بوگون او إیشدن کیتدی. إیشدن- ه؟!.. هه،هه، إیشدن کیتدی دیپمن مین سیزگه...بقیرگنیم یؤق. مین بار یؤغی اونینگ إیشدن کیتگنیدن خبر بیره یپمن. شو تابده گی کؤنگیل حالیم اونینگ إیشدن کیتگنلیگی حقیده گی خبر مضمونیگه ماس. تؤغریراغی، خبر مینی اؤز سجیه سیگه کؤره سازلب آلدی گویا. شونینگ اوچون هم سیزگه بقیره یاتگنده ی تویولگن بؤلیشی ممکن،اصلیده اونده ی ایمس. اخر، بیر کون سیز هم، مین هم، خلــّــص، همّه میز إیشدن کیتیشیمیز ممکن-کو...(اؤشنده کیره ک بؤپ قالر بلکی بو گپلر). «قه یاققه؟»- دیئسیزمی؟...بیلمه دیم. همّه گپ شونده بؤلسه کیره ک. درحقیقت، إیشدن کیتگندن کیئین آدم قی یاققه باره ر ایکن؟..إیشلب توریب اؤلیب قالسه، اونینگ قی یاققه باریشی معلوم: ... چین دنیاگه. لیکین اؤلمسدن بورون إیشدن کیتسه-چی؟ کیئین نیمه بؤله دی. او إیشدن قی یرگه باره ردی؟..

شونده ی قیلیب، او إیشدن کیتدی. قیرق إیل إیشله گن، قیرق أیللیک عمری اؤتگن جایدن کیتدی...او قنقه جای، إیشنینگ نامی نیمه، کیملر بیلن إیشله گن ایدی، دیگنگه اؤخشش یوزلب سواللر بو اؤرینده اهمیتلی ایمسدیک. نیمه اوچون إیشدن کیتدی، اؤز اختیاری بیلنمی اختیاریگه قره می کیتیشگه مجبور قیلش دیمی، کیکسه ئیب، إیشگه یره می قالگنی اوچوندیر، بلکی... اؤیله یمنکی، بولرنینگ جوابی هم جوده مهم  کؤرینمه یدی. چونکی، همّه قچاندیر قنده یدیر سببگه کؤره إیشگه کیردی وقتی ساعتی یتیب اوندن کیته دی. خوددی توغیلیش و اؤلیشده ی بیر گپ بو. پستانچی اؤلیبتدی، دیئیشسه، درراو«نیمگه؟» دیب سؤره شه میز. «فلان- فلان» سببگه کؤره دیئیشگنیدن سؤنگ،«اگر اؤشه سبب بؤلمه گنده تیریک یوره ردی» دیه همدردلیک بیلن بیله غانلیک قیله میز. تؤغری، بؤلیشی ممکن. مثلن، اگر او اناو کونی حقیقتدن هم اؤشه سه ول ماشینه گه اؤتیرمه گنده، اوفته هلاکت  صادر بؤلمسلیگی ممکن ایدی. بیراق او قچاندر اؤلر ایدی. اؤشه کونی بؤلمسه ایرته سیگه باشقه سبب بیلن، ایرته سیگه اؤشه سبب بیلن اؤلمسه، إیندینیگه ینه اؤزگه بیر سبب بیلن... ائتماقچیمیزکی، اؤلیم- مقرر. همّه میز مذکور فکرده یکدلمیز. خوددی شونده ی، او یاکی بو آدمنینگ بیر کون کیلیب إیشدن کیتیشی یاکی إیشلب توروب آمانت جانینی یره تگنگه تاپشیریشی طبیعی حال. بونگه شبهه یؤق...توبه، توبه...تغین اؤتلب کیتدیک، چاغی...

3

شونده ی قیلیب او إیشدن کیتدی... إیشخانه دن کینگ و کتته کؤچه گه چیقرکن، اؤزینی غریب، افتاده حال سیزدی. اویگه بارمسدن قراوسیز إیتدیک شهر کیزدی. شونده او اؤزینی حقیقتدن هم کیره کسیز و تشله ندیق حس قیلدی. اولکن کؤچه لر بؤیلب قد کؤترگن  آسمان اؤپر بیتون اویلر خوددی اونگه قره ب باستیریب کیله یاتگنده ی دهشتلی تویولدی. إیلگری هیچ بولرنی پئقه مه گن  ایکن. اخر هر کونی شو اویلر آلدیدن اؤتر ایدی- کو، نیگه فقط ایندیگینه اولربیگانه دیک، شفقـتسیزدیک تویوله یپتی. قنی اولگی مناسبت، قه یاققه کیتدی، نیگه کیتدی؟!..

اویگه ایسه اونینگ اصلا کیرگیسی کیلمه یاتگندی. یوره گی داو بیرمه یاتگندی، تؤغریسی. اخر، اؤغلی قیزینینگ بیری چیت ایلده، باشقه قؤشنی شهرده یشه شه دی. اولر عایله قوریب، اؤزیدن تینیب- تینچیب کیتیشگنیگه کؤپ بؤلگن. خاتینی حیاتیلیگی پئتیده بیر کیلیشسه کیلیشردی، بؤلمسه تیلیفون بیلن آق قرینداش چیلیک بورچیدن آسانگینه قوتولیب قؤیه قالیشردی. اوزاق أیلی عیالی قضا قیلدی. شوندن بیری یالغیز ایدی. بیراق او اؤز یالغیزلیگینی منه بوگون- إیلک مرته حس قیلیب توریبتدی. إیلک مرته دوچ کیلدی اونینگ کیئیمسیز قالگن جؤجه بیردیک جانی ایاوسیز تنهالیک شمالیگه... حال بوکی، انچه دن بیری سؤققه باش و قاراوسیز ایدی. بیراق بوگون... باشلنگنگه اؤخشه یدی اونینگ چینه کم کیمسه سیزلیگی...

4

کیزه- کیزه، تورتینه- تورتینه  هاریب- چرچب، نهایت، او اؤز اوئی آستانه سیگه کیلیب قالدی. یوره گینی وهم باسدی. بیراق، نه چاره، اونینگ کیسه سیدن کلید آلیب، ایشیکنی آچیشدن اؤزگه یؤلی بارمیدیکی، تغین إیککیلنسه... یؤق-ده... إیچکری کیردی. بوتون دنیاسینی  قارانغیلیک چولغب کیلدی-إیچکری کیردی- شاشیلیب چیراقنی یاقدی. کیئین باشقه خانه لرنیکینی هم بیرین-سیرین یاقیب چیقدی. حتا، حاجت و چؤمیلیش خانه سینی هم چراغان قیلیب قؤیدی...الـله محلگچه یاتمه دی، اؤیله نیب- سیقیلیب اؤتیردی، یوردی، اوستمه- اوست سیگریت چیکدی. اسمسیز المنینگ اوج پلله سیده ایسه کؤزلریگه یاش هم چیقدی: «ایندی نیمه بؤله دی؟ قنداق یشه یمن؟» دیگن غایت خواطرلی سوال مییه سینی ایاوسیز چؤقیردی...

نهایت، تانگگه یقین چرچاقدن کؤزی إیلیندی...قنچه اوخله گنینی بیلمه یدی. بیر محل قولاغیگه قوشلرنینگ شادان چوغور-چوغوری کیردی، شو همانا یوزیگه توشیب تورگن قویاشنینگ یاقیملی تفتینی تویدی. هه، عجیب بیر فراغت اویغاتگندی. تؤنینی ایلکه سیگه تشلب، استه تشقری یوردی. معجّزگینه حاولیده قد کؤترگن بیر جفت اؤریک قئغاچ گلله گن- تینیمسیز سیره ب تورگن قوشلر هم، او گلدن بو گلگه اوچیب-قؤنیب غؤنغیلله شنی باشله گن عسل اریلر هم اونده ایدی. اطرافده آنه - زمینینگ، کؤکلمنینگ، اولوغوار کوچ - حیاتنینگ بویی(إیسی) شونداق اوف اوریب یاتردی. و عجب... نخاتکی، او آلدین بولرنی کؤرمه گن بؤلسه؟ .. اخیر او قریب قیرق أیلدن بیری  شو حاولیده یشه یدی، اناو درختلرگه هم کمیده شونچه بیرسه بؤله دی، لیکین او نیگه بولرنینگ بیرانته سینی پئقه مه گن بوگونکچه؟..

چمه سی، او بیر زمانلر- بونگه کؤپ بؤلگن-باله لیک چاغلری ایدی او پئتلر- همّه سینی کؤره ر و حس قیلردی. ایرته لب اونی یا قویاش النگه سی یاکی بؤلمسه منه شونقه چورجوق قوشلرلرنینگ بیر- بیریگه گپ بیرمی سیره شلری اویغاتردی- ایسله یدی. کیئین...کیئین او فقط شهرنینگ، کونده لیک و أیللیک ریجه لر تشویشی بیلن کؤز آچیب یوموشگه عادتلنگندی. بوگون ایسه اولر قه یاققه دیر چیکینگنگه اؤخشه یدی: اونینگ قریب قالگن بدنیگه  تغین قویاش نینگ تفتی یاقه یپتی، تغین اونینگ یریم بیتیب قالگن قولاقلری قوشلر قؤشیغینی ایشیتیب راحتله نه یپتی.

 کیچه گچه او شو یردن قویاش نورلریگه چؤمیله یاتگن درخت گللری نینگ ته گیدن کیته آلمه دی، سیراقی قوشلرنی ترک ایته آلمه دی، یر چاپتیدی، گللرنی یاوایی اؤتلردن تازه له دی، اولرگه سوو قویدی... نهایت شام توشدی. او هم هارب چرچه دی. کیتماننی بیر چیتگه قؤئیب، موسلوکده یوز قؤلینی یوودی، ایلکه سیگه ساچیقنی تشله گنچه کیلیب سوپه گه چؤکدی. کیکسه نگاهلرینی ایندیگینه نیش اوریب تورگن- درخت گللر، اؤت و اؤلنلر اؤسگن کفتدیککینه یر میدانیگه تیگدی. اوزاق وقت شونده ی اؤتیریب قالدی. شونده کیمدیر اونگه «سین یالغیز ایمس سن!..» دیه یاتگنده ی بؤلدی...بیر سیسکنگنده، قؤزغه لیب یوردی. دماغیگه سوو سیپیلگن توپراقنینگ بهار اره لش هیدی اوریلدی. کؤنگلی بیر کؤتریلیب توشدی. لیکین اؤزینی توتدی. درختگه یقینله شیب، اونگه خوددی آدمگه قره گندیک قره دی. بیردن باطینیده نیمه دیر کؤچدی...کؤچدی- یو، اؤزینی درختگه تشلب، اونی محکم قوچگنچه اوولیگه اونسیز، کیئین نیگه دیر پیقیللب أیغلب یوباردی. اوزاق، جوده اوزاق وقتدن بیری کؤزلریدن بیرتامچی یاش چیقمه گن بو قریه ایندی ایلکه لری سیلکینیب-سیلکینیب، إیچلری اغدریلیب-اغدریلیب أیغلر، أیغله گن سری بوتون عمر أیغیلگن قتلم- قتلم ستملری کؤچیب کیله یاتگنده ی بؤلردی...

اؤزیگه همراه سوینچیقدیک تویولگن درخت گوده سیدن قؤللرینی آلگنده، کؤنگلی چراغان ایدی. حال بوکی، اطراف اونینگ سیاهیگه چؤمیلگندی، بیراق ظلمت یؤق ایدی بو کیچده...

بوآره وقت إیلگریلب کیتگندی. استه یوریب اویگه کیردی، قارنی آچیققه نینی حس قیلسه هم چرچاقدن کؤزلری یومولیب باره یاتگندی. زورغه خوابخوانه گه یتیب آلدی-ده اؤزینی اؤرینگه تشله دی. اویقونینگ تؤریگه غرق بؤله یاتگن شعوری ایندی خانه لر چیراقلرینی یاقیب قؤئیلیشگه احتیاج سیزمه دی.