***

     کیئینگی إیکـّی کون سَــوَه لب یاققن قار،آلدینگی قارلر اوستیگه تاغده ی قــَله شیب کیتدی.تانگ سحردن عادتده گیدیک،یؤل و یؤلکلر زمانوی ماشینلربیلن کؤره لیب،اریتیب تشلندی.اؤشه کونگی منفی 28-۳۰درجه لی ساووق بؤغینلرنی ققشه تر،بورننی پیازده ی قیزرتیریب قؤیه ردی؛إیزغیرین شمال قؤلقاپ کیئمه گن برماقلرنی لؤققیله تیب،بیگیز سنچگنده ی قباقلرنی زیریلله ترایدی.قاره ساووق کیشی نینگ تونیک جایلرنی بی حس قیلیب تشله گودیک بیرکون کون.

      اتوبوسلر إیش کونلری ساعت 7 دن 9 گچه بؤلگنیدیک،اونچه لیک تیربندایمس.سرویسلر تیقیلینچ سیز قتنب توریبتی.سرابدیک توتون چیقریب گوریللب اؤته یاتگن ماشینلرنینگ یاقیمسیز تاوشلری رحمسیز قاره ساووق نینگ ساکن بغریگه شونغیب،جیمیب کیته دی.قاریاغیش تؤخته گن بؤلسه-ده، بؤغیق بولوتلی آسماندن نبوتده گی یاغه جک قار اوچقونلری توشیب توریبتدی.

شهر کیچیک بؤلسه هم ماشینلر آقمی کتته.کؤچه گه چیقیب سککیزینچی اوتوبوسگه اؤتیریب آلدیم. آپپاق قارگه بورکنگن کؤچه لر آشیب،18دقیقه دن سؤنگ شهر مرکزیگه یتیب آلدیم.سرویس المه شیش کیره ک ایدی،بیرآز کوتیب قالدیم شو جایده.کؤپ اؤتمی 3-اوتبوس هم کیلیب قالدی.هیداوچیگه سلام بیریب کیردیم،اؤرندیقلردن بیریگه باریب اؤتیردیم.اوتوبوس شیشه سیده کؤچــــمس قیش خیـــمه لری قؤقینچلی کؤرینه دی.همّه بو جایلردن کؤچیب کیتگنده ی گوئیا.کیئینگی بیکتلرگه توشماقچی بـــؤْگنلر اؤرنیدن جیلیب،سیکن-استه تیارلنه یاتگندی.اشاره چیراقلری نوبتی بیلن یؤلاوچیلرنی یـــــؤنه لتیریب توریبتی.هرنیچه دقیقه ده،قارلر آرتیدن بیر-إیکـّی آدمنینگ قاره سی کؤرینیب قاله دی.اتوبوس تـــــؤرت یؤللیکــّه کیلیب تیقیلیب قالدی.بیر پسدن سؤنگ ماشینلر قؤزغه لیب،ینه یوره کیتدی.چهار راه گه یتگن بیکتگه کیلیب مین هم توشدیم اوتوبسدن.ساووق شدتیدن اؤزیمنی شمال پنه گه آلی،دیه بیکت نینگ غرفه سیگه کیریب آلدیم.شونده ی پئت خیالگه:«شرایط آغیر و قتتیق کیلسه،آدملرکؤپراق یاردمگه محتاج بؤلیشه دی.دردمند،کسل- بیمارلرکؤپـــَیه دی،تیلمچیلر اورچیب کیته دی.اؤلیم-مصیبت و فلاکت حاللری هم آرته دی.کمبغل یورتلرده چاروا ماللری یاپپه سیگه قیریله دی.انسانلر آچارچیلیکدن هلاک بؤلیشه دی. اؤلیکنی کؤمیشگه-ده، کفن هم تاپیلمیدی؛باردی تاپیلسه گورکاودن درک یؤق.آسمان بلند یر قتتیق...»، دیگن اؤیلرمیه مدن اؤته یاتگندی. بو یرلرده-کو، بونده ی معمّالرنینگ بؤلیشی ممکن ایمس. بونرسه لر کمیده یریم عصرآلدین حل قیلیب قؤئیلگن.خیالیمدن کیچگنلرنی منه شو ذیل اؤزیمچه چمه لب چیقدیم. اؤرنیمدن توریب غرفه دن تشقریگه بؤینیمنی چؤزیب قره ماقچی بؤلدیم.قولاقچینیم آستیدن غووللیب   یله یاتگن شمال بؤینیم سیرتینی تیلیب یوباردی.بیردن إیچکریگه کیریب،اؤریندیقده اؤتیریب آلدیم.شو سیم- ساووق مینگه کؤنگیل قؤیب یاپیشیب آلگنده ی گویا.اوبیلن هم،او سیزهم حیات معناسیز بؤلیب کؤرینه دی نظریمده.شوتابده،ساووقدن ائقیبمن،تاریقیب کؤزلریم نینگ آلدی قاره لشدی.خیالگه بیریلیب قالیبمن. اطرافیمده ساکنلیک حکمران.شو زهاتی قرشیمده تورگن بیر شرپه گه قره ب تیکیلیب من،ایلکم اوزره کؤرینمس بیر قؤل اؤرمه له یپتی.یؤق،کیئین بیلدیم،قؤللری بیلن ایلکمنی سیله یاتگن ایکن.وهیمه گه توشتدیم."یؤق،یؤق،مین یاووز روح ایمسمن،قؤرقمه"،-دیدی.خیالیم کینگلیکلریگه پرواز ایته باشله دیم. قره سم،کؤز اؤنگیمیده،آپپاق کفن کیئگن یاقیمتای بیرچرایلی اؤلیک توریبتی.او شونده ی اؤلیککـــی، کؤرگن سری کؤرگینگ کیله ویره دی.هه!چیندن هم اؤلیک ایدی.کفن إیچیــــــده مَیــین ساچلری مأیوس   تاوله نردی. یوزلری خوددی،سوتگه چه یقب آلینگنده ی.حسن و لطافت اونینگ معنوی دنیاسینی مکمّللشتیریب تورگن. شونگه بغشلب شعرلریازیب،دیوانلر توزگم کیله دی.اونینگ مینگدن بیر گؤزه للیگی عالم بنیاد بؤلیبتدی کی،هلی قاغذگه توشیریلمه گن.او دنیا،بو دنیا بوندن- ده،گؤزه لراق اؤلیک بؤلمه سه کیره ک.او آرقه مدن توشیب،خوددی،اوچره شوگه چیققنده ی مینی إیزلب تاپگنگه اؤخشب،جوده-جوده خورسند کؤرینه دی.بیچاره یالیغیزلیکدن ایزیلیب،ادا بؤلگنی شونده ی بیلینیب توریبتی.اوهم کؤنگیل آوله ماقچی چمه سی.آچیق ملاقات بؤلسه-ده،کؤزینی کؤرستماقچی ایمس.قاره کؤزلیک آرتیدن مینگه کؤزسالیب توریبتی.کؤزلرینی کؤرستمه گنیگه شبهه له نیب،کؤزی کؤرمی،دیب  اؤله دیم.یؤق،یؤق کؤر دیب ائتیشگه تیل بارمیدی.یؤق،بوحقده اؤیلشگه حدّیم هم یؤق.

او بیلن بیر زوم بؤلسین جانیم،عزیزیم،دیه قوچاقله شیب،تؤئیب-تؤئیب حال-احوال سؤره شدیم.بغر آچیب، اؤزیگه مینی یقین آلدی.اپتیدن تیریکلردن کؤره مهربانراق.انچه ین یولدوزی إیسیق.قلبی قئیناق،سؤزلری بال،اؤزی گل آتگن یوره کلرگه مرحم. یوزلری هلی آچیلمه گن،اؤقیلمه گن سیوگی دفتری.او بیلن درد-حال قیلیشگه قنی ایندی بی ملال وقت؟ یوزأیل هم کملیک قیله دی.بونایاب معنوی سیوگی نینگ بیلیـــگه تیپب تورگن قهرتان ساووقنی ائتمــَی سیزمی؟  آه!قنی اؤشه روحی لذّت،معنوی ذوق و شوق؟!قنی اؤشـــــه آرامبخش قئته توغیلیش؟

عشق نینگ داستانی اوزون،لیکین،وصال آنلری تؤیمسیز،قیسقه بؤله دی.او بو دنیادن ا.زیلگنی اوچون سینگه معمّا توغدیرمیدی.اؤلیک نینگ اؤزی قندیر اجتماعی درنینگ قربانی بؤْگن.خطا قیلمَی قئتــــیب یششگه إیچ-إیچیدن آشیقه دی،بیراق ایندی کیچ،اعلاجی یؤق.او تریکلر دنیاسیدن بیر تؤده حسرت بیلن اؤشه منگو مکانگه قئتیشگه محکوم ایتیلگندیر.خوددی،آلاو آلگنی کیلگنده ی.اوشاشیله یپتی.مین کؤپراق شوندن خواطرده ایدیم.سیوگیلیم عزیز  اؤلیککه همّه گپلریمنی ائــــتیب اولگــوره آلرمیکن منـــمی؟دیــــه شاشیله من. منه، هیجاندن آتینی هم سؤره مبمن.الماسدیک برماقلرینی برماقلریمگه کئیدیریب،امکان قدربیر-بیریمیز گه قاوشیبراق اؤتیریب آلیبمیز. سؤنگ اومینگه :

- قیسی اولکه دن کیلگن سن جانیم؟- دیدی.

- آه عسلیم!یالبره من،اؤتینیب سؤره یمن.فقط شونی سؤره مه ی قال!قالگن برچه سوراقلرینگه،صاف سیوگیمیز حقی جواب بیره من،دیدیم. او بؤلسه،کؤنیب میلی،دیه قالدی. تغین اومینگه :

-  قاره کؤز،قاره قاش لیگینگدن بیلیب توریبمن.ائت چی جانیم!شعــیه می سین،سنـــّی؟-دیب     سؤره دی.

مین اونی کوتتیرمسدن درآو :

- اونیسی هم ایمسمن؟مونیسی هم،دیدیم...

بوجوابیمدن تعجّب قیلیب حیرتگه باتدی.

قره نگ هه،نادر واقعه لر قیسته لنگـّه آلیب صادر بؤلرکن.وا دریغ!سؤزلریمنی نیمه دن باشلب،نیمه بیلن توگته ی؟ دیب توریبمن إیچیمده.جاندن عزیز اؤلیک مهمان شاشیله یپتی. ینه اونی کؤریب بؤـــلرمیکن؟   منه ائتگنیمده ی کیتیب قالدی.کؤزدن غایب بؤلیب بارسه کیلمس یؤلیگه کیتیب قالــدی.کؤزیـــــم آچلیب کیتتی.خیالده گیسی بیلن چین حیات اؤرته سیده گیلر آره سیده فرق بغایت کتته ایکن.

      منه،اوتوبوس  هم کیلیب قالدی.اوندن آدملر تیزیلیشیب توشه باشله شدی.اولر آره سیده کؤکره گیده الـــله قنده ی یازوو آسیب آلگن اوزون بؤیلیک،کؤزی کؤربیر کیشی عصاسی بیلن یؤلـــَکـنی تیق-تیقله تیب اوتوبوسدن توشماقده ایدی.یازوویگه قیزیقیب یقیندن تیکیلیب باقدیم.هه!حقیقتدن کؤزی عاجز بیر آدم ایدی.مین بیلگن و کؤرگن یورتلرده بونده ی اسانلرگه التفات کؤرسه تیله دی.بو تامانلرده بونده ی ایمس ایکن.کؤرنینگ کؤکره گیده قیستیریب قؤئیلگن یازوونی دقــّت بیلن اؤقیدیم.

اونده:«التماس،مینگه یاردم بیرمنگیز!»- دیب یازیب قؤئیلگندی.