کؤز مینچاق
اولرنینگ یاشی بیر جایگه یتیب قالدی.بیر نرسه نی حسابگه آلمسه شو پئیتگچه تورموشلریدن نالیگن یرلری یؤق.اؤشنگه أینتیلیب یه شه دیلر.برچین آی بابا مراد گه تورموشگه چیقــّن ایکن، بیر تیرناققه زار بؤلیب،باله کؤریشنی راسه اؤن سکــّیز أیل کوتدی. بؤئیده بؤلمی یوردی. باله سیزلیک عذابی اؤنینگ تینچینی آلیب قؤیدی.همّه اونگه:«نیگه باله نگ یؤق؟»- دیه تگنده ی ایدی گویا.کوچه-کوی،قؤنی-قؤشنیلر آره لریده: «عیب خاتینیده میکن،یا کی اؤزیده؟»-دیگن دؤ-دؤ گپ.اوستیگه- اوستک،بیرکونی اوبیلن بیر مرته تیلله شیب قالگن یان قؤشنیسی عایشه خاله،نی ایلتیب،نی کیلتیریب«بختی قرا»-دیبتی اونی سیرتدن.
شوگپ وسؤقــّه باشلیکدن اویه لیب،آخری اؤزینی گنهکارحس قیله یاتگن بؤلد ی برچین آی. باله کؤریش أیلینجیده قؤلیدن کیلگن بار حرکتینی قیلیب کیلدی.امیداوچقونلری هلی اونینگ یوره گیدن اؤچیب کیتگنیچه یؤق.«باله کؤره من دیدیممی،کؤره من!»- دیگن گپیده توریبتی.شو تاپده،دنیانینگ منه مین من دیگن دانشمندلری هم کیلیب:«آو خاله!اؤزینگیزنی مونچه قئینه منگ، ایزمنگ،روحینگیز نی یمیریب یره لی بیرمنگ،بیله توریب،بیرمظلوم ومحکوم چقه لاقنی بوآشفته دنیاگه کیلتیریب اؤتیرمنگ.وبال بؤله دی،باله توغیب گناهگه قالیب نیمه قیــله سیزآپه؟ نیــــمه گه دیگنده،بیریاقدن قیرغین-برات اورشلر،باشقه تاماندن یتشماوچیلیک؛عیالنی کم سیتیشلر،ناچارلیک، جنسی زوره وانلیک،دینی،سیاسی دغدغه لر،داری- درمانسیزلیک واینگ مهمی تعلیم- تربیه گه قؤل یتمسلیک بیداد سالماقده. بیراؤیلب کؤرینگ-ه،شونده ی شرایطده باله سیزلیک نینگ اؤزی سیزاوچون بخت ایمسمی اخر؟»- دیسه- ده،کؤنه یاتگن احوالده ایمسدی برچین آی.
نیمه قیلیبتدی،بورنی آقیب،آیاق- قؤلی یره،یوزی-باشی دانه لب کیتسه هم اؤزبیکــّه باله-«کلمه گوی»کیره ک ایمسمی؟! نیمه،کتته بؤلسه،آته-آنه سیگه اؤخشب،باشی تؤی،ضیافتدن چیقمیدی. یؤق.شاشمنگ،هلی اونگچه انچه گپ بار.توغیله جک بونده ی باله لرالبتته کی،آته-آنه دن آلدین قوماندانلرگه،دینفروش مجاهدلرگه اسقاتــه دی...بیرتؤزاغیگه أیلینسه بارمی،اولردن قوتیلیش نینگ یؤلی یؤق.بو یؤلنی بارسه کیلمس دیدیلر.راستی گپ-ده،کمـــبغل نینگ روحی مــــؤرت بؤله دی. محتاجلیک،قشّاقلیک بیرینچی گلده،او نینگ اراده سینی بوکیب،غـــــرورینی قؤلیــــــدن آله دی، شخصیتینی تاپتب یرگه اوره دی.اونی فرمان بردارقیلیب قؤیه دی.اؤقیش وتعلیم-تربیه کؤرمه گن آدم-آنگسیزبؤله دی؛اؤز حق-حقوقینی یخشی بیلمه یدی.
قیزیق.منه دنیا نینگ بیرینچی سرمایه دارلریدن بیری امیریکه لیک جناب بیل گیتس نینک باریاغی بیرگینه قیزی بار ایمیش.تؤغری،مسلمان یورتده یه شه میدی،تؤرته خاتین آلیشگه اونگه قانون
إذن بیرمیدی ایکن. بیراق،او اوچون اؤنلب اؤغیل- قیز کؤریشگه هیچ قنده ی تؤسیقنلیک یؤق-کو!بای بچه نینگ اختیاریده گی کؤکه تایلر(دالر) بیلن یردن آی گچه نروان یه سَب چیقسه بؤله دی.
بوحیاتی مشاهده،حساب-کتابلرنی بیر یاققه سوریب،اؤزیمیزنینگ برچین آی خاله نینگ حکایه سینی دوام ایتسک.
آخری اولراؤغیل کؤریشــدی.سوت اوستیگه ینه بیراؤغیلگه آنه بؤلدی برچین آی.سوینگنیدن جانی إیچیگه سیغمیپتی. بیشیکنی چؤغده ی قیلیب یه سب قؤیدی.تیلب آلگن إیکـّیگینه باله گه کؤز تیگمسین قیلیب،بیشیگیگه قؤشه لاق کؤزمینچاق ته قیب قؤیدی آنه. حتــّا،آوچیلردن بؤری آشیغینی تیله تیب،کؤزمینچاق یانیدن تیزیب هم آلدی برچین آی.بیشیکــّه قؤنغیر بخملدن طومارچه تقدی. اونینگ تیلدن ینگره گن إیلیق تیلــَکلر ائتیم،قؤشیقلر گه قاریشیب کیتتی. برچین آی نینگ ارمانلری مؤل.
آدم باله سی یرگه کؤچت قـــَدب،اونینگ سایه سیده اؤتیریب،میوه سیدن یماقچی بؤلدی- ده.ایسکی اؤلچاولربیلن ائتگنده،اؤزبیکچه،شرقی،زهنیتیمیز شونگه ماسله شیب قالگن.«سوت بیلن کیرگن قیلیق جان بیلن چیقه دی»،دیئیلگن آته لر سؤزیده. بوندن اؤزگچه راق تورموش طرزینی تجربه قیلیشگه جرأت قیله آلمیمیز. برچین آی خاله و بابامراد آته لرنینگ بیردن- بیر آرزو- امیدلری: «شوگوده کلر آدم بؤلیب سانگه کیرسین،آته-آنه سی نینگ سوینچیغی،تاپرمن-توترمنی بؤلسین» ایدی احتمال.
نیمه بؤلسه-ده،أیقیلیب،سوریلیب اولغه یدی باله لر؛سویه گی قاتدی اولرنینگ.آلغاو- دالغو زمانلرگه قره می،منه غلام سخی،غلام نبـــیـلرنینگ حیاتدن نصیبه لری اوزیلمه کن ایکن، عسکرچیلیکدن هم آی باریب،آمان قه یتیشدی.
بابامراد آته و برچین آی خاله کویب،یانیب تاپگن-توتگنلرینی شولرگه صرفله دی. باقدی، باولیدی.اولرنینگ کیله جگینی اؤیلب،کؤزلری تیریکلیگیده،باشپنه،-حاولیسینی-ده،تیله کی اؤغیللری نینگ آتیگه رسمیلشتیریب قؤیدی.آته- آنه گه باشقه قیلردیک إیش قالمه دی چمه سی،ارمانیمیزگه یتتدیک،دیه یه شـََب کیته ویردیلر.
قره نگکی،چرخ-فلک ائله نیب،اؤغیللر اویله نیشدی،باله-چقه کؤریشدی...اولرهم آته-آنه بؤلیشدی.آله خؤرجین ایلکه لریگه توشتی.کونینی کؤریب اؤز اروه سینی تارته باشله دیلر.کونلر اؤتیب،کتته عایله نینگ تینچی هم یوقاله باشله دی.سیکین-استه آته-آنه بیرچیتگه سوریب قؤیلدی. اولر اؤز اوئیلریده سیغیشمی قالدی آخرعاقبت.
باریب-باریب،اؤغیللرنینگ قاره قازانلری ائری-ائری بؤلدی.هر کیم اؤز کولچه سیگه آلاو تارته یاتگن بؤلیب قالدی.آلدی-قاچتی،میده-چویده گپلر کؤپه یه کیتتی.آته-آنه گه قیا باقمس بؤلیشدی ایرکه تای اؤغیللر. بیر تیشلم نان،بیرکاسه قاره شوروه نینگ هم کیتی تقه-تق اوزیلدی.کیکسه یب قالگن آته-آنه کونلب آچارچیلیک تارتیب،بی شام باش قؤیه بیر دیلر.آخری تونه شگه اؤزلریگه تعین خانه تاپه آلمی،یر- خاتین ایوان(برنده)نینگ بیر چیتیده بیر- بیری نینگ پینجیگه کیریب،توننی کونگه اولب چیقه یاتگن بؤلیشدی.قره سه لرباش قؤیشگه یاستیق-ده،تاپمه ی یاتیرلر. یاشی بیر یرگه باریب قالگن آته-آنه«شونیسیگه یم شکور!»-دیه تیشینی-تیشگه قیسیب،یه شب توریشیبتی اؤشنده گچه.
سخی قویاش افقــّه باش قؤیه ی دیب اؤز زرّین چادرینی استه-استه أیغیب آله یاتگندی. موسیچه دیکینه برچین آی خاله اوی دیواریگه ته یه نیب،کؤز یاریغیده اؤتین-چؤپ،تقر-توقر، پتتی-ستـتیلرآستیده قالیب کیتگن اؤشه بیشکنی تاپیب آلیب،سودره ب-سودره ب،چنگی چیقیب یاتگن برنده نینگ آخریگه ایلتیب،إیککله سی یه شی تورگن جایده،بیجیریمگینه یرلشتیر دی.
بابامراد آته غمگین بیر کؤرینیشده :
- نیمه قیله سن ایسکی بیشیکنی سودره ب خاتین،- دیدی هارغین بیرآوازده.
- نیمه قیلردیم آته سی،اؤزیمیزگه پرده بؤسین،باش پنه بؤسین دیئمن، بیر یاغیمیزنی یاپه تورسین- ده،-ایشیتلر-ایشیتیلمس آهنگده،- منه إیککی تامانیمیز دیوار،بو طرفگه بیشیک قؤیدیک. توشیندیزمی ایندی؟- دیدی ایریگه برچین آی خاله.
برنده بورچه گیده إیککی کیشی سیغرده ی جای قیلیندی. ایسکی-توسکیلرینی ته شیب،اویاق،بو یاقلرینی یاپیب آلگنده ی قیلیشدی اولر.ایسکیراق لتته-لوتته نی اولب-قوره ب،تیپه لریگه تیکسه لر خوددی،جؤگیلر نینگ نق اوییگه اؤخشر ایدی.
بابا مراد آته تیرسه گینی بوکیلگن کؤرپه چه بیریب یانباشله یاتیب:
- قریلیکده،کیچقرون توشه بیریشی بیلن آدم نینگ وهیمه سی آرتیب،اویقوسیزلنرکن. توندن قؤرقه دیغان بؤلیب قالیبمن آنه سی!- دیدی.
- گپینگیزده جان بار آته سی!مینینگ هم باشیمگه ارواحلرگیر-گیرائله نیب تورگنده ی گویا،- دیدی قاشلری چیمریلیب تورگن،بؤیی بوکچه ئگن آنه.
بایه گی بیشک ایندی اولرگه باشقه معنا کسب ایته باشله دی.اولرنینگ نظریده اؤشه گینه بؤشه ب قالگن بیشیک،مونگلی تیبره نه یاتگن کهنه دنیاگه اؤخشب کیترایدی.مثال،بیشیک یر کرّه سی سینگری یخشیدیر،یاماندیر هربیر تیریک جان ذاتنی اؤز بغریگه آله یاتگنده ی کؤرینردی. بیشیک آنه زمینگه اؤخشب،باله نی ا َوه یلب اؤستیره دی،اتک-چیچک قیلیب،قوش باله سینی اوچرگندیک،شو مکاندن یاریغ عالمگه اوزلوکسیزپرواز بیریب توره دی. ینه آنه سیّاره گه اؤخشب،کیلگوسی نسللرگه اؤزکؤکسیدن جای بؤشه تیب تورگنده ی گویا بو بیشیک.
بیشیک یانیده اؤتیره رکن چال-کمپیر سؤنگگی یرم نانینی بیر کاسه سو بیلن یب توگتدیلر. اولرنی بوندن بویاغی قئینه ماقده ایدی. آته-آنه هم قؤینی بؤشه ب قالگن شو بیشیکــّه اؤخشه یدی. ایندی بیشیکـّه هیچ کیم نینگ إیشی توشمه یپتی.بوگینه بیشیکنی زاره تیشه،بالته کؤترگن کیرقؤللر غژده لب تشله مسه،یاقیب،یاندیریب یوبارمسه ایدی کاشکی،دیدی آته-آنه.هـــلی،آنه الـله سینینگ إیسّیـــــق،یاقمیتای وپاریمگینه صداسی اؤره لیب توریبدی بو بـــیشیکده.بیشیک نینگ یاغاچلریگه مَیینگینه اوریلگن آنه نینگ نالیشلری ساچیلیب یاتبیدی.چقه لاق نینگ إینگـــّیلب أیغلشلری،قیقیرده ب کولیشلری یو شوخلیکلری شو بیشیک فضاسیدن یاغییلیب توریبدی.
آنه نینگ هیدی همان دماغلرگه اوریلب،حضور-حلاوت بغشلب توره دی. بیشیک نینگ سویه گینی قّّّــــقه شه تیب،زیرقیره ته یاتگن نرسه- بیرگینه یالغیزلیک. ویرانه گه اؤخشب هاووله ب قالیشدن قؤرقه دی بیشک...بو بیشک آته-آنه اوچون هم اولکن دنیا همده جَجیگینه کلبه. بیشک بیلن باغلیق خاطره لرآته-آنه نینگ روحینی کیمیریب باره یپتی.هلی آلدینده یه ششدن بار.قنده ی قیلیب کون کیچیریش؟ نیمه یب-إیچیش مساله سی،کئینیش،یاپینر،تؤشه نرلری توریبدی هلی آلدینده.
پینه کی قیلیشدن بورون چال-کمپیر بوندن کیئین قنده ی قیلیب روزغار تیبره تر مساله سیده باش قاتیرماقده ایدیلر.
- اؤغیللریمیزنینگ دستورخوانیده تؤکیب قؤئیلگن رزیقیمیز توگه دی.نیمه قیلمز ایندی آنه سی؟ بیلدن کوچ کیتتی،کؤزدن نور.آیاغیمیز گؤرلبیگه باره ی دیب تورگن بیر پئیتده نان گدای بؤلیشدن اسره سین،- دیدی بابامراد آته کمپیریگه گپ تشله یاتیب.
- خـَی خدا پاشا!«نان گدای بؤلسنگ بؤل،جای گدای بؤلمه»-دیگنلر.اؤزی تیشیب قؤیگن تاماغینی بیرلقمه نان بیلن سیلر اخیر،- دیب قؤیدی خاله.
- قیزیغ گپیره سن کمپیر،هلی آسماندن بیر نرسه تشله گنینی هیچ کیم کؤرمه گن.عکسینچه، میلیونلب آدملرنینگ عذاب-عقوبت إیله خورله نیب اؤلیشینی کؤریب توریبتی پرردگار.مین دنیا نینگ عذابلرینی شو قادر مطلقدن کؤره من.اونگه شولر یاقه دی شیکیللی،یؤقسه نیگه همّه یاقنی گلستان قیلیب قؤیمَیدی؟ بیزنی مونچه لرسیَــنب نیمه قیله دی یره تگن؟ همّه سینی اؤزی بیله دی-کو!ه- کمی- کؤستینی میندن سؤره میدیمی؟ ائتیب بیره ردیم قئته نگی،بنده لرینگــّه إیشانمه دیب.بیزنی هم شو کویلرگه سالرمیکن تنگریم؟ انه شوندن قؤرقه من کمپیر.
- نیمه! سیزده آی کؤریبمی؟ باشقه لردن بیره ر آرتیق جاینگیز بارمی،یاکی؟ گپیزدی قره نگ-ه.
- تیشیک تاماغنینگ غلوه سی کؤپ ایکن آنه سی!
- بیرآونینگ محنتینی کو،قیلیشگه یره میمیز.تیلمچیلیک قیله میز-ده؛آدملردن تیکه-تیشلم نان سؤره ب کونیمیزنی کؤره میز بیر عمللب،- دیدی برچین آی خاله چالیگه مصلحت معناسیده.
بابامراد آته :
- إیش قیلیب ته نیش بیلیشلردن اوزاقراققه باره یلیک،ینه کؤرگن- بیلگنلر فلانیلر گدایلیک قیلیب یوریبتی،دیمه سینلر ته غین.هر حالده محلله ده اؤزیمیزگه یره شه آبرویمیز بار،تؤغریمی؟ شوگپنی ایسدن چیقرمیلیک آنه سی!
برچین آی خاله نینگ کؤزلریدن یاشلری سیتلیب چیقرکن:
- مَیلی! نه چاره،- دیدی.
- اؤکسینمه،کؤز یاشی قیلمه گین آنه سی!منگله یمیزگه یازیب قؤیلگن ایکن شوکونلر. تقدیرنی تکبیر قیلیب بؤله دیمی؟
- باله نگدن تارت دیگن ایکن خدایم،- دیدی کمپیر،چقورآه تارتیب.
- اؤزینگنی باس،کؤز یاشی قیلمه،- قؤلیده گی رومالی بیلن کمپیری نینگ کؤرلرینی اریتدی،-قؤلیمیز کلته بؤگن مینن،تیلیمز قیسقه ایمس.آدملرگه یدیرگن میز وختیده...
- «بار ایدی،بار ایدینی قؤینگ،منه،بار-باردن گپیرینگ»،- دیئدی آدملر.شونده ی زمانده یه شـَیپمیز،دیدی بیرچین آی خاله قلتیراق آوازده.
توننی بیر عمللب اؤتکزیشتی چال-کمپیر.ایرته لب نمازینی اؤقیب آلدی بابامرادآته.ایر-خاتین بیر- بیریگه تیرکه شیب،کؤچه گه چیقتدیلر.برچین آی خاله کوموش رنگ کتته قرسی نینگ بیر اوچی بیلن باشینی تنغیب باغله دی. بابامراد آته بؤز سلله سی نینگ قیستیریلگن پیچینی توشیردی. عصاسینی قؤلیتیغیگه توتیب سیره ک ساقالینی برماقلری بیلن تره دی.کمپیر چالی نینگ قؤلتیغیگه سوینب،إیککه له سی آدیمله ی باشله دی.
جمعه کونی ایدی.قویاش آپــّاق ایته گینی یای مسدن-آق،ایرته لب چال-کمپیر تیلــَمچیلیب قیلیشگه، اونچه اوزاق بؤلمه گن جمعه بازرشهریگه یتیب آلدیلر.
دوکانلر قرشیسیده گی اریقلردن اؤیناقله گنچه،اؤره لیب،بوره لیب شــَلبـــّا سولرآقر،ایرته لبکی شمال ایپکینلریدن مجنون تال،آق قه یین،غوجوم وخیمچه توتلر یاله لری ایگیلیب اؤینه شیاتگندی. ساتوچیلربیلَــَک- بالدیرلرینی شیمَرگنچه،تونیکه إیدشلرده سوو سیپیب،دوکان آلدی چنگـــّیمسلیک اوچون توپراقلرنی یاتقزه یاتگدی.آت-ایشکلرده اوزاق یقینلردن کیله یاتگن بازارچیلر آقیـــــمی کوچیگندی.سماورلردن،قویوق توتونلر کؤکــّه اره له یاتگن ایدی. باشلریده سَبد کؤترگن نان بایلر:«آلیب قالینگ منه إیسّیق نان»- دیه رسته لر بؤیلب نانلرینی ساته یاگندی. دوکاندارلرچارپایه لر اوستیده کــَرسیلله گن کنجیت حلوانی سیندیره ر،قنده لتچی نینگ قؤلی- قؤلیگه تیگمی ساچ حلوا،کلله قند،تیشلمه،تورشک،پسته،باداملرنی چققان-چققان ترازوگه سالیب پولله ماقده ایدیلر.یؤل یاقه سی بؤیلب،آدملر بؤجی،شال،بؤریا یاکی،پلاستیک قاعذ تؤشب،کیمدیر جیئده،کیمدیر،زغیر یاغی،باشقه بیرآو ،قوروت،قوروق میوه لر؛ینه کیمدیر سه چاقلریگه گل سالینگن إیشتان باغ ساتماقده ایدی.موترلرغیز-غیز اؤتیب توریبدی.اوسته تیمیرچیلر تق- توق،گرس-گورس قیلیشیب، روزغار بویوملری یسه ماقده. بازار- ده،هرکیم بیرنرسه نی آلیش یاکی ساتیش بیلن بند.کون بؤیی غاور-غور آوازلربازاردن اریمه یپتی.
چال-کمپیر بازار رسته لری بؤیلب تیلمچیلیک قیله ی دیسه،گدایلر ادبیّاتیدن بیخبر،«بیز اؤغیللریمیز قؤلیدن کوچه گه هیده لدیک،آچ نهار،دربدر بؤلدیک»-دیئشگه تیللری بارمیدی. آدملرنینگ یوره گینی سَری یاغده ی ایریته یاتگن جمله لر توزیب،تیلمچیلیک قیلیشنی ایپله ی آلمیدیلر.آدملردن یاردم سؤره شنی بیر- بیریگه سالیب،کوننی هم اؤتکزیب،نامراد بؤلیب،آخری اوئیلریگه قـئتیشگه مجبور بؤلدیلر.تینکه-مداری قوریگن ایسه-ده،چال- کمپیرتیبره نه- تبیره نه یؤلگه روانه بؤلدیلر...
حاولیگه کیرماقچی بؤلیب ایدیلر همکی،إیچکریدن نا ته نیش آوازلرایشیتیلدی. باله لرقی-چو ساله یاتگندی.درآو حاولی دروازه سینی آچیب،تؤغری ایوان چیتیده قؤئیلگن بیشیک تامان ،اؤز کلبه لری سری یؤل آلدیلر.بیردن قی سیدیر خاتین شه نغیلله گن آوازی بیلن :
-آوو قی گه باره یپسیزلر؟ تیلمچیلیک قیلماقچی بؤلسنگیز کؤچه ده تورمی سیزمی؟ بیر بُرده ناننی خدا یؤلیده اؤزیمیز آلیب-باریب بیره ردیک»- دیدی.
برچین آی خاله :
- «ه ه ه-غلامسیخی،غلام نبی! بؤلرینگ کیم؟»،-دیدی.
اؤغیللریدن آواز چیقمه دی.اونده گچه،بیر ایرکک کیشی نینگ :
- حاولی بیزنیکی،بیز ساتیب آلیدیک،اؤغیللرینگیز باشقه شهرگه کؤچیب کیتــّیلر بویردن!- دیگن دؤریله گن تاووشی ایشیتیلدی.
اوی ایگه لری«چیقینگلر،چیقینگلر!»قیلیشیب،آته- آنه نی زورلب،سوریب چیقردیلر حاولیدن. بؤلیب تورگن وضعیتدن حیرتده قالگن برچین آی خاله زار- زار أیغلشگه کیردی و بیشیگینی آلیب،کؤچگه چیقیشدن اؤزگه چاره تاپمه دی.
چال-کمپیر نیمه قیلرینی بیلمَی تشقریده قاتیب قالدیلر.إیککی ساعتلردن کیئین تون قاره پرده سینی شهر اوزره توشه یدی.منه،نان گدایلیک یتمه گنیدیک،جای گدا هم بولیشدی دردبدر آته-آنه. غربت اولر نینگ یاقه سیدن اوشله دی.ایندی بو لر قی یرده اوخله شسین؟ آسمان بلند یر قتــّیق.
چال- کمپیربیشیک نینگ إیککی تامانیدن اوشله شیب،جاندن عزیزمحلــله نی ترک قیلیب او یردن کؤپ هم اوزاق بؤلمه گن«غریب آته»زیارتی سری یؤل آلدیلر.قاش قاره یمی تورویب،اولر زیارتگه یتیب،هؤنگ-هؤنگ أیغلب،سغنه گه آیاق باسیب کیردیلر.چال- کمپیراؤتیرگن جایلریده، هنسره شدن توخته ب،اؤلگنلر روحیگه دعا قیلیب،یوزلریگه فاتحه تارتیلر.
برچین آی خاله تپ-تقیریرگه اؤتیریب،مقبره ده گی جین چراقنی یاقدی.اؤغیللرینی ایسلب کؤز مینچاقلر و بؤری آشــیقلرینی سیلب-سیلب،تبرّک سنب کؤزلریگه سورتیب اؤپتدی. باله لرینی ساغینیب،یادلب،تؤئیب-تؤئیب أیغله شدی.کوچی-مداری کیتگن آنه قؤلیگه درخت خیمچه لردن سوپورگی یه سَب زیارت تیوره گینی سوپوریب،سیئیریب چیقتی.چال-کمپیر انه شو«غریب آته»مزاریده مجاور بؤلیب،یه شب توره بیردیلر.زیارتچیلر اته گنلرینی تشلب،شوگینه نورانی قریه لر نینگ بیر هاووچ دعاسینی آلیشگه احتیاج سیزدیلر.
نان گدالیک،جای گدالیک وفرزندلرساغینچی چال- کمپیرنی ادای تمام قیلدی. بیشیک گویا، غریبگینه آته-آنه نینگ کؤز یاشلری اوستیده قه لقییب توریبدی.مبادا، بیشیک چه لغیب سووگه غرق بؤلمه سین اوچون چال-کمپیر خیاللریده،کیپریک قاقمی،کائینا ت کینگلیکلریگه کؤز قیری تشلب توریشردی. زیاترچیلر«غریب آته»مزارینی ایمس،کؤپراق قریه لرنی ایسلب،بیشیکــّه اخلاص قؤئیب،یخشی-یامان کونلریده اوندن کؤمک سؤره گوچی بؤلدیلر.آدملر زیارتگه«بیشیک آنه»،دیه إیککینچی نام بیریشدی.هر توس متاعلرنی ،تورلی نیتلر قیلیب،بیشیکــّه أیلیب کیته یاتگن بؤلیشدی آدملر.تیرناقلرگه زار آته-آنه اؤغیللرهجریدن أیلغی-أیغلی کؤر بؤلدیلر. شو«غریب آته» زیارتیده دنیادن کؤز یومدیلر. بلا قضالردن آمان قالگن بیشیک انه شو سرسان- سرگردان چال-کمپیردن یادگار بؤلیب قالدی.
۱۹۸۳-اکتبر-تاشکیت
قیته إیشلنگن ورینتی.