اینگ کؤپ دقتینی اؤزیگه قره تگن نرسه،قیسیدیر بیراققه توشیریلگن قیرمیزی برگ تصویری ایدی.شودن باشلب جناب ایکس بو بیراقده گی قیزیل یپراقنینگ خصلب و خاصیتنی بیلیشگه إینتیلدی.نیمه بؤلگن کی،بیرگینه قیرمیزی یپراق بیر یورتنینگ مللی رمزیگه ائلنگن.قیزیل یپراق تصویرینی اصلیده او،بیر یازوو قورالیده کؤریب قالگن.سؤنگ بو رنگین یپراققه چین یوره کدن کؤنگیل قؤیه دی.جناب ایکس اوشبو یپراق بیلن هر کون سؤزله شه دیگن بؤلدی؛قیزیل برگ هم کیپریک قاقمی جناب ایکس نینگ دردینی تینگله یدی.اؤشه ییراق یوزیده اؤیب یازیلگن قدرتلی بیرخلق تاریخی صلابت تؤکیب توریبدی.جناب ایکس نینگ نظریدن،اوشبو قیرمیزی برگ،اؤز ایلیدن ائرا قالیب ،کهنه قطه (اورپا) گه بغیرآچگنچه،بختیار کونلرآغوشیده نفس آله یاتگنگه اؤخشردی. یوزیده قیرمیزی یپراق مهرلنگن بیر یلاو(بیراق) آمانلیک،سعادت وایرکینلیک شمالی إیله مغرور هیلپیره ب توره یدی.جناب ایکس یپراقنینگ جوشقین رنگلریدن تؤیمه یاتگنده ی.قیزیل یپراق هم کوتیلمه گن دؤستی نینگ آغریقلی سؤزلرینی تینگلله شگه توریش- تؤزم بیریب توره ردی.
نیگه دیر،جناب ایکس نینگ بیردن - بیر ارمانی شو قیرمیزی یپراق دیاریگه آیاق باسیش ایدی.منه،آرزو- إیستکلر هم اوشلدی،مینگلب چقیریم یؤل آشه،هوا کیمه سی بواوزون آره لیقنی اینگدی.اونی نا ته نیش اولکه اونی ساووق قارإیله سئیله دی؛مهربیلن پینجیگه آلدی.جناب ایکس بؤیاقلری تامیب تورگن قیرمیزی یپراقلردن تره له یاتگن سحرلی رنگلر هواسیدن تؤیب- تؤیب نفس آله دی.جناب ایکس اؤشه قیزیل یپراق یورتی نینگ تنسیق وغریبلیک تؤپراغینی شکرانه لیک حقی،آلیب کؤزیگه سورتدی.سوینگنیدن شو قیرمیزی یپراق شأنیگه آلقیشلر ائتب،کؤنگیل یازدی.
جناب ایکس یاشینینگ یریمنینی غربتده اؤتکزیب کیلدی.ایندی،چین وطنیگه ائله نیب قالگن بوغربتدیاریدن یشش،اؤزگه چاره یؤق.یوزیگه حیات فصلیدن ینگی ایشیگ آچیلگن ایسه- ده، تیپـه سیده اؤشه ایسکی آسمان،آیاغی آستیده،شوجفاکش زمین.آلدینگی تورموشی بیلن ینگی حیاتی اؤرته سیده گی فرق فقط گینه،ایرکینلیکده!آزادلیک ایپکینلریدن روحی آچیلگن جناب ایکس اؤزینی ایرتکلرمملکتیده تاپگنده ی بؤلدی.
اپتیدن قره سه،اونی قئینب کیلگن هؤسل- قلتیس نرسه لردن نشانه هم یؤق بو یرلرده.مقدّس موهومات و آله قؤقیرلر روحینی کیمیرمه یپتی.فکری،اعتقادی اوچون هیچ کیم جزاگه تارتیلمه یدی.دین فروشلرنینگ بازاری کساد.اولرایرکه لب آیاغیگه إیقیلیب،یالبریب صدقه بیره یاتگن خلق اؤتمیشگه ائلنگن.بیر پئتلری دهشتلی ینگره ب کیلگن،ایندیلیکده ایسه،چؤغی انچه په سه یب،اؤچیب،کوچسیزله نیب قالگن چیرکاو- کلیسالریدن آنده- سانده قؤنغیراقلر تاووشی ایشیتیله دی.نیشی سوغیریب آلینگن کلیسا راهیــبلری انچه رام ایتیلگن.اولر حاضرچه بی آزار.مقدّس روح هم عرش اعلیسدن یرگه توشیریلگن.کلیسالر عامّه گه خذمت کؤرستیش اداره لریگه ائلنتیریلگن...
او یشب کیله یاتگن یرلرده دنیاوی چینه کیم حیات گورکوره ب یشنب باره یاتیر؛همّه نرسه انسان اوچون.بو یرلیکلرجنــنّتی اؤززمینیده قوریب قؤئیگنلر.توزوک- تؤره لر بیرتیکیسده إیشله یدی.برچه نینگ ارمانی اوشلگن؛ایزگو وامان-امان کونلر بویرلرده طنطنه قیله دی.همّه نرسه بار،امّا،غربت دردیگه درمان یؤق.او إیشینی قیلیب باره ویره دی...
هرنرسه نینگ بیر،امّاسی بار- ده! دؤمه لاق باشلرده قنده ی اؤیلر إیزغیب یورگنیدن،یاووزلیک شرپه سیدن همّه قطاری جناب ایکس هم بیخبر.هه،تؤغری!هیچ کیمنینگ مییه سیگه کیریب باریب،اونینگ اؤی- خیالینی تیتیب تیکشیریب بؤلمیدی- ده...
کیم بیله دی،همّه قطاری جناب ایکسنی هم ینگی قؤنیم تاپگن یوروتی اؤزی نینگ،إیسّیقـّینه قوچاغیگه آلگندیر...غربت اونینگ بؤغزیگه قچان وقنده ی آغو شیره سینی ایزیب قوئیشی حاضرچه قارانغی.
ایندی بیر أیل اؤتیب ایدی.کؤزنی قمشتیروچی،کوزگی تؤق قیرمیزی یپراقلر جناب ایکسنی اؤزگه ینه-ده،مفتون ایته دی.یپراقنی کؤریشدن حضور- حلاوت آله دی.کیچ قؤیاش باتیشدن آلدین اوییدن چیقیب،اوتوبوسده اؤتیریب باریب،طبعیت آغوشیده خیال سورش اونینگ ایرمه گیگه ائله نیب قالگن.او بیرعشق دردیگه مبتلا.جاندن عزیزسیوگیلیسی یپراق بیلن هرکونی بیرمرته دیدارله شه دی.اوچره شیش جایی شهرنینگ قاق اؤرته سیده. بو مکان کتته یؤل بؤئیده جایلشگن.بو یرده گی قیرمیزی یپراقلر بؤلک جایلرنیکیدن نیمه سی بیلن دیر اجره لیب توره دی.
اوتوبوسلر توره دیگن جایده،تیمیر پنجره لی دیوار آلدیده قؤئیلگن اؤریندیقلر یشیل،قیزیل، زرّین کوزگی برگلرگه تیکیلیب اؤتیریشگه جوده قولی.رنگین یپراقلرگه قناتلری چه ئیلگن تورلی- تومن کپه لکلراوچیب قؤنماقده ایدی.هوا ملایم،یاقیملی.ایسه یاتگن یل بدننی سیلب اؤتردی...آسمان یوزینی بیردن قویوق بولوتلر قاپلب آلدی. بیر سیدره سیپه لب یاغی اؤتتی.شو تابده،کؤکنینگ کون چیقر تامانیده،یریم دایره سمان کمه لک بؤزه ریب چیقدی.کمه لک رنگلری بوگــَل انچه گینه یارقین پارلب توردی.راسه تنیقلیگیدن کمه لک رنگلرینی گؤزه ل قیزنینگ اؤریلگن ساچیلرینی یچگنده ی قیلیب،یتتی توتمگه اجره تیش ممکن ایدی. پروانه لر اؤزلری نینگ شوخ قناتلرینی انه شو کمه لک بویاقلریگه باتیریب،سؤنگ قنات رنگلرینی درخت برگلری اوزره سیپیب،یائیب قؤیگنده ی ایدی گویا.
یؤقاریدن گورکیره ب هواگه قاره توتون پورکب کیله یاتگن ریل بیکت سرای چه سیده گی ساکنلیکنی بوزدی.کمه لک هم،قویوق توتون آرتیده بیکینیب آلدی.تیمیر یؤلده تــَر- ترلب،سلته نیب باره یاتگن ریل سیکین اؤتیب بارماقده ایدی.جناب ایکس سنب قره سه،ریل تیرکمه لری (واگونلری)بیر یوز اؤتتیزته گه یتتی.چؤزیلیب کیتگن ریل اؤتیب بؤلگونچه کپه لکلرهم کؤزدن غایب بؤلدی.
جناب ایکس افرا درختی آستیده اؤتیریب،قیزیل برگلر تماشاسیگه غرق.شو پئیت بیردانه قیرمیزی یپراق درختدن اوزیلیب،ایکس نینگ قوچاغیگه توشدی.قیزیل برگنی قؤینیدن آلدی-ده، قؤلیده توتگنچه اونگه تیکیلیب قالدی.یپراق یوزیده بیتیب قؤئیلگن،بیراق،هلی اؤقیلمه گن سیرلی یازوونی بیر- بیر کؤزدن کیچیره دی جناب ایکس.هلی بیری اوندن کؤزاوزگوسی یؤق.
***
یؤللر بؤییده اوستونلرگه اؤرنه تیلگن یاریتگیچلر شهرنی چراغان قیلیب توریبدی. اوتوبوسلر سرایچه سیده گی چیراقلردن توشیب تورگن نورلر قیرمیزی یپراقلرنی ینه ده،سیرجیلا قیلگن. تیوره ک-اطرافده گی تؤرت-بیش قوتلی اوی دیرزه لریدن پستگی منظره نی مراق بیلن تماشا قیلیب تورگنلرهم کؤزگهتشله نه دی. اؤریندیقده اؤتیرگن جناب ایکس باشینی کؤتریب قره دی.شوپئیت جناب ایکس آلدیده کؤزیگه قاره کؤزلیک تقیب آلگن سیمیزبیرکیشی پیدا بؤلیب قالدی.ایگنیده کؤک کؤیلیک،ایاغیده إیپسیز بوت،قؤلیده قاره تؤربه اوشله گن ناتنیش آدم،آدابنی جائیگه قؤیماقچی بؤلدی شیکیللی،اؤزتیلیده سلام قیلدی،جناب ایکس بیلن قه لین سؤره شدی و باش إیرغب قویوق إیلجه یدی.آدمگرچیلیک یوزه سیدن جناب ایکس هم اونگه قؤل اوزه تدی.اسمی نامعلوم بوآدمنینگ إیچیده نیمه لرکیچه یاتگنی بیلینمس،اپتیدن بیجیریم،کم سوقوم،مدّعاسیز کؤرینه دی.بیر قره سه،تیلمچیلیک قیلیب یوروچی کؤچه آدمیگه هم اؤخشب کیته دی. یلتیره مه تقیرباش بیرکیشی ایدی؛ساقلی تگیدن قیریب آلینگن؛سؤل قوغلاغی اوزیکنینگ کؤزیدیک قیلیب تیشیلگن؛بؤیی بلند؛ایلکه لری کینگ، قؤللری اوزون؛باش برماغینینگ تیرناغیده کنجید دیک خالی بار.قارنی آسیلیب راق توره دی.
- مرحت قیلینگ،- دیدی شو کیشیگه جناب ایکس.
- رحمت،- دیدی ناتنیش آدم اؤز تیلیده و نیمه نیدیرائتماقچی بؤلیب لبلرینی جفتله دی.اونگه چه :
- بیزگه بیره ر گپینگیز بارمی؟ دیدی جناب ایکس.
- إیککی دانه سیگرت بیرسنگسز،منه شو إیککی کیستنی بیره من،-دیدی اؤنگ قؤلینی چؤنته گیگه تیقه یاتیب.جناب ایکس اؤیله نیبراق،باشینی قؤیی سالینتیردی و بایه گی کست تکلیف قیلگن آدمگه تیکیلدی.شو پئت بیکتلر آلدینی سورپره یاتگن کیچیک ماشینه غوریللب کیلد ی و قیزیق کیچه یاتگن ملاقاتنی بوزدی.شاووقین تینگچ،نا ته نیش کیمسه قاره تؤروه سیده گی إیککیته کستنی جناب ایکسگه توتقزدی.جناب ایکس هم :
- شوإیککیته سی سیندین ائله نسین،- دیه قطــّسیدن بیرجفت سیگریتنی ناته نیش آدمگه توتقزدی و هلی آهاری کیتمه گن رادیوکستلرنی قؤلیگه آلیب،یوزیده گی یازوونی اؤقیشگه کیریشدی.نا ته نیش آدم کستلرنی اخلاص یوزه سیده بیره یاتگنگه اؤخشب:«بو کستلر مشهور امیریکه لیک اشوله چی خانیم مـَدونه نیکی بؤله دی!»-دیب تاکیدیله دی و خیرله شیب،یؤلیگه روانه بؤلدی. کوتیلمه گن تصادفی اوچره شو جایده توگه دی.
***
آقشام بؤینیگه آسیلگنگه اؤخشب تورگن ماموق چیراقلرکیچکی قارانغیلیکنی خودّی،کونگه ائلنتیرگنده ی.آدملر إیشدن قئیته یاتگن آنلر ایدی.ترانسپورتلر قتناوی قویوقلشدی. سککیزینچی اوتوبس غیر ایتیب بیکتگه کیلیب قالدی.جناب ایکس عادّی بیرکؤرینیشده اوتوبوس زینه لرینی هتلب باریب اؤریندیققه اؤتیردی.اوتوبس چهاررهه نی کیچیب اؤز یؤلیده کیته یاتگندی.یؤلنینگ إیککی یاققه سیده تیزیلیب تورگن درختلر قیرمیزی یپراققه بورکلگن.کؤزنی قوه نتیروچی رنگین برگلرکوچیز یل ویزه کدن میه ین تیتره ر ایدی.
أیگیرمه دقیقه إیچیده منرلیگه تیب آلگن جناب ایکس،اوتوبسدن توشیب،بیش-اؤن قدم آدیملب اوییگه کیریب کیتدی.باره سالیب صنعت اثری بؤلمیش مــَدونه خانیمنینگ یاقیمتای کویلرینی تینگله ماقچی بؤلدی.او تیپ ریکاردرینینگ ایشیکلچه لرینی موروت آچیب،کستنی تیقدی. بیردن قیامتنی ایسله تیوچی غیر طبیعی،اؤته قؤقینچیلی موسیقه لرنینگ وهیمه لی گولدیراس آوازلری ینگره ی باشله دی.موسیقه شاوقینیدن اوی نینگ هواسی اؤزگردی.اوی دیوارلری،ایشیک و دیره زه لردن یرچنبیشگه کیریب،اولقان آتیله یاتگنده ی بؤلدی.موسیقه دن دنیا توگب،آدملرجان تلوسه سیده اؤرلرینی جهنــّم اؤچاغیگه آته یاتگنده ی روح حکمران ایدی خانه ده.کیتیدن اینگلیس تیلیده منه بونجات قؤشیغی ینگره یدی کیتدی.
اؤشه قؤشیقنینگ اؤزبیکچه معناسی منه بونده ی :
نجــــات قـــؤشیغیدن کــؤزلرینگی آچ،
حیـــات بیر زندانـدیر،سین اونده اسیر.
جگرینگی اؤزینـگ یمسدن بــــورون،
کیچیکمسدن،شاشیل،اؤزینگی اؤلدیر.
دنیا فتنه -فســـاد بــاتقــاغیگـه غـرق،
او سینی هم،یوتــوب یـوبـاره رآخـــر!
سین بیر اؤلیک سن،آچون بیر تابوت،
یم بؤلیب کیتمسدن اؤزینگنی اؤلدیـــر.
قوزغونلر یتینــگنی غه جیب ایمسدن-آق،
اؤلکـــسه لـــربــاشینگنی چینــه می توروب،
تــــوبــــن یششگه سیــــن محکوم بینـــوا.
اؤلیشینگـــدن آلدین اؤزینگنی اؤلــدیر!
سینینگ اؤلیشینگه مین بیر نجاتکار،
افلاس بوحیاتــــدن اؤزینــگی قوتار.
لعنتی بو دنیا سین اوچـون بیـــر دار،
حکمت درختــی مس بیتــــگـَـنی آزار،
قیرمیزی یپراقدیک اوزیلیشینگ بار!
بیر کاسه آغونی بــی نفس سیـــپقار!
اؤلیشینگـــدن آلدین اؤزینگنی اؤلــدیر!
دنیا عــــذابیــــدن اؤزینگی قــــوتقار!
و...
بو دهشتلی قؤشیقلرنی حیاتیده ایشیتیب کؤرمه گن جناب ایکس إیککی قؤلی بیلن باشینی اوشله گنچه اؤیگه تالدی.عنقانینگ اوروغی هم تاپیله یاتگن قیرمیزی یپراقلر یورتیده،اؤلوم قؤشیغینی تینگلشنی خیالیگه-ده،کیلتیره آلمیدی.اؤیلب-اؤیلیب آخری جناب ایکس،اؤلیشگه تشویق قیلوچیلر هر تؤکسیده آیاق آستیدن چیقیب قالمسلیگیگه هیچ قنده ی کفالت یؤق دیگن فکرگه کیلدی.قیرمیزی رنگدن باشقه هم رنگلر بارلیگیگه ینه بیرقتله إیشاندی.