نوایی نینگ مین سیوگن شاه غزلی

جنون تاشی

--------------

جنون تاشی اوروب هریان ینگی داغیمنی افگار ایت،

إیچیمده لاله دیک عشق إیچره تاشیمنی نمودار ایت.

چو مجنون قیلدینگ ایمدی، ای مغنـّی، گوشه تابینگنی،

کؤنگول سوداسی تسکینی اوچون بؤینومغه طومار ایت.

دیسنگ، کؤنگلوم قوشی ائلب هوا، چیکّی نوای ِعشق،

خدنگینگ نینگ پرین ائلب قنات، پیکانّی منقار ایت.

ساچینگ کـُفریده اؤلسم قبریم اوزره قؤیمه خرقه منی،

چیکیب هر تارینی بیر بَرهمن بیلیگه زُنّار ایت.

کؤنگول ایوانیده آهیم یلیدین پردۀ عشقینگ،

دیسنگ کیم، اوچمه سون، مژگاندین اطرافیغه مسمار ایت.

دیسنگ، آغزین کؤره ی، ای عقل، مرکز نقطه سین إیسته،

ولی شرط اوشبوکیم، اوّل قویاش دورینی پرگار ایت.

عمارت طرحیدور نعل و الف دین هر طرف کؤکسوم،

وفا قصرین قؤپارسنگ بو بنالر اوزره دیوار ایت.

ایرور مقصود أیراق، وادی اوزون، تون تیره، یؤل بؤرتاق.

بو یؤلده سلب ایتیب اؤزلوک یوکین، اؤزنی، سبکبار ایت.

نوایی اؤلسه تیرگوزگیل یوزیگه یوز قؤیوب، یعنی،

یوزیگه سوو اوریب، اول اویقوسیدین آنی بیدار ایت.