حکایه
اوشـَــلمه گــن آرزو
انقلاب بؤلدی... کاروان- کاروان موترلر تیزیلیشی، شهرلر ارا شوروی نینگ قیزیل عسکرلرینی ته شیماقده ایدی. هواده تیک اوچرلر گیر- گیر ائله نه دی، بمباردمان قیلوچی اوچقیچلر تینمسیز پروازده. یشش اؤز توسینی یؤقاتگن بیر احوالده دوام ایته یاتگندی. اؤشنده کمونیستلر یاشلرنی شورویگه یوباریب اؤقیتیش سیاستیگه شدت بیردیلر. مینگ - مینگلب محصللر تحصیل اوچون ساویتلر دیاریگه یؤل آله باشله دی. کؤپلر قطاری اجملگه هم شورویگه باریب اؤقیش نصیب ایتدی. او إیککی هفته برون قیسی شهرده اؤقیشینی بیلیب آلدی. ساویت اتفاقی نینگ باش کینتی اولک شهر مسکوگه اوچیش آلدیده توریبتدی. او مسکوگه اوچه دی، هه مسگوگه... مسکوه نی إیچ- إیچیدن ساغینیب تورگنی اونینگ کؤزلریدن بیلینردی. هوشیده هم توشیده هم مسکوه. بو کتته شهر اونینگه روحیگه فراغت شباده لرینی آلیب کیره یاتگنده ی گویا.
هر کیچه ماسکونی توش کؤره دی. قره سه کی، توشیده شهر کؤچه لری بؤیلب ائله نیب یوریبتدی، آیاقدن تالگونچه سیلگاه لرنی کیزه دی. چرایلی طبعیت منظره لرینی کؤریب، خیالیدن کیر نرسه لرنی چیقریب تشله یدی. قوناق بیر کیفیت بیلن دانگدار اونویرسیتیت پارکیده، گاوجوم طلبه لر آره سیده کیریلیب تورگن. کیمس، دیسه اجملخان. قیزغلداقدیک ملله ساچ روس قیزلری دوره سیده شمشاددیک بؤی کؤرسه تیب توریبتدی. گؤزه ل قیزلر قیقیرله شیب اجملنی اؤرته گه آلیشگن. اجمل درو هم إیچکوی قیلیب، چؤنته گیدن مرلبرو سیگیرتینی یاقه سالیب چیکه باشله یدی. آلفته گرچیلیک قیلیب قیزلرگه هم سیگرت اوله شه دی. قیزلر إیسه خوددی، «اجملجان مین بیلن کیت، بو کیچه مین بیلن بؤله سن،مین بیلن قاله سن اجمل!»- دیه یاتگنده ی. او بؤلسه قیزلرنی بیر- بیر بیلیدن قوچیب بغریگه باسه دی. اجمل دیسکوتیکده، تونگی کؤنگیل آچیر بزملرنینگ اؤچمس چیراغی بؤلیب توریبتدی. شیرین خیاللر آغوشیده مست - الست. قؤلیده کان یاک سالینگن قدح یریم یاریتگیچ نورلر آرتیدن شوخ- شوخ تاوله نه دی. گــَـلی کیلگنده قدح المه شیب، یاشگینه، آق بیلک قیزلرنینگ قؤلیدن شیمیریب- شیمیریب شراب إیچه دی. یوزلریدن کیفی تاشیب کیتگن بیر کؤرینیشده. تونلری سیوگی میــیدن تؤیب- تؤیب سیپقرماقده. اؤرس قیزلر نی تاتیب- تاتیب، آخری چرچب- چرچب ناز اویقوگه کیته دی. اویقوسیده، چرچاق تنه سی اوزره إیپکدیک مه ئن برماقلر اؤرمه له یدی. رانلرینی اوقه لب اوخله ته دی قیزلر. بیریاقدن قیزلرنینگ اوپاری ساچلری قیتیقلب اویغاتسه، باشقه یاقدن، اولرنینگ آلاودیک نفسی اجملنی مودره تردی...خماری ترقه ب اؤرنیدن توره دی. بؤینینی إیلان دیک آق بیلکلر قوچیب آلگن. او گاها دریا بؤیلریده یاقه لب یوره ر، چه چه اوریب چوغورله یاتگن سیراقی قوشلرگه قولاق آسه دی. چه یقله یاتگن دینگیز تؤلیقینلریگه بغرینی آچر، شاووس قویله یاتگن یاغمیر بیلن اؤیه شر، روس ودکه لری خماریدن تؤمسدی. ینه اؤزینی اؤشه آق پریلر اؤرته سیده تاپر ایدی او...توش کیتیدن توش.
سفر تا باره یقینلشماقده ایدی. اجملنینگ إیچی قوم- قومله یدی. یوره ک اورشی تیزلشماقده. سناقلی دقیقه لرده همّه إیشینی بیتیریب، اوچیشگه شی بؤلیب تورگیسی کیله دی...
شو کونی کابل دکانلرینی ائله نیب، اؤزیگه کیره ک نرسه لرنی ساتیب آلدی-ده، بکسیگه جایلشتیردی. آلدین ساتیب آلیب قؤیگن بیر درجن عطر، تؤرته ماوی رنگ کابای پطلوننی هم چرم بکسگه زؤرغه تیقدی. قیزلرگه اته لگن ساوغه لرنی بیر سیدره کؤزدن کیچیردی. برچه إیشلری سرانجام. جمعه کونی اوچیشی کیره ک. ایرته لبدن پایتختده گی طیاره لر قؤنلغه سیگه یتیب آلدی... محصللر بیرین -کیتین پیلله پایه چیقه باشه یپتی. اجمل هم اوچاققه چیقیب اؤریندیققه اؤتیریب آلدی. طیاره اوچیشیگه چاغله نه یاتگندی. کابلدن کؤرتریلگن ایرپلوت کؤمکؤک آسمان بغرینی سؤتیب بلندلب اوچه باشله دی...
2
مسکوه قؤنلغه سیگه باریب توشرکن، اجمل کؤزلری النگ- جلنگ تیوره ککه تیکیله دی. إیچیده«کؤرگن قاره کونلریم آرتده قالگنی راست بؤلسین الهیم»- دیه شکرانه ائتدی. تغین إیچیده مسگوه شانیگه إیلیق سؤزلر ااظهار ایتدی:
«...مینگه قوچاغینگنی آچیب، کیل فرزندیم اجمل جان!»- دیه قبول قیلگنینگ اوچون منتدارمن، دیدی ...
شوکونی اجمل باریب یاتاقخانه گه جایله شدی. ساولت تؤکیب تورگن اؤن سککیز قبنلی یاتاقخانه اجملنی خوش قرشیله له دی. اؤشه زمانلر کیشیلرنینگ کؤنگیل قتیدن جای آلگن الــله پوگه چوه نینگ«الی خروس» ایتالینچه«پیری چیته!» اشوله لری بلند آوازده ینگر ه ر ایدی. یاتاقخانه تورلی مملکتلردن کیلگن طلبه لردن لیق تؤله. اجمل تماشا قیلگنی لیفتدن پستگه توشدی. یاتاقخانه ایشیگیده توردی. کیرگن- چیققنگه کؤز قیری تشله ماقچی بؤلیب، سیگرت توتونلرینی هواگه پورکب، آیاق اوستیده توریب قالدی. کیچ پئت بؤلدی دیگونچه اؤغیل باله لر اؤزلری بیلن اؤرس قیزلرینی ایرگشتیریب، خانه لریگه آلیب کیره دی... هر بیر باله ایتاویده بیر پری قیز. یاتاقخانه ده اجملنینگ دماغیگه درس- تعلیمدن کؤره، شوخلیک، عشق و مجبـت، اؤینب قالیش هیدی انقیب اوره باشله دی. خیالینی کؤموش بدنلرنینگ شوق و ذوقی ، آرام بخش لذتی ضبط ایتب تورگن. خیالنی قمچیلشگه قیتته- قیتته یتمی یبتدی. تؤعریراغی، شیطان سووینی قی یردن ساتیب آلیشنی هلی بیلمی توریبتدی.
ایرته سی توریب-آق، آوگه چیقدی. قیزلرنی آلوشگه. قره سه کی، اؤرس قیزلر نی رام قیلیش اوچون کتته تیارگرلیک، اونچه تیل بیلیش هم کیره ک ایمس. هر درختنی سیلکیتسه قیرقته قیز تؤکیله ی دیب توریبتدی خیالیده. إیچیده تؤقیگن ریجه لری« خوددی، اوّل مینی بجر، اوّل مینی بجر، میندن باشله ی قال بارینی» دیگنده ی اونگه تین بیرمه یپتی. کؤنگلیده توککن نیتلرینی دستلب إیچیشدن باشلب یوباردی، کیئین قیزلرنی تاتیشگه اؤتدی. پالیزگه جیره داریگنده ی قیزلرگه اؤچ. قیزسیز کیچه لر او اوچون یات ایدی. قؤشیله -قؤشیله، اؤته حالسیزله نیب، بؤکیب قالگندن سؤنگ، سره له یاتگن بؤلدی قیزلرنی. اینگ آخری«گؤزه ل مسکوه، بوتون شوری» عشق و محبّت وطنی ایکن، دیگن خلاصه گه کیلدی او. معیشت نینگ چیک وچیگره سی یؤق. سوسیز ققره ب یاتگن چولده ی، اجملنینگ هلی بیری سیراب بؤلگیسی یؤق. إیچگن سری إیچگیسی، تاتگن سری تاتگیسی کیله دی.
عشق بابیده اجمل توشیده گیدن کؤره هم یوکسک راق بیر مرّه لرنی قؤلگه کیریتدی. آرزولری دیرلی اوشلدی. بیر کم دنیا دیگنلریدیک، اینگ گؤزه ل اؤرس قیزیگه اؤیله نیش اجملنینگ بیردن- بیر آرزوسی بؤلیب توریبتدی. کؤرینیشیده، شوندن کیئین آتینی سیکن راق هیده ماقچی، عرابه نی موربتراق تارتیشنی کؤنگلیدن اؤتکزماقچی. آرزولب یورگن، اؤزی إیسته گنی، آنه سی اؤپمه گنیدن تاپتدی. شونده هم کؤچه لرده إیزغیب آو قیلیشدن تایگنی یؤق.
اجمل قاتمه دن کیلگن، کؤزلری چوقور - چوقور. قولاقلری سفره ده ی کتته - کتته. ایلکه لری یایئیق، اؤسیق قاشلری چه تیشگن، لبلری قه لین، کؤکسینی جون باسگن. کؤکیش خالدار کؤیله گینینگ إیککی توکمه سینی قده مه گن. دؤندیققینه سیر توک أیگیت. چخچه یگن کؤزلری تیوره ک -اطرافنی کوزه تیشده چرچه مه یدی.
اؤقیشنینگ بیشینچی إیلی ایدی. اجمل لینه خاننی تاپتدی. اولر بیلن سیویشیب تورموش قوریشدی. گؤزه للرنینگ گؤزه لی لینه گه یته دیگنی یؤق. سو إیچسه تاماغیدن کؤرینه دی... کؤزلری ماوی- شیشه رنگ. بؤیی بلند، قئیلگن قاشلری کمه لکده ی موزون. نگاهلری قاره متیر کیپریکلری آره سیدن کؤککه قده لیب توره دی. معنالی جیلمه گنده تورقیدن حیا یاغیله دی. سوتگه چیقلگن آپپاق یوزلری بار. تؤلیشگن کؤکره گیدن إیککی کبوتر کؤککه پرواز قیگودیک بؤلیب توریبتدی. آپپاق کؤکسیی اوزره آلتین زنجیر یلتیللب پارپلب تورگن. سلماقله نیب گپیرگنده تیلیدن بال تامه دیک ذات. سوینگنیدن اجملنینگ آغزی قولاغیده. ایرکه لب- ایرکه لب تیز-تیز شیرینگینه لبلریدن چؤللپیلله تیب اؤپگنی اؤگن. قالگنینی خیره نورلری آستیده کؤرماقچی...
3
بیر أیل اؤتر اؤتمس ساویتلر توزومی انقراضگه یوز توتدی، توزوم چاک- چاکیدن سؤکیله باشله دی. اتقافداش جمهوریتلر اؤرنیگه مستقل دولتلر قد کؤتدی. اجمل و لینه لر قورگن محبّت اویی همان کؤرکم. بختیار حیات قوچاغیده توفانلرده ایگیلمس چیناردیک، یه ئیره ب، یشنب یشه ماقده ایدیلر.
کمونستلر دوریده گی اؤلچاو و قدریتلراؤز جاذبه سینی یؤقاته باردی. شوندن کیئین اجمل قدرتلی دولت پایتختی بؤلمیش مسکوه گه سیغمه ی قالدی. حجتلری اؤتمه یاتیر. لینه خان هم اجملسیز یشه ی آلمه یاتگن بؤلیب قالگن. بیر- بیریگه وفادار سیویشگنلر هر قنده ی وضعیتده هم سویه شیب، بیر-بیریگه تیره شیب یشماقچی. اجمل مسکوه نی ترک قیلی دیب تورگن پئـتده، کؤنگلیگه قیل سیغمی لینه گه معنادار قره ب دیدی:
- شیرین و تاتیو حیاتیمیز بار شکر. مینی ایندی مسکوه دن چیقه ریشه دی. قنده ی فکر و مصلحت بیره آله سن عزیزیم.
- سینگه تیککه نیمدن خورسندمن. سین مینینگ یوره گیمدن چقور اؤرین ایگلله گن سن جانیم. بو تنگلیکدن چیقیشگه بار کوچیمیزنی إیشگه ساله میز، دیه ایرینینگ کؤنگلینی کؤترگن بؤلدی لینه.
- نیمه قیلسک ایکن؟- حسرت بیلن سؤز آچتدی ینه اجمل.
- مین سینینگ قانگه باتیب یاتگن وطنینگه باریش نیتیم یؤق. حتـّا، سینی- ده، باریشینگنی خواخله میمن.
- مینینگ هم اؤشه یاققه باره ی دیب کؤزلریم اوچه یاتگنی یؤق. نیمه قیله سن المینی ینگیلب، بؤله دیغانینی ائت لینه! نیمه قیلیش کیره ک؟
- بیتته یؤلیمیزبار،- لینه باسیق،هیجانسیز بیر حالتده گپینی دوام ایتتیردی،- اوهم بؤلسه، مسکوه ده گی بیرلشکن مللتلر تشکیلاتی نینگ قاچقینلر اداره سیگه باش اورشدیر. اولردن باش پناه سؤره یمیز.
- سؤزلرینگده جان بار، حاضرچه قؤلیمیز إیلینه یاتگنی انه شو. میلی سؤزلرینگگه قؤشیله من. شونده ی قیله میز. ایرته سی یاق، باریب مشکیلیمیزنی اؤته گه قؤیه میز دیدی اجمل.
- سین بوگون ساغلیگینگگه قره تگنی دوکتورگه بارگین خوبمی. کون سائین سیلله نگ قوریب باره یپتی. روحینگ چؤککن کؤرینه دی، اؤزینگنی آلدیریبسن.
ساغلیغینگنی اوَیله. بیله من، سیزلرنینگ فرهنگلرینگیزده کؤپ نرسه گه اهمیت بیرمی قؤیدینگ. بیلیب آلدیم، عقلدن کؤره سیزلر کؤپراق حسّیات بیلن یه شه یسز. سیر جهل بؤله سیزلر. بونی توشینه من. سیزلرده دردنی درمان قیلیشدن کؤره اونگه آخرگی نقطه نی قؤئیش افضل توره دی. بیرینچی سؤز اؤرنیده سیزلر دایم آخرگی سؤزنی ائته سیز. نسبیت بیلن چیقیشه آلمیسیز. همه نرسه نی مطلق دیب توشینه سیز. مطلق دیب توریب آله سیزلر. بو سیزنینگ ازلی طبعیتینگیز و تربیه اصولینگز.
- شونده ی بیر قالاق یورتگه منسوبلیگیمدن عارلنمیسنمی لینه؟
- یؤق عزیزیم. روسلرنینگ مدنی قتلمی کتته معنوی بائیلیک زمینیده وایه یتگن. اولر عموم بشری قدریتلرگه سویه نه دی. آته -آنم مینگه شونده ی تربیه بیرگن. شولر حقیده کؤپراق اؤیله یمیز. مینینگ سینگه کؤنگیل قؤئیشیم هم منه شو نرسه لرگه باریب تقه له دی. بیز اؤرسلر سؤنگگی سؤزنی اؤز جائیده ائته میز.
- سین حجّتلرنی تیارله، مین یسه کسلخانه گه بارین،- خاتینی نینگ آغزیدن لبلرینی باتتیریب اؤپتی-ده، خیرله شیب تشقریگه چیقیب کیتدی اجمل.
4
بیش آیگه یتر- یتمس اجمل و لینه لر قاچقینلیک مقامیگه ایریشدیلر. اجملنی مسکوه دن هیده ب چیقریش قیستاوی هم توگه دی. یر- خاتین آسایشته لیک بیلن یشب یوره بیردیلر. اجملنینگ اوشلمه گن بیتته گینه آرزوسی قالگندی. لینه بیر کونی شیره کیف اجملگه تیکیلیب :
- تبریکله سم میلمی جانیم؟ - دیدی.
- نیمه بیلن ؟ جواب قیلدی اجمل.
- منه آته بؤلیدینگ عزیزیم،- آلماسدیک برماقلری بیلن قارنینی سیلی بیردی،- تبریکله یمن اولوغ بخت بیلن.
- قیزمی، اؤغیل؟
- خدانینگ بیرگنی- ده.
- مین اؤغیل بؤلیشنی إیسته یمن،-دیدی ساوق آوازده.
- ایککه نینگنی اؤره سن اجمل جانیم، دیدی لینه.
لینه قؤلیگه إیدیش تؤله سوونی آله توریب توبکده گی گللرنی سوغاره باشله دی.
5
آره دن تؤرت آی اؤتدی چمه سی. لینه قیز کؤره یاتگنینی اجملگه ائتمی یوره بیردی. ایری قیسته ی بیرگچ، آخری لینه :
- باریب دوکتورگه تیکشیرتیردیم.
- خوش، نیمه دیدی دوکتور؟ سؤره دی اجمل.
- قیز،- دیدی لینه لبلریده تبسّم اره لش.
- پیشانه ام شور ایکن،- دیدی اجمل.
- نیمه گه؟
- نیمه گه ایدی، قیز...
- اجمل جان عزیزیم، اویت بؤله، یورتینگدن آرقه لب کیلگن قالاق فکرلر بیلن یشب یوره بیره سنمی؟ إیگیرمه بیرینچی عصرده بونداغ اؤیله میدیلر. باله نی اجره تیش یخشیلیک ایمس. سین خرافاتدن واز کیچگن انسان ایدینگ-کو، - مونگلی تاووش إیله دیدی لینه اجملگه.
اجمل انتیرنیت ترماقلریگه کیریب، دلیده گی سؤراقلریگه جواب إیزلی باشله دی. کؤپ نرسه لرگه دوچ کیلدی. «آخری خاتین ایرککدن توبن توره دی»؛ «خاتینلر نینگ ساچی اوزون عقلی کلته»، - دیگن خلاصه گه کیلدی و خاتین- قیزلرنی جزالاوچی صحنه لر، قاتیب قالگن دینی تعصّب اجملنینگ روحیگه بمبه بؤلیب کیرگن. شوندن باشلب، او نماز اؤقی باشله دی. یؤقاتگن نرسه لرینی انه اعتقاددن تاپگنده ی بؤلدی... قیزنی آلدیرماقچی بؤلیب کؤردی. بیراق، بونگه لینه تیش- تیرناغی بیلن قرشیلیک کؤرستدی.
6
نیمه قیلسه هم اجمل زرتاب نینگ آته سی ایکنینی تن آلیشگه مجبور ایدی. چقه لاققه بو اسمنی لینه اؤیلب تاپگن. قؤغیرچاقدیک قیزه لاق آنه نینگ قوچاغینی تؤلدیریب، اوئیگه فیض بغیشلب توریبتدی. چقه لاق بیر یاشگه کیرگنده اجمل و لینه لر مهاجرلیک مقامی بیلن کاناداگه قبول قیلیندی. بیرآیدن سؤنگ ججّیگینه عایله مسکوه نی ترک قیلیب، إیککینچی ابدی وطنیگه یؤل آلیشیلری کیره ک ایدی. اولر بختیار حیات آغوشیگه قئته یاتگنیدن خورسند. آلدلریگه امکانیتلر ایشیگی ایشیگ لنگ آچیلگن. اولردن فقطگینه قانوننی حرمت قیلیب یششگینه طلب قیلینه دی. قالگنیگه اؤزیلری خان، اؤزلری بیک...
سفرگه آتله نیش آلدیدن ایر- خاتین تیارگرلیک کؤره باشله دیلر. لینه چقه لاغینی ساغ -آمان کاناداگه آلیب باریشنی اؤیله یدی...24-إینچی اوگوست کونی ایرته لب اوچیشلری کیره ک...
مسکوه هواسینی قویوق تومن چؤلغب آلگن. سهل اؤتمی شرّه بیران یامغیر قوئیب بیردی. کیتیدن بابا قویاش زررّین نورلرینی ساچه باشله دی. آته- آنه و کیچکینه رزتاب طیّاره گه چیقیب اؤرینله شدیلر. أیگیرمه دقیقه دن سؤنگ طیاره آسمانگه کؤتریلدی. کؤپ اؤتمی به هیبت کیمه فیروزه بؤشلیق بغریگه شونغیب کیتدی. طیاره قه لین-قه لین قاره بولوتلرنی یاریب، پرواز ایتماقده ایدی. اوچاولان اجره تیلگن اوچته اؤریندیققه جایله شدیلر. سفرده بحثله شیش فکریده ایمسدی. لینه، وقت اؤتیشینی کؤزلب ایری اجملنی گپگه توتدی :
- بیله سنمی اجمل؟ انسان اؤزی إیسته مه گن تقدیرگه تن بیریشگه مجبور ایکن. آدم ذاتی ازلدن مهاجر بؤلیب توغیلگنگه اؤخشه یدی. بیر زمانلر انسان باله سی آت، ایشک، تویه لرده اوزون منزل باسیب، اؤزیگه آسایشته مکان إیزلب یؤلگه چیققنلر. منه حاضر بؤلسه، انسانلر عقل تفکّری بیلن، جانسیز تیمرقنات کیمه لرده اؤتیریب قیسقه وقت إیچیده کؤزله گن یرلریگه یتیب آله دیلر. إیککله سیده هم بیر قاعده حکمران ایکن اؤیلب قره سم. اؤز فکریگه ایگه بؤلیب، اؤزی إیسته گن طرزده یششنی خواخله گنی اوچون انسان یورتیده سیغمی، غربت دیاریگه قره ب یوز بوریشگه مجبور بؤلرکن. بیراونینگ ائتگنینی، بویروغینی بجرمه گنینگ اوچون آنه یورتدن قویلیشگه محکوم بؤلرکن آدم. سین و بیزنینگ تقدیریمیزهم بیر تاماندن شو نرسه لرگه باغلیق. یخشیم کی، بو یاروق عالمده، انسانیتنی اؤیله یاتگن آدملر بار.
- بو نرسه لرینگ خدانینگ آلدیده چیپّک. کتته راق نرسه لر حقیده باش قاتیر لینه. تیمیز- تقیر، عالم- پالیملرینگنی أیغیشتیر. تیپّه ده لیگیمیزنی هیچ قچان اونوتمه...
- گپنی چوه لشتیرمی ائته دیگن بؤلسم، بو دنیاده سین و بیز، بوتون بشریت بیر نیچه انسان نینگ عقل میوه لرینی یب کون کؤریب کیله میز. اولر یره تگن امکانیتلر حسابیگه یشب کیله یاتیرمیز. بیز استعمالچی آدملر شولرگه شکر قیلمسدن اؤزیمیزگه معمّا، جنجل توغدیریب یششگه اؤرگه نیب قالگنمیز. عالملرنینگ، دانا آدملرنینگ قورالی سؤز و فکر؛ بیزنینگ قورالیمیز ایسه زوره وانلیک. اگر دنیاده فقط عالملر، اؤقیمیشلیلر یشه گنده ایدی، یر یوزیده تینچلیک حکمران بؤلرمیدی؟ افسو س بونده ایمس- ده،- دیدی لینه بیر پیاله ساووق سونی إیچه توریب.
اجملنی قارانغی کیله جک، ناته نیش تقدیر، ایریشیب بؤلمس موهوم امیلر اؤز شکنجه سیگه آلگن. انتیرنیتده کؤرگنلری اونینگ بؤئینیدن بؤغیب آلگندیک. اونینگ دلیده غیری دینلرگه قرشی جنگ قیلیش، شهادت بیلباغینی بیلیگه باغلب آلیش کبی اؤیلر اجملنینگ مییه سینی بند ایتیب توریبتدی. طیاره دیره زه لریدن پستگه نظر تشله گن لینه، طرفه اولکه لر، یورتلر، خلقلر، تاغ- تاشلر، دریا یو، دینگیزلر عجیب بیر منظره بیلن تماش ایتماقده ایدی.
7
طیاره نری- بیری اؤن سککیز ساعت دیگنده کاناده خلق ارا قؤنلغه لریدن بیریگه یقیلنشدی. بیر پسدت کیئین قئیه لب اوچه یاتگن طیاره یرگه یرگه قؤنه دی. استوردیس عیال طیاره نینگ قه یرگه اوچیب کیلگنی، بلندلیگی، حرارت درجه سی، وقت و هوا باسیمینی اعلان قیلدی. بیرآزدن سؤنگ طیاره یرگه باریب قؤندی...
تیگیشلی تشکیلاتلر خادملری اجمل عایله سینی اعزازلب، مهمانخانه گه آلیب باریب جایلشتیردیلر. بیر هفته اؤتیب دولت اولرگه بلند قبتلی بنالردن اوی بیردی. جان باشیگه نقد پول، تیکین طبّی خذمت، برچه قولیلیکلر حاضر و ناظر. کؤرگن یامان نرسه لری آرتده قالیب، ایزگولیک و یخشیلیکلرنی اؤیلب، اولرگه إینتیلیب یشش توریبتدی آلدینده.
8
لینه اجمل نینگ إیچیده جدّی اوزگزیشلر صادر بؤله یاتگنینی سیزیب توره ر، اوند غیر طبعی بیر حرکتلر نمایان بؤله یاتکنینی پئقب باره ر، بیر نرسه قیلیب قؤئیشیدن خبردار ایدی. بولرگه لینه مهاجرلیکده یوز بیره یاتگن فرهنگی تفاوت صفتیده قره ب کیلدی. حیات ینه اؤز إیزیگه، اؤز اؤزنیگه توشیب کیتیشیدن امیدار ایدی...
کونلردن بیرکونی لینه اوئینی أیغیشتیره رکن، توشکنینگ آستیدن بیرجلد پاسپورت تاپیب آلدی. ورقلب باقسه، نی کؤز بیلن کؤرسینکی، پاسپورتده زرتاب بیلن اجملنینگ عکسی یایشتیریلیب قؤیلگن. سناقلی کونلردن سؤنگ اؤچیب کیتیله دی. افتیدن آته قیزینی سفرگه تیارلش ترددیگه توشگن. آنه سیدن یشیریب قیزنی قی یاققه دیر آلیب کیتماقچی. بوندن خبردار آنه نینگ کؤنگلیگه وهمه توشدی. اوّلیگه بیرحقیقت ته گیگه یتماقچی بؤلدی. اجمل کیلگندن کیئین همّه نرسه آچیق-آیدی بؤله دی.
آقشام قارانغی توشگچ، سراسیمه بیر احوالده اجمل اوئیگه کیریب کیلدی. لینه سیر بیرمسدن آچیق پیشانه بیلن ایرینی کوتیب آلدی. اجمل :
- عدر لینه مچیتده ایدیم، شونینگ اوچون کیچیکیب کیلدیم. خورسندمی سن اؤزی. زرتابدن نیکمه خبر؟ آلتی یاش بؤلی دیب قالدی قیزچه. مکتبگه قؤئیش نیتینگ بار ایدی. اول- بول نرسه خرید قیلدینگمی؟
- هه، همّه سی یخشی... بیله سن مین نهایتده باسیق عیالمن. یوره ک- بغریم کینگ. سیندن بؤلک اؤیله یاتگن نرسه نینگ اؤزی یؤق مین اوچون. ساغ بؤلسنگ بؤلدی. مینگه هردایم یوره ک سیرینگنی آچیبب تشله کنینگ اوچون سینگه رحمتلر ائته من، سیندن اؤله - اؤلگونچه مندارمن. میندن یشیره رسیرینگ یؤق دیب اؤیله یمن. راستینی ائت کیئینگی کونلر بیریاققه کیته یاتگنده ی اشته رابلب قالدینگ. تینچلیکمی ، سینی بیزاوته کؤره یپمن؟
- تینچلیکمی اؤزی؟ دایم بی معنی خیاللرگه باره سنده لینه. لیکین، حقیقتنی بیلگنیندن کیئین اؤزینگگه کیله سن. شو تامانینگ مینگه یاقه دی. مینیگ سیندن سیر توتگن نرسم یؤق،- دیدی اجمل.
- بو نیمه سی،- هلی آهاری کیتمه گن یپ ینگی پاسپورتنی قؤلیگه توتیب،- بو سیر ایمی نیمه ؟
- نی ی ی ی م م مه؟ دیگنچه جایده قاتیب قالدی اجمل.
- نیمه اوچون قیزیمگه پاسپورت آلگنینگنی توشینتیریب بیره سن ایندی، دیب توریب آلدی لینه.
- اؤزینگنی باس، منه توشینتیره من. سینگه غلطی تویلمه سین دیب ائتمی کیله یاتگندیم. اؤن إیککی إیل بؤلدی سین بیلن یشب کیله یاتیرمن. راستمی، یالغانمی سین مینینگ دینیمگه کیردینگ. برچه ائتکنلریمنی بجریب کیلماقده سن. بعضی بیر اودوملریمیز بارلیگیدن سینینگ خبرینگ یؤقوق. اولرنی ایندی ائتمه سم بؤلمس. قزینگگه پاسپورت آلیشدن مقصدیم:
کیچیکتیرمسدن سنتنی بجا قیلیشیمیز ضرور. یؤقسه، آخرتده جزاگه تارتیله میز.
- میلی ایشیته من،- دیدی لینه.
- راضی بؤلسنگ هم بؤلمه سنگ هم بوقیزنی آلیب کیتیب، اؤز یورتیمده "ختنه!" قیلدیرماقچیمن. اؤزی قیز باله نی بیش یاشده ختنه قیلیش کیره ک ایدی. منه وقتیدن بیر أیل اؤتدی. قره ب توریشگه حاجت یؤق دیب اؤیله یمن. لینه إیککی قؤلینی کؤکسیگه قؤئیب :
- نی ی ی ی م م مه،- دیدی یو، قاپ- قاره تیرگه باتیب، قؤل- آیاغی تیریگنچه اؤزیدن کیتیب أیقیلدی.
بیر پئت قؤغیرچاقلری بیلن نریگی خانه ده اؤینب تورگن زرتاب چاپیب کیلیب آنه سینینگ قوچاغیگه اؤزینی آتدی. آنه سی نینگ کؤزلریده جاودیره ب آقه یاتگن کؤز یاشلرینی یگنی بیلن اریتیب، بار تاووشی إیله تکرار- تکرار«آنه جان!!!»- دیب بقیردی. زرتاب آنه سی نینگ کؤزلریدن اؤپگنچه زار- زار أیغلر ایدی.
کؤپ اؤتمی ایشیک تق- تقله دی. أیغله یاتگن زرتاب «دوکتورجان! دوکتورجان! آنمی قوتقریب بیرینگلر التماس!!»- دیه زارله نیب یالبره کیتدی. پولیس هم تیز طبّی خذمت خادملری بیلن اویگه کیردی. اولر اجملنی سؤراققه توته باشله دیلر...
۲۰۰۶-أیل کانادا