگه اؤخشش بیر وضعیت بارده ی توئیلدی خیالیده. بو یرده گلچهره نی زنجیربند قیلیب باغلنگنلیگینی کؤزلری بیلن کؤره آلمه سه- ده، شبهه سی حقیقتگه ائلندی. هر گل عبد رحمان جییه نیگه «هیچ نرسه بؤلگنی یؤق. همّه سی یخشی، مال-حالدن خبر آلیب تورگین آنده - سانده،-دیب قؤیه دی. زمان هم«خوب بؤله دی تاغه جان!»- دیب یؤلیگه دوام ایته بیردی.

11

      یان قیشلاقده بابا میر گل و کیمیا خاله :قیزیمیز گلچهردن خبر یؤق»- دیگن تشویش بیلن یشب یوریشیبتدی. آته- آنه قؤرقیشیدن هیچ کیمگه بو حقده سؤز آچه آلمه گن. گلچهره نینگ بیدرک قاره تقدیری بارگن سری بیزاوته قیله بیره دی. آره دن بیر نیچه أیل اؤتدی. همان گلچهره دن خبر یؤق. اؤلیکمی، تیریکمی؟ هیچ کیم بیلمه یدی. یاشلیگیدن ایرگه اوزه تیلگن قیزچه شو پئتگه کیلیب، 21 یاشگه کیرگن. او 11-12 یاشلریدن قؤل-آیاغی باغله نیب، آغیلخانه گه تشلنگن. "بو کثافتنی تیریکلیگیده قوریته من"-دیگن عبدرحمان یخشیلب حکمینی اؤتکزگن. اونینگ جبریدن بو یاووزلیک  و رزیللیکلر خبری تشقریگه چیقمی کیله بیرگن. قیشلاقداشلریدن کیمدور شبهه له نیب، قیزنینگ تقدیری بیلن قیزیقه دی. آخری گلچهره نینگ کؤپ أیللردن بیری ایری تامانیدن آغیلخانه ده باغلب تشلنگنی خبریدن آگاه بؤلیشه دی. کونلردن بیر کونی عبدرحمان نینگ جییه نی بو خبرنی گلچهره نینگ آته- آنه سیگه یتگزماقچی بؤلیب، یؤلگه چیقدی. یؤلده  کیله یاتیب، زمان اؤشه شبهه لنگن کیشی دوچ کیلیشدی. کؤزیگه قیزیق کؤرینرکن زماندن: 

- اوکه مین عبدرحمان نینگ خاتینی گلچهره نینگ تاغه سی بؤله من، -دیدی بایه گی کیشی، بیر گپیم بار ایدی. یخشیلی حقی خبرینگ بؤلسه ائترسن میلیمی؟

- هی اسلام تاغه، شونداغمی،- دیدی زمان،- بیلسم ائته من.

- شو بابامیرگل و کیمیا خاله لر قیزی نینگ داغ و حسرتیدن کوئیب کباب بؤلدیلر. بیر نیچه أیلدن بیری قیزیدن درک یؤق ایمش. کیچیکلیگیده عبدرحمانگه ایرگه بیرگن-او، قالگنیدن حبری یؤق.سین عبدرحمان نینگ اوئیگه یقن سن ایمسمی سن مبادا؟ خبرینگ بؤلسه ائتگین جان اوکم! یخشلیگینگنی قئته ره میز.

- اونداغ بؤلسه ائته من، ایشیتینگ بؤمه سه هم. مین بیر کونی عبدرحمان تاغمنی نیکیگه آغیلخانه گه ماللرگه اؤت، یم- خشک بیرگنی کیر گنیمده، قیز باله نینگ إینگیچکه گینه أیغله گن تاووشی ایشیتیلگنده ی بؤلیب ایدی. مینی او یاققه یؤلتمس ایدیلر. تاغه ام کیمگه دیر ظلم قیلگنگه اؤخشه دی. رزم سالیب یوره بیردیم. آخری بیلیب باقسم بو شو گلچهره ایکن. حیوانلر یانیدن باغلب قؤیلگن عیال گلچهره ایکن. او قنده ی احوالده ایکه نیدن، بؤلیب اؤتگن داستاندن خبریم یؤق. اونی قوتقزیش کیره ک. مینده گی گپدی باری شو. تاغه ام بیلمه سین تغین، مینی تیریمگه سامان تیقه دی. راسه خونیک، ظالم و پیس آدم.

- سینگه رحمت اوکه شونچه معلوماتنی مینگه یتکزگه نینگ اوچون. هیج کیم بیلمه یدی، خواطر آلمه. تنگری یارله قه سین سینی. بو گپینگنی باشیم کیتسه هم باشقه لرگه یتکزمسلیککه حرکت قیله میز. کؤنگلینگ تؤق بؤلسین. 

12

بو خبرنی ایشیتگن آته- آنه کویاوی عبدرحمن نینگ اوئیگه قره ب روانه بؤلدیلر. اوچ کیشی حاویلیگه باستیریب کیریب، اؤشه ائتیلگن جایدن گلچهره نی تاپیشدی. آته-آنه قنچه لر أیغلب قیزینی قوچقلب آلمه سین. قیزی بولرنی یخشی ته نیمه یپتی. «بولرکیملر؟ نیمه  گه کیلیشدی؟»- دیگن سوال گلچهره نینگ إیچیدن اؤتگن بؤلیشی ممکن. اینگ یامانی شو کی، گلچهره سؤزله شیشنی اونوتیب قؤیگن. ساقاولرده ی  معناسیز غودورده یدی خلاص. برماقلری بیلن بیر نرسه لرنی ایما- اشاره قیله باشله دی. شاشیلینچ روشده تیریک جسدنی بو یردن آلیب کیتیشدیلر.

13

     گلچهره نی کیمیا خاله و بابا میرگللرنینگ اوییگه آلیب کیلدیلر. 12 أیل آلدن بو خانه داندن چیقریلگن قیزچه هیچ نرسه نی ایسله ی آلمه یپتی. مییه سی بؤشب، قوریب، ققشب قالگنده کؤرینه دی. بدنیگه کیئیمی یاپیشیب کیتگنیدن آنه سی کیمیاخاله گلچهره نی یوینتیرگنی تشنابگه آلیب کیره آلمه دی. اول بدیگه اچّیق یاغ سوریب، کیئین یاپیشگن کیئیمنی ائریب آلیشگه کیریشدی. قؤل تیکیزگن سری، تنه سیدن قان بیلن إیرینگ چیقه بیر دی. کیر و افلاس کیئیمنی ایچیب آلرکن، بدنینی سوو  و صابون بیلن یوویشگه اعلاج تاپیلمه دی. قانیگه بیله نیب یاتگن بیمار اوچ- تؤرت ساعت آنه سی نینگ قوچاغیدن ایدی. شو آره ده کؤز آچیب، جیلمه یمه دی هم. نفس آلیشی تاباره سیکین لشه یاتگندی. تازه راق کیئیم کیدیریب، کؤرپه چه ده یاتقیزه میز، دیگن اؤی بیلن قیزینی یردن اوزیب کؤترماقچی بؤلدی کیمیاخاله. گلچهره سؤلیگن تنه سی ساویی باشله دی. او چلقانچه سیگه یاتگن یریدن آخرگی مرته ارّه نگ کؤزلرینی یریم آچیشگه اولگوردی. شو چاغده او" قؤغیرچاغینی" ایسلب قالگن بؤلسه عجب مس. او نینگ یوره تیپیشدن تؤخته دی. نهایت گلچهره آنه نینگ بغریده منگو ساکنلیک قعریگه چؤکدی. کؤزلری اؤتمسله شیب قالگن کیمیا خاله  ابدی ایسه ائریلیق داغیده یانیشدن اؤزگه چاره تاپه آلمه دی.