قیشلاغیمیزنینگ بای-بدولت اولوغلریدن،دانیار حاجی اؤلیب قالدیلر. یؤقاریده گی مقالنی اؤشه کونی آدملر تیلیدن ایشتگن ایکنمن.درّاو خبرچینی چارلب کیلدیلر.اونگه قاره سحردن«یتتی قیشلاقنی جنازه گه خبر قیلگین!»-دیه تاپشیریق بیریلدی.شوندن سؤنگ ممه دیار صوفی یؤلگه آتلندی.جنازه خبرینی اوّل،قوم قؤرغاندن باشله دی. کؤچه لردن إیتلرنینگ آهاو-آهاولب هوریشیگه قره می،قیشلاقنینگ آبرولی کیشیلری نامینی بیر-بیرائتیب، آخریده:«...جنازه گه خبرآآآآووووآآآ»-دیه یؤغان آوازده قیچقیردی. کؤچه ده تورگن بیر-إیککی آقساقال«یخشی آدم ایدی تنگری یارله قه سین»-دیب، یوزلریگه فاتحه تارتیلر.

آیاقده می،اولاوده می،إیش قیلیب،اوزاق-یقیندن جنازه چیلر کیلیشدی.دانیار حاجینی عزتلب،حرمتلب توپراققه تاپشیردیلر.

کنجیت ماییدن پلاو قیلیندی.کتته میدانده گیلملر یازیلیب،آش تارتیلدی.مُـلله لر، خواجه لر وحاجی بوه لر قؤللریده گی یلتیره ب تورگن پلاو یوقی،صواب بیلیشیب،و تبرّک سه نب،ساقللر یگه سورتیلر.رحمتلی یخشی آدم ایدی دیئشیب قئته- قئته آمینلشدیلر.روزغاری ابتر کمبغللر هم آشدن تؤیب-تؤیب یدیلر.ینه شو صواب آشیدن کرسانلرگه سالیب،اویلریگه آلیب قئتگنلر هم بؤلیشدی.کتته-کیچک رحمتلر ائتیشیب،مرحومنینگ جاینی جنتدن سؤره شدی.

2

      حاجی آته قضا قیلیشدن آلدین،ملالرنی چقیرتیریب،شیره لیککینه وصیتنامه هم یازیب قالدیرگن ایکن.اؤشه وصیتنمامه ده جمله دن شونده دیب یازیلگن ایدی:

«تنگری نینگ بنده سی مین خاک دانیار حاجی فلان،فلانلر حضوریده شولرنی وصیت قیله منکی:تیگیرمان کتته اولوم خدایارنکی بؤلسین،دیمه یرلر ممه رحیم نیکی، سوروک قؤیلر اؤرته ده،کتته باغ اؤیلنمه گن اؤغلیم مد نظرگه،دولتیمدن قیزلریم یریم اولوش آلشیسین،آنه سیگه سککیزدن بیر؛قرضلر آدملردن اؤندیریلسین؛نقد پولدن ملله، قاری،امام،خواجه،سیّدلرگه ینگی کیئیم باش آلینسین و مبلغنینگ قالگنی شو عالی ذاتلرنینگ یئیش-إیچیشیگه صرفلنسین.آلتین،کوموش،تنگه،غجه ریلریم خیراتیمگه إیشله تیلسین و أیل آشی بیریلیب،أیلیم شهرنینگ جامع مچیتیده سیندیریلسین...قاغدنینگ تیگیده مهر شاهیدلر وباش برماق إیزلری».

       وصیت بجا کیلتیریلیب،شام آقشامی،اوچی،یتتی سی،أیگیرمه سی،قیرقی آلدینمه-کیئین اؤتکزیله باردی.شو مدتده حاجی نینگ قبری اوستیدن قاری لر نینگ آوازی اریمه دی.توتن-کون قبراوستیده تلاوتلر ینگره ب توردی.قیشلاقچه سیگه قیلیب،اعزا و باشقه مراسملر کؤنگلیده گیدیک قیلیب بجریلدی.دانیار حاجی نینگ أیللیگی هم یقینیه شی دیب قالدی.

3

      تیارگرلیک إیشلری باشله نیب کیتدی.تلویزون آرقه لی آدملر خیراتگه دعوت قیلیندی.مراسملرنی شهرده اؤتکزیش قیشلاقده گیسیگه قره گنده سیر خرجتراق بؤله دی.هر قه لی،بایلیک،میراث کؤتره رکن بونده ی چیقیملرنی.اولکن جامع مسجید نینگ تام آرقه سیده کتته-کتته قازانلر آسیلدی.پلاوخان تؤره دملندی.دستور خوانلر یائیلدی.قؤلی-قؤلیگه تیگمی آشپزلرنینگ کفگیرلری قازان نینگ قولاغیگه جرنگیللب تیگیب توریبدی.غؤریلرگه آش سوزه باشله یاتگندی.سلله پیچینی باشیگه قیستیرگن آیاق یلنگ جرارلر دستور خوان اوستیده یؤرغه له یاتیب،«اوچاوره آلینگلر»- دیب تاواقلرنی ترقه تماقده ایدیلر.تلاوت وخیرات صحنه لری فلیمگه آلیندی.شهرگه آلیب باریلیب تلویزیوندن قؤئیلیشی هم ممکن.

معرکه ده قؤل قاووشتیریب تورگن آیدینلی کیشی کؤنگلی غشله نیب :

- دستورخوان اینگ تازه و تبرّک نرسه،همّه یورتده بو نرسه قدریت حسابلنه دی.کیر آیاقلرینگیز بیلن دستورخوان اوستیده اؤیناقلب آش ترقه تیشینگیز یخشی إیش ایمس.آوقتنی قؤلمه-قؤل قیلسنگیز آسان کیچه دی.یؤقسه ناننی خوار قیلگن بؤله سیزلر؛بو إیشلر ینگیز بیلن ایلگه کولگو بؤله سیز.باشقه لر سیزنی مدنیت سیز آدملر ایکن،دیب اؤیله شه دی.تؤغریسینی ائته ی بو صحنه نی کؤریشدن اویه لیب کیته یپمن.بو جیرکنچ عللتنی کیم آلدینی آله دی اخر؟ضیالیسی خیرات خور طایفه نینگ احوالی شو بؤلرکن-ده،وادریغ!!- دیب إیچیده گی بار دردینی تؤکیب سالدی.

      خیرات خورلر ترقه لیشدی.کون اؤرته بؤلیب قالگندی.قویاش قیزیگن پلله.مچیتده مرحومنینگ یقینلری ملله لر،خواجه و سیّدلر،حاجی یو آبرولی کیشلر قالیشدی خلاص.جامعیده آواز کؤترگیچلر واسطه سیده پیشین نمازی هم اؤقیلدی.

4

      خیراتدن کیئین هلیگی آدملر أیغیلیشیب،دانیارحاجی نینگ شهرده گی اوئیگه قئتیب کیلیشدی.کتته خانه ده تؤپله نیشدیلر.اویته أیگیتچه کمیره نی کمپیوتیرخانه گه آلیب کیلیب قؤیدی.اوسته أیگیت خیرات و مراسم صحنه لرینی ایسده لیک اوچون کمپیوتیرده فیللشتیرماقده ایدی.

      اؤتیرگنلر اوسته أیگیتدن فاتحه،مراسم صحنه لرینی تیلویزیوندن قؤئیب بیریشینی التماس قیلیشدی.بیرآز اؤتیب یاقیلگن زنگاری شیشه اؤچدی.آدملر تلویزیون پرده سیده مراسمنی کؤریشگه چاغلنه یاتگندی.بیردن تلویزیون ایکرنیده ایرکک و اعیال اؤرته سیده بؤله یاتگن اینگ نازک مناسبتلر،یالانغاچ و ویتلی صحنه لر باشله نیب کیتدی.

   یاتوبه،یاتوبه،استغفرالله لر تلویزیون کرنی یدن ینگیره یاتکن هنسیره ش،نالیش و إیغره نیشلر آستیده قالیب کیتدی.اوسته أیگیتگه قره ته:«اؤچیر،اؤچیر،تیزراق اؤچیربولرنی »-دیگن تاووشلر آتیلدی.ینگلیشگن اوسته إیگیت افسوسکی اؤز   جاییده ایمس ایدی...