قیزیل-قؤنغیر قاواق اریلرنینگ غونغیللـــَی ویریشی،چیگیرده کلرنینگ چیریلله شی،یان قؤشنیلر حاولیسدن بؤدنه لرنینگ پیتپیلیق آتیب سیره شی،طرفه رنگ کپه لکلرنینگ پیریللب اوچیب- قؤنیشلری مینده اؤزگچه بیرکیفیت توغدیرگن.إیپگه اؤخشه گن اوزون چیزیق بؤیلب حرکتلنه یاتگن چومالیلر،قدیمگی صلابتلی "إیپک یؤلی" کاروانینی ایسگه ساله دی.سلقین هواده اؤتریب قیسیدیر کتابینی اؤقیشگه شیله نه یاتگندیم چمه سی. بالاخانه آستیده اوزونه توشگن سُـــفه اوزره شمال نینگ مـَین اوریلیشیدن اؤیناقه یاتگن درخت یپراقلری سیکن- سیکن سیلکینیب تیرتره ر ایدی. برگلر سیرتیگه یائیلگن باباقویاش نینگ زرّین نورلریدن،یرگه توشیب تورگن سرغیش تنگچه لرعکسی بیردنیگه کؤزدن غایب بؤلدی. یپراقلرنینگ شیتیرلب تیتره شلری تینیب قالدی. یؤقاریدن کؤتریلگن پاریمگینه یل(شمال)آدم نینگ اپتی- باشی،بؤینی-یو،قؤیئین-قؤنجینی معشوقه نینگ تؤلغاق ساچلریگه اؤخشب،یوماشقاقیّنه سیلــَب-سیئپـب اؤته ماقده ایدی.شوپیئت قیبله دن سوزیب کیله یاتگن، اؤرمه بولوتلر تامچیلب اؤتدی.کیئتیدن هوا گولدیره دی؛چقماق چقیلدی- ده،هرنه قویوب بیرمه دی.چومالیلر إینیگه کیریب کیتیشدی.کؤرپه چه سالینگن گیلم نینگ اوچلریدن توتیب ینه قئتیب تؤشب قؤیدیم.
نیگه دیر،کؤزیمنی کؤکدن اؤزه آلمه یپمن.خیالگه بیریلیب افققه تیکلیب قالدیم.نظریمده آدملرنینگ آرزو-إیستک،اؤی وخیاللری انه شو توبسیز ماوی آسمان بیتیده اوئیب یازیلگنده ی.حتــّا،مینینگ هم.شو سببدن بؤلسه کیره ک آدملر تینمی کؤککه باقه دیلر.قنچه باقیشمه سینلر، بــَری- بیر اونینگ یشیرین،عقل ایتمس سیرلری آلدیده عاجز قالیب،اؤیگه تاله دیلر.ینه،آدملر یرده کؤرگن اؤزمصیبت،کلفت،الملری اؤچینی انه شو قؤل یتمس آسماندن آلگنده ی بؤله دیلر.کؤمکوک آسمان کیشیلرنینگ قرغیشیگه مبتلا بؤلگنده ی گویا.آدم نینگ زوله سینی قاریگنده بیری یردن کؤککه قرغیش اریمه یپتدی.مین هم إیچیمده قه له شیب یاتگن شور،اچّیق اره لش سؤزلرنی دادسالیب ساوره ی دیسم،آسمان نینگ بوجمه یگن یوزیده جای قالمه گن.افــققه چقورراق کؤز قده یمن.ینه اؤشه حیرت.اما،یانیمده گی چومالیلر نیگه دیر ناتینچ.اولر ینه تیریکچیلکلریگه باشلشگن.تیزیم-تیزم بؤلیب یؤل باسه دیلر...
هواده بولوتلر قان تلشگنده ی قیرمیزی توس آلگن.جگرد یک قیزه رگن بولوتلر قچاندیر دیرده یوز بیره جک خونریزلیکلردن درک بیریب توره ردی.هه،کؤکده گپ کؤپ.اونده حیرتلنرلی واقعه-حادثه لر مؤل-کؤل.انه اؤشه لرنی بیلیشگه إینتیلیب یه شیدی ایکن آدم باله سی.شو محل،خیال قناتیده چیکسیزلیک سری اوچه باشله یمن،اوچه من-او،چقورراق اؤیلشگه توشه من.
کؤپ اؤتمَی،چیکسیز بؤشلیق قعریدن؛قویوق قاره بؤلتلر آره سیدن بیر توپ قاره قوش سوغیریلیب،شدت بیلن مین تامان اوچیب کیلماقده ایدی.إیلــَس-إیلــَس ایسیمده،قاره قوشلرکؤرینیشدن عادّی قرغه لرگه اؤخشب کیته دی. بیراق،قرغه گه قره گنده،اولرنینگ گوده سی سهل کتته راق، قناتلری اوزین،چؤزینچاق.اوچه یاگنده یائیلکن قناتلر بیلن قؤشیلیب،دومیدن باشیگچه، قاره رابردیک چؤیلیب اوچه دی. اولر یوکسکلیدن اوچه یاتگنده،نشانگه تامان قویئلیب باره دی-ده،ساووق نفسی إیله اؤشه یرنی کؤمیردیک قاره یتیریب کویدیره دی.قاره قوشلر سایه سی تیککن پرچه نرسه قوری باشله یدی.قاره قوشلرنینگ شوم،ساووق وســَنقیب اوچیشلری قنده ی دیر بختسیزلیکدن درک بیریب توره ردی.اولرنینگ بوتون اوضاعینی مئیه مده چیزیشگه اورینه من.قاره قوش حقیده مامه مدن ایشیتگنلریم بار ایدی.امّا،اؤز کؤزیم بیلن کؤرگنلریم مینده چقور إیز قالدیردی.بلکی،خاطره مده مهرله نیب قالگن برچه ایسکی إیزلرنی- ده اؤچیریب یوباردی یاووز قوشلر.بیر زوم اؤتمی،هلیگی قاره قوشلر اوستیمدن گوریللب اوچیب اؤتی. باشیم اوزره ناخوش بیر ساووق هوا کولنگه سالگنده ی بؤلدی.همّه یاق اؤزگریب کیتدی.کؤز اؤنگیمده تیمیرسکیلنه یاتگن آت چومالیلر غاریده، کوتیلمه گن وضعیت توغیلدی. بونگچه عادی حرکتلنه یاتگن چومالیلر،قاره قوشلر نینگ تشویشلی و هجومکارانه اوچیشینی سیزیب،بیردن قؤزغالانگه توشتی.آت مورچه لرنینگ تلپه سلب،شاشیلینچ قؤزغه لیشی اپتیدن،کتته بیرفاجعه یوز بیرگنگه اؤخشب کیتردی.شو پئیتگچه چومالیلر بیر یؤنه لیشده باریب قئیته یاتگن بؤلسه،قاره قوشلر شرپه سیدن سؤنگ ،اولرنینگ یؤنه لیش کؤچه لری کیسکین آرتیب کیتتی.اؤرنیمدن توریب بیر-إیککی قدم آدیمله دیم.قؤللریمنی پیشانه امگه توتیب آسمانگه قره ب، قاره قوشلر إیزینی قیدیریب،تیوره -اطرافگه کؤز تیکدیم. یاشیم آلتمیشنی اوریبدی کی،بونده ی قیغولی کیفیتگه توشمه گندیم.قاره قوشلرنینگ إیککینچی سویلیب اوچیشیگه ینه کؤزیم توشدی.بو یاووز قوشلر، ایندی گل آچیب یپراق یائیب یایگن،داوچه له گن یم-یشیل درختلر نی قوریتیب اؤتیب کیتدی.شوندن کیئین،إیچیمده گی اضطراب تاباره کوچه باردی.قؤزغالگن چومالیلر ینه-ده،ناتینچلندیلر.اولر حقیده کؤپراق اؤیله ی کیتدیم.مورچه لرگه یقینله شدیم...چومالیلر آیاغیم آستیده قالیب،ینچیلیب کیتمه سین اوچون اولرنینگ غاریگه یاوشماقدن تیئیندیم.نظریمده،بوگـــَل چومالیلر کیسکین کؤپه یگنده ی بؤلدی.هه،اولر حدّدن تشقری تؤزیشیب غارلریدن تشقریگه چیقیشگن.
آسمانگه ینه تیلکیلـــَی،دیب توریب ایدیمکی،دهشتلی اوچیب کیله یاتگن قاره قوشلر کؤرکم بیرباغنی نشانگه آلیب بیر پسده کؤمیرگه ائله نتیریب قؤیدی.نیمه؟ اولر باغ-راغگه دشمنمیلر؟دیب، سؤراق بیردیم اؤزیمگه.قاره قوشلرنینگ گلمه- گل قؤرقینچلی اوچیشلری دوام ایته یاتگندی.اولر ینه نیمه نی بوزیش و ویران قیلیشگه چاغله نیشه دی ایکن؟دیب اؤیلب قالدیم.قاره قوشلر نوبتده گی اوچیشلریده ایکینزارلرنی مؤلجللگه آله یاتگندی.نی تیل بیلن ائته ی کی،ایندی،حاصلگه تؤلیب،باشقلب کیتگن ایکینزارلرنی کویدیریب کولگه ائلنتیریب کیتدی.قاره قوشلرنینگ حمله قیلیب اوچیشلری تین آلمی توریبدی. یاووز قوشلر ،بو نوبت کؤمکؤک سوگه تؤلیب تورگن حوضنی نشانگه آلدی.اولر قناتلری اوچینی تؤلیب تورگن حوض سوویگه تیگیزرکنلر،حیات سوو ی بیردن قانگه ائلنه دی.قاره قوشلرنینگ کیتمه- کیت اوچیشی آدملرنینگ عادی حیاتینی إیزدن چیقریب یوباره یاتگندی.بو بختسیزلیک قوشلرینی ایل-یورت باشیدن اوزاقلشتیریشگه انسان کوچی یتمی توریبدی. اونگه قرشی یالغیزگینه چومالیلرده عکس صدا اویغنگنده ی گویا.شوتابده ، کؤنگلیمده توغیلگن اؤی-خیالرنی گپیره ی دیسم تیلیم سؤزگه بارمه یپتی.توشیمّی؟ دیسم،کوپپه کوندوز.حوصله ام جائیده.کؤزعینک بیلن مؤلجلنی یخشی کؤره من.قریلیق بیلیمدن اوشله گن.ماموقده ی ساچلریم باشیمگه آغیلیک قیلیب توریبتی.اؤتمیشگه نظر تشله یمن.قنده ی زمانلرده یه شه گن ایکنمیز؟ بونقه سینی هلی کؤرمه گن ایدیم.بوتون دققتیم قاره قوشلر حرکتیگه قده لگن.نهایت وهیمه باسگن هیجانلی لحظه لرگه گواهی بؤلیب توریبمن.واقعه -حادثه لرنینگ توبیگه یتکیم کیله دی.
صبردین یخشی یؤقتور پیشه قیلسم - بــــو یـؤلده صبر یــؤق اندیشه قیلسم.
-دیگن شاه بیت تیلیمگه کیله دی...
آیاق اوستیده توریب قالدیم.قاره قوشلر پروازی کمه یدی.قاره لحظه لر بیتدی.هرنه باشیمیزدن دب بؤلدی اولر،دیب تورگندیم.بیر پئیت إیپنی سیئیرگنده ی شیویلله گن آواز قولاقلریمینی یلب اؤتدی.بیردن اؤرنیمگه اؤتیریب آلدیم.کیچیک لیگیمده اؤرگه تیلگن إیریم-سیریملرنی قیلـیب بیر نرسه لرنی اؤقـی،دیسم اؤزیمنی آلده گنده ی بؤله من.چونکی،معنالرینی بیلمسدن،مین ائتماقچی بؤلگن بوسؤزلر بیلن جانلی حیات و تریک طبعیت اؤرته سیده هیچ قنده ی علاقه اوئغونلیک یؤق.کتته جومباققه یوزلنه نیب توریبمن.سوادسیزلر تیلیده بو منظره قیامت یاکی آخرزمان دیب تعریفلنه دی.اؤیلریم بیلن آلیشیب توریبمن.نخواتکی،اش-پش دیگونچه دنیا توگب قالسه-یه؟ شو زمان، گله سیدن اجره لگن بیر قاره قوش پستگینه دیوارگه کیلیب قؤنه دی.او کؤرینیشدن سان- سانقسیز چومالیلرنی بیر-بیر تیریب یماقچی ده ی،شــَی بؤلیب توریبدی.آت مورچه لرنینگ حرکتی تیزله شیب کیتدی.قاره قوش چومالیلرگه تیگمسدن، یوزینی دیوار اوستیگه قؤئیلگن رادیو تامان بوریب،کساوده ی قاره یب کتگن پنجه لری بیلن رادیو موروتینی بوره ماقچی بؤلدی.بیر-إیککی سیلتب بوره دی هم.سؤنگ،موروه تنی تومشوغی بیلن إیتره توریب غیقیله تیب چؤقیدی. دراو رادیو سه نــنب کیتدی.اؤشنده،إیلک ایشیتگنلریم انقلاب کویی ایدی.ینگره یاتگن کوی باشیمدن خیالیمنی اوچیردی.اؤیلشگه کوچیم یتمــَی باشیمنی اوشلب جائیمده قاتیب قلدیم...