سفر قــَری دی،آلیسلردن انچه یؤل باسیب، کیچقورون ساعت اؤنلرده، چیگره یقینیده جایلشگن شهر مهمانخانه لریدن بیریگه کیلیب قؤنیم تاپدیک. جزیرمه قویاش تفتیدن شهر قینه لیب نفس آله یاتاگنده ی گویا. کیچ ایسه-ده، هنوز تابه دیک قیزیگن اسپالت یرلر-او، بنالر دیوارلریدن قویاشنینگ تفتی کیتگنیچه یؤق.اطرافنی قارانغولیک شرپه سی چؤلغب آلی دیسه، جاده یو، کؤچه لر چیراغلریدن تیوره ککه ساچیه یاتگن یاروغلیک ظلمتنی خوددی تیپه گه إیتره یاتگنده ی. شوتابده آدملر جؤشقین و امیدلی حیات قوچاغیده تین آله یاتگندی. آشخانه، کافی، سقلین سوولر، باغ و راغ گوشه لریده یاش-أیگیت قیزلرقوناق موسیقه لر یشیتیشیب، بیر- بیریگه ساغلیک تیلب قدح کؤتریشماقده. اولر می سرخوشلیگیدن سوینچلری إیچیگه سیغمی بیر-بیرلریگه تاتلی اؤپیچلر هدیه قیشماقده ایدی...
سیلله ام قوریگنیدن مهمانخانه گه کیریشگه یوره گیم بیتله مه یپتی. میزغیب آلیشگه مدار یؤق، هوا هم یتمه یتیدی. دیمیققن هوا آستیده اؤتگن- قئتگنگه تیلموریب اؤتیره بیریش هم جانگه تیگدی. برداشیم ساب بؤلدی. آخری اؤرنیمدن جیلیب مهمانخانه إیچکریسیگه کیردیم. قؤشخانه چیدن آچقیچنی آلیب آلتینچی قوتگه کؤتریلدیم. باره سالیب تختگه اؤزیمنی آتدیم، کؤزیم اویقوگه إیلینیبتدی. دیرزه پرده سی نینگ تیرقیشیدن خانه گه آقیب کیره یاتگن قویاش نورلری چککه منی سیلب یاریتگندی بؤلدی. یتیم جیمیرلب، سیسکه نیب اؤرنیمدن توردیم. یخشی تؤئیب اؤیقو آلدیم دیب ائته آلمی من. قره سم وقت الـله محل بؤلگن. درراو نرسه لریمنی أیغیشتیریب، إیخمگینه بکسیمنی ایلکه مگه آسدیم- ده، هوا إیسیمسدن چقانراق کؤپریککه چه یتیب آلی، دیه سیکین تیبره ندیم. بؤساخه هتلب تشقریگه چیقیشیم بیلن غیرر یتیب مسافر ته شیوچی سرویس هم کیلیب قالدی. بیز استودینتلر اؤریندیقلرگه اؤتیریب آلدیک، بیرآز اؤتیب سرویس قؤزغه لدی. بیزنی أیگیرمه دقیقه چه یؤل یوریب، باجخانه آلدیدیگچه کیلتیریب توشیردی. بیر مدت تینچ- تاتو حیات و آسوده لیک آغوشیدن ائرا توشرکنمن دلیمده. نصیب بؤلسه ینه اؤقیشیمه قئتیب کیله من، دیگن نیتنی کؤنگلیمده توگدیم. نوبتگه توریب باجخانه تیکشیرودن اؤتدیک، کؤپریکنی کیچیب بندرگاه کیلیب توشدیک. دریا یاقه سیده بنا ایتیلگن بو شهر باشقه بیر قیافه ده. إیککی خلق اؤرته سیده گی مدنی تفاوتلر یقال کؤزگه تشه نه دی. قوم کؤچکیسی یؤلنی تؤسگنی باعث بیرار ساعتچه قالیشگه تؤغری کیلدی بو یرده. کون قیزیگندن قیزیماقده. دریانینگ سلقین سوولری تره ته یاتگن میین یل(شمال) بیزگچه یتیب کیله آلمی سرابگه ائلنه یاتگندی. حتــّـا، دریا تؤلقینلری بیلن اؤردککه اؤخشب سوزیب باره یاتگن کیمه و قه یقچه لر اوزره اؤرنه تیلگن قؤشنی مملکت بیراقچه لرینی- ده جیمگینه هیلپیره تیشگه شمال یتمه یپتدی. کون یریمدن آققن.
دریا بؤلسه سؤلیم حیات بیلن جهنم اؤرته سیدن سولت تؤکیب آقه یاتیر. دریانینگ او تامانیده آسایشته حیات حکمران. بو یاغیده هم حیات شاشیلیب موج اؤرماقده. بیراق، بو موجلر: قوتغو، قؤرقو، دهشت، قان، إیرینگ، زرداب، اور-أیقیتلر وهیمه لر کوچیدن حرکتگه کیلگن. اساو آتدیک تیزگینسیز روشده تؤرت یاققه باش اوره دی بو موجلر. گاه داولگه ائله نیب باشگه یاغیله دی، گاه قویون بؤلیب همّه یاقنی إیچیگه تؤختاوسیز یوته یاتگنده ی بو یاقده گی تؤلقینلر. بــَـری بیر وطنده بو قورغور. قی گه بارمه گین سینینگ آرزولرینگ، باله لیک خاطره لرینگ، اچّیق - چوچوک دملرینگ، ساغینچ و ارمانلرینگ یاتگندیر اونده. آته نگ- آنه نگ، اکه- اوکه، جان- جگرلرینگ سینگه کؤز توتیب یشه یدی ایمسمی؟ ائنیقسه ساغینگنینگده، بو تویغولر سینی بی اختیار اؤشه یاققه تارتمی قؤیمه یدی. سین انه شو کؤرینمس إیپلر إیله قتتیق باغلنگن سن یورتینگ بیلن.
تشقریده هوا قئنه یپتی. قاپ- قاره اسپالتلنگن یؤل اوزره سراب شوخ-شوخ تؤلقینله نه دی. هیچ یتیب آله آلمی سن کیشی. کتته- کتته یوک ماشینلری بندرگاهدن نرسه لر آرتیب، یؤلگه چیقرکن، سراب موجلریگه قؤشیلیب کؤزده غایب بؤلیب کیته یاتیر.
تکسی توتیب، یؤلگه چیقدیم. آلدینراقده بایه گی کوتیلمه گن یؤلداشیم طوفان توریبتدی. او هم تکسیگه قؤل بیردی، پولیگه چنه لشدی، «بؤلدی راضی بؤلینگ اکه!» دیه هیداوچی بیلن کیلیشیب او هم تکسیگه اؤتیریب آلدی. بیر ساعتدن کؤپراق یؤل یوریب، گاوجوم شهرگه یتیب کیلدیک. بیر معناده بو شهرنی کبوترلر شهری دیسه بؤلردی. بیزنی هوتلگه آلیب بار، دیب تکسیچیدن التماس قیدیک. تکسی بیر په سده بیزنی منزلگه آلیب باریب قؤیدی. هوتل رخصتیگه کیلگن محصللردن لیق تؤله. خانه لرده اؤرین یؤق، هوتلنینگ کتته سالونیگه کیریب باردیم. سالون هم شورویدن کیلگن تومنات محصللردن آغزیگچه تؤله. خوب تیقیلینچ. طوفان هم اؤزیگه جای تاپتدی. إیلانینگ یاغینی یله گنده ی بلا ایکن. دراو میزبانگه ائله نیب قالدی قؤیدی. او آزغیندن کیلگن اره مغز بیر أیگیت. کؤزلری توشله دیک اؤینب توره ر، تیز-تیز چؤنته گیدن سگریتی چیقریب یاقر، تینیمیسر یلیب-یوگوریب یوریبتدی جرار. هوتلده من، مین نفسیمنی راستله ماقچی بؤلیب، بیر چیتگه باریب یانباشله دیم.إیسیقدن راسه قاره تیرگه باتگنمن. هلی تون کیرمی پشّه لر رقصی باشلندی. یوزو باشیم، قؤل-آیاغیم، نی که آچیق جایم بؤلسه، پشّه هجومیگه اوچره گن. اؤلگور پشّه عذابی همّه سیدن هم اؤتیب کیتدی. فراغتیم بوزیلیب هوتل ایوانیگه چیقدیم. سوو سیپیلگن اؤت-اؤلنلر اوستیگه پتویمنی یائیب، ناچار چؤزیلدیم. تشنه قالگنیمدن یاته آلمی جایمدن توردیب، قئتیب ینه هوتلگه کیردیم. دهلیز بورچه گیده قؤئیلگن کؤزه دن بیر جام موزدیککینه سونی قوئیب شنقه کؤتردیم. کؤتردیم-او، کؤزیم تیلیفون گوشه گینی قولاغیده توتیب کیم بیلندور گپیره یاتگن طوفانگه توشدی. سوو ایلتیب بیره می دیسم، یؤق، دیگن معناده باشینی سره ک- سره ک قیلدی او. إیککی کون شو هوتلده یشب توردیم.
مینینگ بو دنیاده تاپگنیم بیرگینه إیلینجیم سؤز و شعریت بؤلدی. قی بارسم شو بیلن آوونیب یشه یمن. مین شعر بیلن دردله شه من. او دردیمنی آله دی. شعر اؤقیسم یاکی یازسم إیچیم بؤشب اینگیل تارته من. شهرگه کیلیب آق، شاعرلیگیم توتیب، یوره گیم کؤچیب بیر شعر یازیب ایدیم. شو شعریمنی روزنامه آلیب باریب تاپشیریب، قئتیب ینه هوتلگه کیله قالگندیم. منه اوچینچی کوندیرکی مین هوتلده، انیقراغی هوتلدن تشقریده، آچیق آسمنان آستیده یشب توریبمن.
کیچ بؤلیب قالدی. آسمان قاره پلاسینی یرگه توشه دی. اذدهام، آدملرنینگ اؤتیب قئتیشی سیره ک لشدی. مین بو شهرده اؤزیمنی یالغیزده ی حس قیلدیم. اوچره شگنی، سؤزلشگنی هیچ کیم یؤق. یوره گیم ترسه یاریله یاتگنده ی. ینه باریب هوتل ایوانیده گی اؤت اوستیده یاته بیردیم. بیر عمللب کوننی تونگه اولب چیقیشدن بؤلک علاجیم یؤق ایدی. شو پئیت نیگه دیر، خیالیم بوزیلیب کیتدی، إیچیم قارانغوله شیب، غشله ندیم. نیمه قیلریمنی بیلمی،کؤزلریم النگ-جلنگ بؤلیب، قیسیدیر قرینداشیمینی کوته یاتگنده ی احوالگه توشدیم. اؤزیمنی تاباره اینگ یالغیز، اینگ بختسیز، اینگ یورتسیز حس قیله باشله یمن. غضبیم تاشیب کؤککه قره ب، باره ی توف اوردیم سینگه دیگیم کیله دی. سین دَیدی وطنسیزنی قبول قیله دیگن هیچ قنده ی آدم هم توپراق هم یؤق بو دنیاده، دیمن اؤزیمچه. اؤزیم بیلن اؤزیم آلشیب توریبمن. هلی هیچ کیم غالب بؤلگنیچه یؤق بو روحی جنگلرده. بیر پئت کیمدیر قؤلینی ایلکه امگه قؤئیب:« سین یلغیز ایمسسن! کیل غریبیم! سین هم شو یورت اؤغلانی سن! غم-غصّه یمه، هلی یاش سن، بیر کون سین هم بو ایلنینگ دردیگه درمان بؤله سن.إیشانیب ائته منکی،اونینگ بیتمس یره لریگه ملهم قؤیه سن بیر کون کیلیب. سینینگ إیچینگده کتته بیر اوقیانوس تؤلغنماقده. بیر کون کیلیب سینینگ قلمینگ تیلگه کیره دی. اؤزینگنی توت جگریم!»-دیگنده ی بؤله یپتی نظریمده. بو آووتیق سؤزلر مینی تینچلنتیریش اؤرنیده، تاباره روحیمنی کیمره یاتیر. اؤزیمنی بختسیزلردن قالگن تشله ندیق بیر کیمسه دیک تاپدیم. مین یوزی ساکن، بیراق، ته گیده تاغلرنی یوتیب یوباره یاتگن سوو اؤپقانیگه چؤکیب بارماقده ایدیم. یوزیم المدن بوروشگنده ی بؤلدی...بیر دردکش تاپسم-او، إیچیمده گی بار گپیمنی تؤکیب سالسم دیئمن. مین إیزله یاتگن دردکشلر یرنینگ آستیده...هوتل میدانچه سیده اؤزیمگه جای تاپگنیمگه شکر قیله من.
یانیمدن طوفان اؤتیب کیتدی. مینگه إیشی بارمیدی، یاکی شونچه کی کؤزدن کیچیردیمی مینی بیلمه دیم، کیمنیدیر کوته یاتگندی چمه سی. تشقریگه تیز-تیز کیریب چیقه دی. شوپئیت بیر قاره جیپ غیزیللب ، مین اؤتیرگن جای گه کیلیب تققه تؤخته دی. بیردن قوراللی تؤرت آدم مینی قورشب آلیب، قؤلیمنی آرقه امگه بایلب، کؤزیمنی قاره باغیچ بیلن محکم تارتیب باغلب، جیپگه تیقیشدی. هیچ نرسه سؤره مه دیلر، مین هم میق ایتمی حیرتله بؤزه ریب توره بیردیم کیته یاتیب. بیش دقیقه لیک وقت إیچیده آسمان کیلیب یرگه قه پیشدی. چقور اؤیگه تالدیم، میندن نیمه عیب اؤتگنیگه عقلیم یتمه دی. نی خطا قیلدیمکی، بو کویلرگه توشدیم دیگن سوالنی اؤزیمگه بیره بیردیم. جواب یؤق. مینی کتته سرایده جایلشگن بیر اداره گه آلیب باریشدی. تون ساعت اؤندن اؤتگن ایدی چمه سی. سرای میدانیده اؤریندیقلر قؤئیشگن، یرده بو حربی و عادی کیئیمده گی شخصلر درسنگ قورشیب گپ ساتیشه یپتی. سؤزلریدن شیره کیفلری بارگه اؤخشه یدی. قؤلیم و کؤزلریمینی آچیب بیر قارانغی خانه گه سالیب، اوستیمدن قوفلشدی. ایرته تانگ آتگونچه شو خانه ده توره بیردیم. نیمه قیلسم هم کؤز یومولمیدی. باشیمنی توتیب، اؤزیم بیلن اؤزیم گپله شیشگه انچه گینه فرصت تاپیلدی. خانه ده میندن آلدین هم کیم قنچه آدملر سؤراق قیلینگه نیگه شبهه قیلیب بؤلمه یدی. قنچه-قنچه آدملرنینگ آه و ناله سی اوی دیواریگه یاپیشیب قالگنده ی. نمیققن خانه دن شیپتیر هیدی انقیب دماققه اوریب توریبتدی. إیلان- چیانگه مهمان بؤلدیم بو تون، قورت- قومورسقه لرگه یم بؤلدیم شیکیللی، دیدم اؤزیمچه. قارانغی خانه ده بد بوی إیسلر شکنجه سیده هنسیره شگه توشدیم. خیالیمده مینی کوته یاتگن مأشوم واقعه لرنی کؤزدن بیر- بیرکیچیردیم. انه کیلدی، منه کیلدی سؤراقچیلر دیب توریبمن إیچیمده. «قیلمه گن عیبینگنی بؤینینگه آل»- دیب هر قنده ی قئیناققلرگه سالیشلردن تارتیب، اورش جبهه لریگه یوباریشگچه بؤلگن تقدیرنی مییه امده تصویرلب کؤردیم. هرکونی جنوبدن تینمی اؤلیک ته شیدیلر. نی-نی إیگیتلرنینگ عمری خزان بؤلماقده. باشیم قتتیق آغریقدن یاریلی دیب توریبتدی. راسه هیجان باسگن، باشینگی کونده قؤیه یاتگن چاغده اؤلیمگه تیک باریش آسان إیش ایمس. کونیم بیتدی، دیدیم اؤزیمچه. اؤیله گنیم تؤغری بؤلیب چیقدی - یاؤ!. مینی اوشلب تورگن جای«خاد»- مللی خوفسیزلیک» اداره سی ایکن. بو نامنی ایشیتیش نینگ اؤزی بیر دهشت. بو اداره حقیده ایشیتگنلریمنی ایسله سم اؤپکم اؤپریلیب آغزیمگه کیله دی. کیچه نی اوخله می، تیشنی- تیشگه قیسیب، تانگ آتتیردیم. کیچیکراق خانه نینگ إیچیگه غیره- شیره کونگی یاروغلیک آره لی کیتدی. سوراققه تارتیلیشیمنی کوتماقده من. بوتون وجودیمگه قلتیراق کیرگن. اضطراب زوریدن إیشطان هول بؤلگنده ی تویلدی.
تشقریدن قنده یدیر غیدیر- بیدیر تاووشلر قولاغیمگه إیلیندی. بیردن ایشیک آچیلدی. مینی سؤراق قیلیشگه آلیب باریشدی. «وجدان اینگ عادل محکمه ایکن، قاضی گه احتیاج یؤق»- دیگن یازوو دیوارده آسیغلیق توره ردی. چمه سی 28یاشده گی کیشی مینگه دوسیه آچیشگه کیریشدی. قلم قلپاقچه سینی تیشله یاتگن أیگت مینی سؤراققه توتدی.
- ائتچه! اسمینگ نیمه؟ سؤره دی او.
- آتیم خان، دیدم.
- نیچه یاشده سن؟
- منه شو بوگون 28 یاشگه کیردیم.
- قی یرده توغیلگن سن؟
- شو یورتده.
- نیمه إیش قیلیب یوریب سن؟
- محصل من، باشقه إیشیم یؤق.
- قیسی جمهوریتده اؤقیسن؟
- او...
- قیسی رشته ده تحصیل قیله سن؟
- ادبیّات.
- پاسپورتینگ قنی؟
- یؤق پاسپورتیم.
- نیمه قیلدینگ پاسپورتینگنی؟
- چؤزدیریش اوچون مرکزگه اؤرتاقلریمدن یوباریب ایدیم.
- افت و بشره نگ محصلگه اؤخشه میدی- کو! ساقالنی نیگه اؤستیردینگ؟
- شاعر طبعیت آدملر شونده ی یوریشنی یاقتیره دی.
- شاعرمی سن؟
- هه، اؤزیمچه بیر نرسه لرنی یازیب یوره من.
کؤرستگیچ برماغینی ایه گیگه تیره ب توریب، مینگه بیر اؤقره یدی سؤراقچی
أیگیت.
- ایندی حقیقتنی ائته سن!
- بؤله دی، ائته من حقیتنی.
- مجاهد می سن؟
- یؤق.
- پاکستانلیک می سن؟- دیب جهل بیلن سیگریتینی یوزومگه پورکه دی.
- یؤق، مین اوغانستانلیک من.
- جاسوس-ائغاقچی ایمس می سن؟!- قاشلرینی چیمیرگنچه اؤرنیدن توردی و
بیلکلرینی توره باشله دی.
- بو نغمه لرینگ اؤتمیدی تینتیک!- عضب آهنگیدن موشتینی میزگه اوریب،
دؤنغیلله دی.
- عیبیم یؤق، دیدم رنگیم بؤزده ی آقریب.
- توره تور، حاضرسینی سره یته میز،- مینگه یقین کیلدی- ده، برماغینی بیزگیز قیلیب چککه مگه تیره دی و سیره ککینه ساقالیمدن اوشلب دیوارگه گوپیلله تیب اوره کیتدی. تیرسه گینی کؤکسیمگه قؤیب توریب نیقته ی باشله دی،- تیلینگ چیقندیر ایندی!
- تنگریگه آنت إیچیب ائته منکی مین ائیغاقچی ایمسمن، پاکستانلیک هم ایمسمن، مجاهد هم، دیم اونگه.
اونینگ تیلیدن«ایندی قولاغینگ توبیدن دریچه آچه من» دیگن گپ چیقه یاتگنگه اؤخشب توریبتدی.
- بونی آلیب کیت ایندی- دیب ساقچیگه قیچقیردی. «خوب بؤله دی»- دیه ترق سلام قیلگن ساقچی مینی قؤللتیقلب اولگی جایمگه ایلتیب قؤیدی. قؤشنی خانه لردن وحشتلی آوازلر ایشیتیلبیب توریبتدی. گرس- گورس، ترس- تورسلر آره سیدن نالیش، إیغره نیش، داد وایلر ایشیتیلماقده ایدی. میننگ هم شونده ی احوالگه توشمسلیگمیگه هیچ قنده ی کفالت یؤق. قاله بیردیم شو یرده، مینگه نوبت یتمه دی شیکیللی.
إیککنچی و اوچینچی کونی هم سؤراق قیلیندیم. هلی اشدی قئیناقلر باشلنگنی یؤق. اولر کوتگن حقیقتنی بجریب ائتیب بیره آلمه دیم. بو آره ده إیککی کون تنفس- دم آلیش کونی کیلیب قالدی. همّه لری اوی- اویلریگه کیتیب قالیشدی. بیش کوننی اضطراب بیلن باشیمدن کیچیردیم. دوشنبه کونی ایدی. بو یرده قنچه قالریمنی بیلمه یمن. إیککی إیش بؤلیشینی انیق سیزیب توریبمن. یا آلیب باریب آتیشه دی یاکی اورشگنی جنوبگه یوباریشه دی. اؤشه کونی «خادمات» ده گیلر إیشگه کیلیشدی. بویاغیگه تیلیم سؤزگه بارمه سه کیره ک، دیماقده من اؤزیمگه اؤزیم.
مینی میدانگه آلیب چیقدیلر. کؤزیم آق کؤیلکلیکلرگه توشدی. تابیم قاچگه نیدن، دوکتور چقریشگن شیکللی، مینی داوله سه لر کیره ک، دیگن اؤیگه باردیم. بیر آق کؤیلیک لیک میندن «بیلگینگنی آچ قنی»- دیدی. بیلگیمنی شیمه ریب ایگنیمنی توردیم. إیگنه نی تامیریگه تیقیب، بیر لیترچه قانیمنی آلیشدی. رحم و شفقتی کیلیب می، دوره سالیب اؤتیریشگن خادچیلر یانیده سفه گه اؤتیرغیزیشدی. اؤتیریشگنلر مینگه پیچینگ، کیسه تیقلر قیلیشیب إیلیماقلی گپلردن آته یپتیلر. شو آره ده پسته چی روزنامه نینگ ینگی سانیدن بیر نیچته نی تشلب کیتدی. روزنامه نینگ إیلک صفحه سیده«بیر قیغولی خبر!»- دیگن سرلوحه گه کؤزیم توشدی. قره سم خبر آستیده ته نیش آدم نینگ عکسی باسیلگن. «اؤرتاق طوفان بیوقت عالمدن اؤتدی» جمله سی اعتباریمی اؤزیگه قره تدی. قیزیقسینیب اؤقیماقچی بؤلدیم. مین بیلن همسفر کیلگن طوفان- کو بو عکس دیدیم إیچیمده. قؤرقو باسگه نیدن ساووق تیر یتیمدن جیمرلب چیقدی. إیش په چوه بؤلدی، دیدیم یوره گیمده. بونی هم مینگه تؤنکه شسه- یه، دیگن اؤی مییه مده کیچتدی. بو خبر، اوچینی اوچه کیلتیره یاتگن نرسه ایمس مینینگچه ...
قان یوقاتگنیمدن سیلله ام قوریب، إیقی لی- إیقی لی، دیب قه لغیب کیته یپمن. اولر هم روزنامه نی آلیشیب اؤقیرکنلر، اؤز ارا پیس- پیسلشگه توشیشدی. تام جیملیک حکم سوردی. ایندی قباقلردن آقیب توشه یاتگن غضب مینگه یؤنه لمس ایدی. کؤزیم روزنامه نینگ إیککینچی صفحه سیگه تیگدی. نی تیل بیلن ائته ی کی، مینینگ، عینن اؤزیم نینگ عکسیم، عکس آستیده یقینده گینه یازگن بیتته شعریم باسیلگن روزنامه ده. قرشیمده شوم تقدیر، تیپه امده اؤلیم سایه سالیب تورگن بیر کیزده شونده ی واقعه نی کؤره من، دیب سیره اؤیله مه گندیم. قؤرقو و قوانچ اره لش حسلر تنیمنی چؤلغب آلدی. بی اختیار:
- خادچیلرگه«تاپتدیم، منه پاسپورتیم!»-دیب بقیریب من.
جرآتیم کیلیب، شاشه- پیشه روزنامه نی توتقزدیم اولرگه.
قؤلیمدن روزنامه نی یولیب آلرکن آلرکن:
- بوسینمی- دیه جیلمه یدی سؤراقچیلردن بیتته سی.
- هه! مین دیدیم. مین هم شو وطنینیگ بیر دربدر اؤغلیمن. اونده کیچه یاتگن قان تؤکیشلر، شورلیک اؤلیم مینینگ هم إیچیمدن اؤته دی. بیرگینه اؤته دی ایمس، روحیمنی ققشب آغریدی. هر بیراؤق اول مینگه قره ته آتیله دی، تغین باشقه لرنی اؤلدیره دی. مین بو یاووزلیکلر یره - داغینی سؤز بیلن یوویب تازه لی دیمن. خلقیمنینگ یوزیده گی امیدسیزلیک، شورلیک، قاره داغلرنی شو سؤز بیلن اریته ین ی دیمن...
مینگه معنادار قره شلر بؤلدی.کوتیلمه گن بیر وضعیت وجودگه کیلدی.
- عذر توشونماوچیلیک بؤپتدی،-دیدی بایه گی سؤراقچیلردن بیری مینگه.
- اؤقیب کؤردیک شعرینگزنی، سیزده فقرالیک پاسپورتی ایمس، انسانیلیک برهانی بارایکن، دیدی خوش بیچیمگینه بیر کیشی.
- میلی حیات ایکن...، دیدم مین اولرگه.
- پاسپورتینگیز کیلگونچه منه بو حجّت بیلن سیز بی ملال شهرده یشب یوریشگه حقلی سیز شاعر دوستیم،- دیدی خادچیلردن بیری.
مینی اؤشه جیبپگه سالیب، ینه قئتیب هوتلگه آلیب کیلیب قؤئیشدی. هوتل محصللردن لیققه تؤله ایدی. همّه بار بو اطرافلرده بیر اؤشه طوفاندن درک یؤق.
۲۰۱۲/۹/۱۶
کانادا